1 Timothy 1 - New Testament in Braid Scots 1904 (William Wye Smith)

CHAPTIR ANE. Paul minds him oʼ what he had tellʼt him: and than speaks oʼ Godʼs mercie till his sel.

¹ Paul, an Apostle oʼ Jesus Christ, by commaun oʼ God the Faither, and Jesus Christ, oor Lord.

² To Timothy, my true bairn iʼ the faith: tender love, mercie, peace, frae God oor Faither, and Jesus Christ oor Lord.

³ Eʼen as I entreatit ye to bide still in Ephesus, whilst I gaed intil Macedonia, that ye soud chairge a wheen no to be teachin anither gate,

⁴ Nor yet giean heed to silly auld tales and endless pedigrees; whilk in truth rin intil nevir‐endin quaistens, raither than a gude stewardship for God that is in faith.

⁵ But the end oʼ the commaun is love, oot oʼ a pure heart, and a clean conscience, and a leal faith;

⁶ Whilk some, haein missed the mark, gaed agley into idle havers;

⁷ Wha wad be teachers oʼ the Law, no understaunin the things they war sayin, or anent whilk they war stoutly affirmin.

⁸ But we ken that the Law is gude, gin a man mak use oʼt in a lawfuʼ mainner.

⁹ Kennin this, that to a just man the Law isna laid doon, but to lawless and disobedient anes, ungodly and sinfuʼ, irreligious and profane, slayers oʼ faithers and slayers oʼ mithers, blude‐shedders,

¹⁰ Lecherers, sodomites, man?-?stealers, leears, mansworn anes; and gin thar be onything mair, contrar to halesome doctrine;

¹¹ Conform to the Gude‐word oʼ the glorie oʼ the blessed God, whilk was committed to my keepin.

¹² Unco thanks hae I to him wha enablʼt me — Christ Jesus oor Lord — in that he esteemʼd me leal, pittin me intil the service,

¹³ Thoʼ I was ance a blasphemer, and a persecutor, and a hater; nane‐the‐less, I gat mercie, for that I had dune it throwe ignorance, in unbelief.

¹⁴ But aboon aʼ measur was the tender‐love oʼ oor Lord, wiʼ faith and love; that whilk is in Christ Jesus.

¹⁵ Leal the word! and wordie oʼ aʼ takin‐till ane, “That Christ Jesus cam into the world, sinners to save!” oʼ wham a chieftain am I!

¹⁶ But I wan mercie on this accoont, that in me, as a chieftain, Christ Jesus micht schaw forth his unco lang‐tholin, for a paittern for thae wha wad pit faith in him for life everlastin.

¹⁷ Noo to the King oʼ the ages, uncorruptible, unseen, the Ae God, be honor and glorie for evir and evir, Amen!

¹⁸ This chairge gie I tʼye, my bairn Timothy: conform to the prophecies gaun afore on ye, that ye micht fecht the noble war.

¹⁹ Haudin lealness and a clean conscience; whilk some castin frae them, hae as to the faith made ship‐wreck;

²⁰ Oʼ wham is Hymeneus and Aylsander, wham I gied ower to Sautan, that they micht learn no to blaspheme.