2 Corinthians 12 - New Testament in Braid Scots 1904 (William Wye Smith)

CHAPTIR TWALʼ. He gets awa frae his toils and degradations, and speaks oʼ his revelations.

¹ To boast may be needfuʼ thoʼ it has nae profit; sae I wull come to visions and revelations oʼ the Lord.

² I ken a man in Christ, wha fowrteen years syne (and gin he was in the body, or oot oʼ the body, I ken‐na — God kens), was claught up, siccan a ane as this, the lenth oʼ the third Heeven,

³ And I ken sic a man as this (gin he was iʼ the body, or oot oʼ the body, I ken‐na — God kens),

⁴ That he was claucht up into Paradise, and heard unutterable things, whilk it is‐na for a man to speak.

⁵ For sic a ane as this wull I boast, but for mysel I winna boast but in my ain weaknesses.

⁶ For eʼen soud I be fain to boast, I sanna be a fule; for I wull speak truth. But I lat be, that nae ane soud think oʼ me aboon what he sees me to be, or hears frae me.

⁷ And whaur‐for, least by the unco greatness oʼ the revelation I soud be ower muckle upliftit, thar was giʼen to me a stog iʼ the flesh, a messenger oʼ Sautan that he micht baff me.

⁸ In this behauf, I thrice entreatit the Lord, that it micht gang frae me.

⁹ And he said to me, “My tender love is eneuch for thee; for my strenth is perfited in weakness!” Maist blythely, than, wull I boast mysel raither iʼ my weaknesses, that the pooer oʼ Christ may be ower me, and around me.

¹⁰ Sae, than, I am content in weaknesses, in skaithins, in necessities, in persecutions, in stretts — on behauf oʼ Christ; for whan I mysel am weak, than am I stieve!

¹¹ I hae become glaikit; ye hae compelled me! For I micht weel hae been commendit by you; for I am naething short oʼ the maist pre‐eminent Apostles — eʼen thoʼ I be naething!

¹² Truly, the tokens oʼ an Apostle war wrocht amang ye, in aʼ lang‐tholin; in signs, and ferlies, and pooers.

¹³ For in whatna way war ye made inferior to the lave oʼ the Kirks, exceptin that I mysel wasna burdensome to ye? Forgie me this wrang!

¹⁴ Tak tent! the third time I am haudin mysel in readiness to come to ye; naither wull I be burdensome; for I seek‐na yours, but you! For the bairns are na to be layin up gear for the parents, but the parents for the bairns.

¹⁵ For, unco blythely wull I spend and be aʼ spent in behauf oʼ yere sauls: thoʼ, the mair I loʼe ye, the less am I loʼed.

¹⁶ But, be it sae! I didna burden ye. But bein pawkie, I tuik ye wiʼ guile!

¹⁷ Was thar ony ane oʼ thae I sent tʼye, by wham I tuik advantage oʼ ye?

¹⁸ I entreatit Titus, and I sent him wiʼ the brethren: surely Titus didna take advantage oʼ ye? Wasʼt no iʼ the same spirit we walkit? wasʼt no iʼ the same fit‐prints?

¹⁹ Ye think, aʼ this time, we are makin apology tʼye! Afore God, in Christ, are we speakin. But aʼ things, beloved, are for yere up‐biggin.

²⁰ For I am in fear, least in ony way, haein come, I soudna finʼ in ye sic as I wad desire; and that I soud be fund oʼ you sic as ye wadna. Least by ony means strivins, envies, belchins oʼ wrath, diveesions, ill‐speakins, swallins, tulzies, be fund.

²¹ Least, haein come again, my God sal humble me amang ye, and I sal hae to mak maen ower mony oʼ thae wha had afore sinned, and hae‐na repentit oʼ the uncleannesses, and lechery, and wantonness they war guilty oʼ.