1 Peter 3 - New Testament in Braid Scots 1904 (William Wye Smith)

CHAPTIR THRIE. Duties oʼ wives and husbands: lat aʼ do weel, and please the Lord!

¹ In siclike mainner, ye wives, be biddable wiʼ yere ain husbands; sae that gin ony yield‐na tae the word, they may, eʼen wantin the word, be won by the gude‐leevin oʼ their wives;

² As they behauld yere pure mainner oʼ life, fuʼ oʼ reverence.

³ Whase buskin let it no be aʼ ootward — the braidin oʼ hair, and wearin oʼ gowd, and dinkin‐oot in braws:

⁴ But, the inner man oʼ the heart, iʼ the fadeless pitten‐on oʼ a meek and lown spirit, whilk is afore Godʼs face oʼ unco price.

⁵ For sae, langsyne, the holie weemen, wha had their hopes on God, buskit theirsels; obeyin their ain husbands;

⁶ Eʼen as Sarah obeyʼt Abraʼm, caʼin him “Lord”; whase bairns ye are, as lang as ye do weel, fearin wiʼ nae fear.

⁷ And ye husbands, in siclike mainner, dwall wiʼ them conform to knowledge, as wiʼ the weaker veschel, as being joint‐heirs oʼ leevin grace; that yere prayers be‐na interferʼd wiʼ.

⁸ To sum up: be ye oʼ ae mind, sympathizin thegether, lovin the brethren, tender‐heartit, lowly‐mindit;

⁹ No giean ill for ill, nor returnin miscaʼn for miscaʼin; but on the contrar giean blessin; for to this ye war bidden, that ye soud inherit a blessin.

¹⁰ “For ye that wad loʼe life, and see gude days, let him gar his tongue cease frae ill, and his lips that they speak‐na guile.

¹¹ “But lat him turn awa frae the ill, and do the gude; let him seek peace and follow it.

¹² “For the Lordʼs eʼen are on the richtous anes, and his hearin to their petition; but the Lordʼs face is again them that do ill!”

¹³ And wha is he that can bring ye skaith, gin ye be fuʼ oʼ zeal for what is gude?

¹⁴ But gin eʼen ye soud dree ill for that whilk is gude, happy are ye! “But their dreid, dreid ye‐na! nor be ye put‐tillʼt;

¹⁵ “But the Anointit, as Lord, sanctify ye iʼ yere hearts”; aye ready as a defence, wiʼ ilk ane speirin at ye a reason for the hope ye hae in ye: but aye wiʼ meekness, and reverence.

¹⁶ Haein a gude conscience; sae that whaur‐in they speak again ye as ill‐doers, they may be putten to shame, wha miscaʼ yere gude mainner oʼ life in Christ.

¹⁷ For nobler is it (gin it please the wull oʼ God sae) as weel‐doers to be sufferin, than as ill‐doers.

¹⁸ For that Christ also, ance for aʼ, sufferʼt for sins; a Richtous Ane for unrichtous anes; that he soud bring us nar to God; haein been putten to deid in flesh, but made alive in spirit;

¹⁹ In whilk, gaun eʼen to the spirits in thrall, he preached;

²⁰ Wha war dour at ae time, whan Godʼs lang‐tholin was entreatin them iʼ the days oʼ Noah, the ark bein preparin; gaun intil whilk a wee wheen, that is aucht sauls, war brocht safe throwe by means oʼ watir:

²¹ Whilk, as a true likeness, noo saves ye, eʼen baptism (no the syndin‐awa oʼ the filth oʼ the flesh, but the speirin oʼ a gude conscience toward God) throwe the Risin‐again oʼ Jesus Christ.

²² Wha is at Godʼs richt haun, haein passed intil the heevens; Angels, and authorities, and pooers, bein made obedient to him.