1 John 5 - New Testament in Braid Scots 1904 (William Wye Smith)

CHAPTIR FYVE. Hoo ane is born again: and hoo it is seen and kent.

¹ Whasae believes that Christ is the Anointit, is begotten oʼ God; and ilka ane that loʼes him that begat, loʼes him as weel that is begotten oʼ him.

² By this we ken that we loʼe Godʼs bairns, when we loʼe God, and are keepin his commauns:

³ For this is the love oʼ God, that we soud keep his commauns; and his commauns are na burden.

⁴ For aʼ that is born oʼ God owercomes the world; and this is the victory that overcam the warld, eʼen oor faith.

⁵ And wha is he that owercomes the warld, but he that believes Jesus is Godʼs Son?

⁶ This is he wha came baith by watir and blude, Jesus Christ; no in watir alane; but by the watir and by the blude.

⁷ And it is the Spirit that is bearin witness, for the Spirit is truth.

⁸ For thar are thrie that are giean witness, the Spirit, and the watir, and the blude; and the thrie are for the ae thing.

⁹ Gin we accept the witness oʼ men, the witness oʼ God is mair; for this is the witness oʼ God, that he has witnessed anent his Son.

¹⁰ He wha hauds to the Son oʼ God has the witness in himsel; he wha lippens‐na God, has made him oot fause; for he hasna pitten faith iʼ the witness God has witnessed enent his Son.

¹¹ And here is the witness: that God has giftit us wiʼ eternal life, and this life is in his Son.

¹² Wha has the Son has the life; and wha hasna the Son oʼ God hasna the life.

¹³ Thir things I wrate to ye that ye micht ken ye hae eternal life; to you wha are pittin faith iʼ the name oʼ the Son oʼ God.

¹⁴ And this is the freedom oʼ speech that we hae toward him; that, gin onything we be askin, conform to his wull, he hearkens to us.

¹⁵ And, gif we ken he hearkens to us, whatna thing we may be askin frae him, we ken that we hae the askins that we askit oʼ him.

¹⁶ Gin aiblins ony ane soud see his brither sinnin a sin no to death, he sal ask, and he wull gie him life, for thae sinnin no to death. Thar is a sin to death: no anent that am I sayin that he soud mak request.

¹⁷ Aʼ wickedness is sin, and thar is sin no to death.

¹⁸ We ken that nae ane begotten oʼ God is sinnin; but anent him wha was begotten oʼ God — he keeps him, and yon Ill‐ane disna touch him.

¹⁹ We ken that we are oʼ God, and the hail warld is in the airms oʼ the Ill‐ane.

²⁰ But we ken the Son oʼ God has come, and has gien us an inward sicht, that we may comprehend the True Ane; and we are in the True Ane; in his Son Jesus Christ. This is the true God, and, and life‐for‐aye.

²¹ Dear bairns! gaird yersels frae eidols!