2 Corinthians 13 - New Testament in Braid Scots 1904 (William Wye Smith)

CHAPTIR THIRTEEN. Paul speaks snelly to them aboot their sins. Ends wiʼ a blessin.

¹ This third time am I come tʼye! “At the mooth oʼ twa witnesses, or thrie, sal ilka word be made siccar!”

² I tellʼt ye afore‐haun, and div tell ye afore‐haun, as gin I war wʼye the second time, to aʼ thae wha sinned, and to the lave — that gin I come again, I wull‐na spare!

³ Sinʼ ye are seekin a prufe oʼ Christ speakin in me, who isna feckless toward ye, but is michty amang ye;

⁴ For he was crucifyʼt oot oʼ weakness; nane‐the‐less he leeves wiʼ Godʼs pooer: for eʼen we are weak in him, but we sal leeve wiʼ him, oot oʼ Godʼs pooer toward ye.

⁵ Try yersels, gin ye be iʼ the faith: pit yersels to the prufe. Or ken‐ye‐na oʼ yere ain sels gin Jesus Christ be in you! except, aiblins, ye be outerlins.

⁶ But I trust ye sal ken we are‐na orts nor outerlins.

⁷ But we pray God ye do nae evil: no that we may seem acceptit, but that ye may do what is bonnie, eʼen thoʼ we be as outerlins.

⁸ For we hae nae pooer contrar to the truth, but only on the truthʼs side.

⁹ And we joy whaneʼer (we bein weak) ye are strang: and for this thing we pray, yere perfection.

¹⁰ Sae for this reason I tell ye thir things, bein absent; that bein wʼye I mayna need to deal snelly, accordin to the pooer the Lord gaʼe me — no for puʼin doon, but for up‐biggin.

¹¹ But noo iʼ the end, brethren, rejoicin, restore yersels to order; be consoled; be oʼ the ae mind; leeve thegither in peace; and the God oʼ love and peace sal be wiʼ ye!

¹² Greet ye ane anither wiʼ a sacred kiss.

¹³ Aʼ the saunts salute ye.

¹⁴ The favor oʼ the Lord Jesus Christ, and the love oʼ God, and the indwallin oʼ the Holie Spirit, be wiʼ ye aʼ!