2 Corinthians 1 - New Testament in Braid Scots 1904 (William Wye Smith)CHAPTIR ANE. Aboot sorrows and fashes; and what for he didna come to them suner. 1 Paul, an Apostle oʼ Jesus Christ, by Godʼs wull, and Timothy oor brither, to the Kirk oʼ God whilk is in Corinth, wiʼ aʼ the saunts iʼ the hail oʼ Greece: 2 Lovin‐favor to ye, and quateness, frae God oor Faither, and the Lord Jesus Christ. 3 Blest be the God and Faither oʼ oor Lord Jesus Christ, the Bestower oʼ aʼ mercies, and the God oʼ aʼ comfort, 4 Wha comfortit us in aʼ oor troubles, that we may eʼen be able to comfort thae wha are in trouble, by the comfort we oorsels are comfortit, in God. 5 For eʼen as the sufferans‐oʼ‐Christ are unco mony wiʼ us, sae throwe Christ oor comfort is unco great. 6 But, gin we be in trouble, it is the mair for yere consolation and salvation, whilk is workin to yere tholin the same as we are eʼen noo tholin; and oor hope is siccar on yere behauf. Or, gin ye be comfortit, it is aʼ for yere consolation and salvation. 7 Kennin, that as ye are partakers oʼ the sorrow, sae sal ye eʼen be oʼ the comfort. 8 For we wadna hae ye unkennin, brethren, oʼ oor trouble that befel us iʼ the Province oʼ Asia: hoo that in an unco mainner, ayont oor pooer, war we dung doon, sae that we eʼen gied up the hope oʼ life. 9 But we cairry the sentence oʼ death in oorsels, that we soudna hae confidence in oorsels, but in God wha raises the deid. 10 Wha oot oʼ sae unco a death rescuit us, and wull rescue; on wham we hae turned oor hope that he wull again rescue. 11 Ye also, joinin thegither in prayer for us, that the gift granted to us by the prayers oʼ many, may be thankfully acknowledged. 12 For oor consolation is, the witness oʼ conscience, that in purity, and aefauldness afore God, no in wisdom oʼ man, but by Godʼs favor, we sae leeved iʼ the warld — and mair owerflowin toward you. 13 For we are pittin doon nae ither things than what ye did read and own; and I trust ye wull aye own; 14 Eʼen as ye did eʼen own us in a degree, that we war yere rejoicin, eʼen as ye sal be oors iʼ the day oʼ the Lord Jesus. 15 Noo, in this mind I was gaun to come to ye, that ye micht hae a second joy. 16 And to gang throwe you intil Macedonia; and to come back to ye, and by you to be set on forrit to Judea. 17 And this, was I gaun to do wiʼ levity oʼ mind? or siccan things as I decide, dae I decide conform to the flesh, that wiʼ me thar soud be the “aye, aye!” or the “na, na.” 18 But as God is true, oor word to ye isna “aye” or “na.” 19 For Godʼs Son, Jesus Christ, wha was proclaimed amang ye throwe us, throwe me, and Silas, and Timothy, wasna “aye” and “na,” but it becam “aye” in him! 20 For, hoo mony Godʼs promises may be, in him it is “aye,” and in him it is “Amen,” for the glory oʼ God throwe us. 21 But he wha maks us siccar (alang wiʼ you) for Christ, and wha anointit us, is God. 22 Wha eke sealʼt us for his sel, and gied the first‐frutes oʼ the Spirit in oor hearts. 23 But I tak God as a witness on my saul, that by way oʼ sparin ye, I keepit frae comin to Corinth. 24 It isna that we hae rule ower yere faith, but are raither helpers oʼ yere joy: for by yere faith ye are staunin. |
Translated by Rev William Wye Smith. Published in Paisley, Scotland in 1904.
British & Foreign Bible Society