1 Timothy 6 - New Testament in Braid Scots 1904 (William Wye Smith)

CHAPTIR SAX. Content, the best gear. The Gude‐Fecht, and the Gude‐Treasur ayont.

¹ Lat as mony as are servants under commaun, reckon their ain maisters wordie oʼ aʼ honor; least the name oʼ God and the teachin be spoken‐again.

² But thae that hae maisters believin, lat tham no lichtlie tham for that they are brethren, but aʼ‐the‐mair do them service on accoont oʼ being believers and belovʼd, partakers oʼ the same gude‐workin. Thir things teach and threep.

³ Gif ony ane differs in his teachinʼ and stauns‐na by halesome words, thae oʼ oor Lord Jesus Christ, and the doctrine conform to godliness,

⁴ He is swalled up, skeelie in naething, but donnert aboot quaistens and argle‐barglin oʼ words, oot oʼ whilk come envy, strivins, miscaʼins, ill‐surmisins,

⁵ Unendin tulzies oʼ men clean?-?corrupt iʼ their minds, and wantin the truth, thinkin that godliness is gain.

⁶ But godliness, wiʼ content, is unco gain.

⁷ For naething brocht we into the warld, naither are we able to cairry ocht oot.

⁸ And haein meat and coverin, wiʼ thir we sal hae eneuch.

⁹ But thae wha bude be rich, are faʼin into a temptation and a girn, and mony glaikit and ill desires; whilk ding men into ruin and destruction.

¹⁰ For, a rute oʼ ill‐doin is the love oʼ siller; whilk while some followʼt eftir, they war drawn awa frae the faith, and thringed their sels throwe‐and‐throwe wiʼ mony pangs.

¹¹ But you, O man oʼ God! flee frae thir things; and follow ye richtousness, godliness, faith, love, lang‐tholin, meekness.

¹² Fecht ye the noble fecht oʼ the faith! lay haud on the ever‐bidin Life, to whilk ye war bidden, and did confess a noble confession fornent mony witnesses.

¹³ I chairge ye iʼ the sicht oʼ God, wha gies life to aʼ things, and oʼ Christ Jesus, wha confessʼt afore Pontius Pilate a noble confession,

¹⁴ That ye keep the commaun wantin a spot, wantin aʼ reproach, until the appearin oʼ oor Lord Jesus Christ.

¹⁵ Whilk glorie in its ain times the blessed and only Potentate sal schaw, the King oʼ the kingly, and the Lord of the lordly;

¹⁶ Wha alane has immortality, dwallin in licht unapproachable; wham nae man eʼer saw or can see: to wham be honor and dominion for evir and evir. Amen!

¹⁷ Them that are rich in this present world, chairge ye no to be prood, nor lippen to the uncertaintie oʼ riches; but on God, wha gies us a rowth oʼ aʼ things to enjoy:

¹⁸ To be doin gude, to be rich in warks oʼ nobleness; to be free in impairtin, ready to co‐operate;

¹⁹ Layin‐up for their sels a graun fundation for the time to come, that they may lay haud on that that is truly Life.

²⁰ O Timothy! gaird ye what is lippenʼd to ye; avoidin the profane havers and oppositions oʼ aʼ fause?-?named “knowledge”;

²¹ Whilk some, haudin, hae missʼd the mark oʼ the faith! Tender love to ye!