2 Corinthians 11 - New Testament in Braid Scots 1904 (William Wye Smith)

CHAPTIR ELEEVEN. The Corinthians soud hae studden‐up for Paul; but seein they lichtlied him and his message, he had eʼen to tak his ain pairt. It isna boastin to speak the truth!

¹ I wad that ye coud thole me in a wee fulishness: indeed ye are tholin me.

² For I am jealous ower ye wiʼ the jealousy oʼ God: for I espoused ye to ae husband, that I micht gie ye ower as a pure maiden to Christ.

³ But I fear least in onywise, eʼen as the serpent beguiled Eve wiʼ his craft, sae yere minds soud be airtit awa frae the aefauldness and purity that are for Christ.

⁴ For gin ane comin brings ye anither Jesus, wham we brocht‐na, or ye receive anither Spirit wham ye hae‐na received, or anither Gude‐word that ye hae‐na welcomed — ye micht weel thole him.

⁵ For I reckon to hae come nane short oʼ the maist pre‐eminent Apostles.

⁶ But, gin I war plain in my speech, yet no wantin in lear! but in aʼ ways we made it kent in aʼ things to you.

⁷ Or, did I do wrang in loutin doon mysel that ye micht be heizʼt up, in giean to ye the Gude‐word for nocht?

⁸ I took frae ither kirks, takin fees frae them that I soud serʼ you.

⁹ And bein wiʼ you, and wantin, I wasna a burden tae ony man; for my lack the brethren frae Macedonia made up. And in aʼ things I keepit mysel frae bein a burden, and sae wull I keep mysel!

¹⁰ Eʼen as the truth oʼ Christ is in me, iʼ this boastin I sanna be stoppit in aʼ the land oʼ Greece!

¹¹ Whaurfor? for that I loʼe‐ye‐na? God kens better!

¹² But, as I am doin, I wull do, that I may sned aff occasion frae thae wha seek for occasion; that in what they glorie they be fund eʼen as we are.

¹³ For sic men are fause apostles, deceitfuʼ workers, cheengin theirsels intil Apostles oʼ Christ.

¹⁴ And nae ferlie, for Sautan his sel is cheengin his sel intil an Angel oʼ licht.

¹⁵ Nae unco ferlie, than, gin his servants, too, are cheengin theirsels as servants oʼ richtousness: whase end sal be eʼen as their warks are.

¹⁶ And mair: lat nae ane tak me to be glaikit; but eʼen sae, as a glaikit ane bid me come ben, that I too may boast mysel a wee.

¹⁷ What I am sayin I am‐na sayin eftir the Lord; but as in havers, in this confidence oʼ boastin.

¹⁸ Sinʼ mony boast theirsels iʼ the flesh, I wull boast as weel.

¹⁹ For ye thole fules withoot murmurin, bein wyss yersels.

²⁰ For ye thole ane wha is makin bondmen oʼ ye — wha is devoorin ye, wha is reivin frae ye — wha is magnifyin his sel — wha is baffin ye on the face.

²¹ I speak by way oʼ lichtliean, as gin we war feckless. But whaur ony ane is bauld (I am speakin in a haverin way) I am bauld too!

²² “Hebrews” are they? I as weel! “Israʼlites” are they? I as weel!

²³ “Servitors oʼ Christ” are they? (As ane daft I am talkin,) I eʼen mair! In toils mair abundant; in imprisonments muckle mair abundant; in stripes ayont coontin; in deaths aft.

²⁴ Frae Jews, fyve times did I hae the “forty‐save‐ane.”

²⁵ Thrice was I cloured wiʼ rods; ance staned; thrice ship‐wrackʼt; a day and a nicht hae I spent iʼ the deep:

²⁶ In journeyins aft; in perils oʼ rivers; in perils oʼ robbers; in perils frae my ain folk; in perils ʼmang fremʼd folk; in perils iʼ the citie; in perils iʼ the desert; in perils iʼ the sea; in perils ʼmang fause brethren.

²⁷ In labor and distress; in watchins aft; in hungʼer and drouth; in fastins aft; in cauld and nakitness.

²⁸ And forby the things left oot, that whilk comes on me day by day — to tent aʼ the Kirks.

²⁹ Wha is weak, and am‐na I? Wha is bein snared, and am‐na I burnin?

³⁰ Gin ane maun boast, oʼ the things I am weak in wull I boast.

³¹ The God and Faither oʼ the Lord Jesus — he wha is blessed for aye — kens that I speak‐na fausely.

³² In Damascus, the native Governor ʼneath Aretas the king, was gairdin the citie oʼ the Damascenes to grip me.

³³ And throwe a winnock was I loutit doon in a creel by the waʼ, and escapit his hauns.