1 Timothy 2 - New Testament in Braid Scots 1904 (William Wye Smith)

CHAPTIR TWA. Pray for aʼ men; for thar is the ae God, and aʼ men are alike needfuʼ.

¹ I coonsel, than, that first oʼ aʼ, supplications, prayers, intercessions, thanks‐gieans, ye mak on behauf oʼ aʼ men:

² For kings, and aʼ thae in authoritie; that we may lead a quate and peaceable life, godly and douce.

³ This is gude and pleasin iʼ the sicht oʼ God oor Saviour;

⁴ Wha wad hae aʼ men to be saved, and to come to fuʼ‐kennin oʼ the truth.

⁵ For thar is ae God, and thar is ae mediator atwixt God and man, himsel man, Christ Jesus;

⁶ Wha gied himsel up a ransom for aʼ; the testimonie to be borne in its ain fit times.

⁷ Until whilk I was appointit to proclaim, and to be an Apostle (I say true, I lee‐na!), a teacher oʼ the nations in faith and truth.

⁸ I coonsel thar‐for, that the men pray in aʼ places, haudin up holie hauns, far frae aʼ wrath and disputins:

⁹ Iʼ the same way, too, that weemen, in fit cleedin, wiʼ meekness and douceness, be buskin theirsels; no wiʼ braidins, and gowd, or pearls, or braw attire:

¹⁰ But — what becomes weemen professin godliness — wiʼ aʼ gude warks.

¹¹ Lat a wumman in quateness be learnin; wiʼ aʼ submission.

¹² But I alloo‐na a wumman to teach, nor to hae authoritie ower a man, but to be in quateness.

¹³ For Adam first was made, then Eve.

¹⁴ And Adam wasna deceivʼt; but the wumman bein deceivʼt, has come to be in transgression.

¹⁵ Yet she sal be saved in her bairn‐time, gif they abide in faith, and love, and holiness.