2 Corinthians 10 - New Testament in Braid Scots 1904 (William Wye Smith)

CHAPTIR TEN. Paul defends his sel again clashes and ill‐reports.

¹ Noo I Paul, mysel, entreat ye by the meekness and canniness oʼ Christ; wha ootwardly to the een am lowly amang ye, but as awa am bauld toward ye;

² I entreat, hoobeit, that bein present, I may‐na be bauld wiʼ the bauldness I wad hae again a wheen wha look on us as gin we gaed accordin to the flesh.

³ For thoʼ we are walkin iʼ the flesh, we are‐na battlin conform to the flesh.

⁴ For the wapins oʼ oor warfare are‐na fleshly, but strang wiʼ God for dingin doon stranghaulds,

⁵ Puʼin doon lofty thochts, and ilka heigh thing that wad heize up itsel contrar to the knowledge oʼ God; and takin captive ilka motive intil subjection to Christ.

⁶ And haudin oorsels ready to avenge aʼ disobedience, whansaeʼer yere obedience may be seen.

⁷ Are ye lookin at things accordin to their appearance? Gin ony man thinks he is Christʼs, lat him think thus again till his selʼ, that eʼen as he is Christʼs, sae are we Christʼs.

⁸ For gif indeed muckle mair I soud boast a wee oʼ oor poor, whilk the Lord gaʼe for up‐biggin, and no for dingin ye doon, I sanna be putten to shame.

⁹ That I maun‐na seem as gin aiblins I wad gliff ye wiʼ a letter.

¹⁰ For “his letters,” says ane, “are vera true, wechty, and oʼ pooer; but his bodily presence is waff, and his discoorse oʼ nae account!”

¹¹ But lat siccan a ane ken, that oʼ whatna sort we are in oor letters whan we are awa, sae sal we be whan present, in oor wark.

¹² For we are‐na bauld to even oorsels wiʼ some wha speak weel oʼ their sels. But they, measurin their sels amang their sels, and evenin their sels wiʼ their sels, are wantin in gude understaunin.

¹³ We, hoobeit, no as regairds unmeasurʼt things, wull boast oor sels; but by the rule God has measurʼt to us, to extend eʼen to the lenth oʼ you.

¹⁴ For it isna as gin we raxʼt‐na the lenth oʼ you, or war raxin oor sels unduly; for eʼen the lenth oʼ you war we aforehaun, wiʼ the Gude‐word oʼ Christ.

¹⁵ No as boastin oʼ unmeasurʼt things, in ither menʼs labors; but haudin a hope by yere strang faith, oʼ bein enlairged accordin to oor measur, for mair abundance,

¹⁶ Intil the districts ayont ye, to cairry the Gude‐word; and no by ony ithersʼ rule oʼ things made ready, to boast.

¹⁷ But wha may boast, lat him boast iʼ the Lord;

¹⁸ For it isna the ane that speaks weel oʼ his sel the Lord is pleased wiʼ, but the ane the Lord speaks weel oʼ.