1 Peter 2 - New Testament in Braid Scots 1904 (William Wye Smith)

CHAPTIR TWA. The weel‐waled Corner‐Stane. The duties oʼ aʼ conditions oʼ folk — weel performed, whan Christ is weel followʼt.

¹ Sae, pittin by aʼ malice, and aʼ twafauldness, and aʼ pretence, and aʼ miscaʼin,

² As bairns new‐born, be ye fain to crave the aefauld milk oʼ reason, that sae ye may grow intil salvation;

³ Gif sae ye hae tastit for yersels that the Lord is fuʼ oʼ mercie.

⁴ To wham comin — a leevin stane, by men cuisten aside, but waled‐oot by God, and hauden in honor —

⁵ Ye yersels, as leevin stanes, are biggit intil a spiritual hoose, to be holie priests, to offer up spiritual sacrifeeces, weel‐pleasin tae God, throwe Jesus Christ.

⁶ For it is containʼd iʼ Scriptur, “See, I lay in Zion a heid corner‐stane, chosen, and hauden in honor, and wha lippens on him sal in naegate be putten to shame.”

⁷ To you, than, is this honor; you wha lippen: but to sic as believe‐na — “The stane they that biggit wadna hae, the same was made a heid corner‐stane!”

⁸ But, “a stumblin‐stane and a rock oʼ offence” to them that stoiter, bein disobedient to the word; until whilk they war appointit.

⁹ But ye are “a waled‐oot race, priests oʼ royalty, a holie people”; a folk for his ain possession, that ye may tell oot the glories oʼ him wha bade ye oot oʼ darkness to come into his wunnerfuʼ licht.

¹⁰ Wha at ae time war “nae‐nation,” but are noo a “Godʼs nation”; wha hadna been haein mercy, but hae obteened mercy e‐noo.

¹¹ Beloved, I entreat ye, as lodgers and pilgrims, keep ye frae carnal desires, sic as tak‐the‐field again the saul:

¹² Conductin yersels wiʼ honor amang the Gentiles; sae that whan they speak again ye as ill‐doers, they may, seein yere gude warks, glorify God in the day oʼ his comin amang them.

¹³ Obey‐ye aʼ human ordinances, for the Lordʼs sake; gin it be to a Sovereign, as ower aʼ,

¹⁴ Or to Governors, as by him set, for punishin ill‐doers, but for praise oʼ them that do weel.

¹⁵ For sae is Godʼs wull, that wiʼ weel‐doin ye soud pit to silence the ignorance oʼ glaikit men:

¹⁶ As free, and yet no haudin yere freedom for a cloak oʼ malice; but as servants oʼ God.

¹⁷ To aʼ men gie honor; loʼe ye the britherhood; revere ye God; honor ye the Sovereign!

¹⁸ Servants, gie‐in to yere maisters, wiʼ aʼ respecʼ; and no alane to the gude and cannie, but to the thrawart as weel.

¹⁹ For this is till his praise, gif, on accoont oʼ conscience afore God, ane drees dool; sufferin wrangously.

²⁰ For whatna credit win ye, gin ye be cloured for yere ill‐deeds, that ye soud thole it? But, doin weel, and dreein ill, this is praise‐wordie wiʼ God.

²¹ For to siclike war ye caʼd: for Christ sufferʼt in yere behauf, leaʼin ahint a paittern, that ye micht follow his fitstaps:

²² “Wha did nae sin; nor was deceit fund in his mooth”;

²³ Wha, whan miscaʼd, miscaʼd‐na again; sufferin, he banned‐na: but gied himsel ower to him wha judges justly.

²⁴ Wha his ain sel bure oor sins in his ain body tae the tree; sae that we, haein deeʼt to sin, micht leeve to holiness: “by whase clours ye war healed.”

²⁵ For ye war like sheep, forwanderin; but are noo came hame to the Shepherd and Guide oʼ yere sauls.