1 Peter 1 - New Testament in Braid Scots 1904 (William Wye Smith)

CHAPTIR ANE. The Lord Jesus cam, as was testifyʼt oʼ auld: sae, follow efter holiness, and be like him!

¹ Peter, an Apostle oʼ Jesus Christ, to the chosen anes wha bide in Pontus, Galacia, Cappadocia, Asia and Bithynia,

² Conform to the foreknowledge oʼ God the Faither, in sanctification oʼ the Spirit, to obedience and strinklin oʼ the blude oʼ Jesus Christ; lovin‐favor and peace till ye be increasʼd!

³ Blessʼt be the God and Faither oʼ oor Lord Jesus Christ, wha, conform to his great mercy, has regeneratit us intil a leevin hope, throwe Jesus Christʼs Risin‐again, frae ʼmang the deid,

⁴ To a heritage uncorrupt, and pure, and unfadin, keepit iʼ the heevens for you,

⁵ Wha are preserved by Godʼs pooer, by faith, to a salvation staunin ready for a revealin iʼ the last time.

⁶ In whilk ye rejoice; thoʼ for a wee, e‐noo, gin need be, ye are made wae wiʼ a hantle oʼ trials,

⁷ In order that the testin oʼ yere faith (muckle mair precious than oʼ gowd that perishes!), eʼen thoʼ throwe fire it is testit, soud be to praise, and glorie, and honor, whan revealʼt by Jesus Christ.

⁸ Wham, no haein seen, ye loʼe; in wham, thoʼ no seein e‐noo, yet wiʼ faith ye are rejoicin wiʼ unspeakable joy, filled wiʼ glorie:

⁹ Obteenin the end oʼ yere faith, the salvation oʼ yere sauls.

¹⁰ Anent whilk salvation, the prophets socht oot and searchʼt oot, wha prophesyʼt oʼ the lovin‐favor that soud come to you.

¹¹ Seekin to ken as to what, or whatna mainner oʼ time, the Spirit oʼ Christ was giean them kennin oʼ, whan bearin witness aforehaun oʼ the sufferans oʼ Christ, and the glories eftir.

¹² Till wham it was made kent, that no to theirsels, but to you they war bringin them; whilk things e‐noo are reportit to ye throwe thae wha deliverʼt the Blythe‐Message to ye, iʼ the Holie Spirit sent doon frae heeven; intil whilk things the Angels wad fain obteen a narer view.

¹³ Sae, girdin up the loins oʼ yere endeavour, keepin douce, zealously airt ye yere hope to the lovin‐favor to be brocht to ye, at oor clear vision oʼ Jesus Christ.

¹⁴ As bairns oʼ obedience, no conformin yersels to the auld desires iʼ yere ignorance;

¹⁵ But eʼen as he wha bade ye is holie, do ye yersels be holie in aʼ mainner oʼ leevin;

¹⁶ Inasmuckle as it is putten‐doon, “Holie sal ye be, for I am holie!”

¹⁷ And gin ye caʼ on him, wha wiʼ nae respecʼ oʼ faces, judges conform to aneʼs ain wark, wiʼ aʼ reverence for the time oʼ yere bidin here, leeve ye.

¹⁸ Kennin weel that it wasna wiʼ perishin things like siller and gowd, ye war ransomed oot oʼ yere vain life, frae yere forebears handit doon,

¹⁹ But wiʼ maist precious blude (as oʼ a lamb wantin blemish or spot), oʼ Ane Anointit;

²⁰ Kent aforehaun; indeed, afore the foundin oʼ the warld, but made plain iʼ the last day for yere sakes,

²¹ Wha throwe him are leal toward God, wha raisʼt him up frae ʼmang the deid, and gied him glorie, sae that yere faith and hope are turned towards God.

²² Haein made yere sauls clean, iʼ the obeyin oʼ the truth oot oʼ the heart wiʼ leal and britherly love, loʼe ye ane‐anither fondly.

²³ Haein been born again, no oʼ corruptible seed, but incorruptible, throwe the leevin and abidin love oʼ God.

²⁴ Forasmuckle as “aʼ flesh is gerss, and aʼ its glorie as the blume oʼ gerss: the gerss birsles‐up, and the flourishin oʼt faʼs awa:

²⁵ “But the sayin oʼ the Lord bides for aye!” And this is the message that by the Glad‐tidins is deliverʼt tʼye.