1 John 4 - New Testament in Braid Scots 1904 (William Wye Smith)

CHAPTIR FOWR. We arena to lippen ilka spirit, but to follow true spirits. Hoo to ken siclike.

¹ Weel‐loeʼd anes! lippen‐ye‐na aʼ spirits, but try the spirits, gin they be oʼ God! for mony fause‐prophets are gane oot intil the warld.

² Hereby ken ye the spirit oʼ God: ilka spirit that owns Jesus Christ, as haein come iʼ the flesh, is oʼ God;

³ And ilka spirit that owns‐na Jesus, is noʼ oʼ God. And this is the spirit oʼ antichrist that ye heard oʼ as comin; and eʼen noo is it iʼ the warld.

⁴ Ye are oʼ God, dear bairns, and hae owercome them; for greater is he that is in you than he that is in the warld.

⁵ Thir are oʼ the warld; and sae they speak oʼ the warld, and the warld hearkens to them.

⁶ We are oʼ God! He that kens God, hearkens to us; and he that isna oʼ God hearkens‐na till us: and sae we ken the spirit oʼ truth and the spirit oʼ error.

⁷ Beloved, lat us loʼe ane anither; for love is oʼ God; and ilk ane that loʼes is begotten oʼ God, and kens God.

⁸ He that loʼes‐na, neʼer kent God: for God is love.

⁹ And sae was made to be seen the love oʼ God in us, that God sent oot his only‐begotten Son into the warld, that we micht leeve throwe him.

¹⁰ In this is love — no that we loʼed God, but that he loʼed us, and sent oot his Son, a coverin‐ower for oor sins.

¹¹ Beloved! gin God sae loʼed us, we too soud loʼe ane anither,

¹² Nae ane has at any time seen God; gin we be loʼein ane anither God bides in us, and his love has been made perfete in us.

¹³ And thus we ken that we bide in him, and he bides in us, on account oʼ his Spirit he has gien us.

¹⁴ And we hae seen him, and gie witness that the father has sent oot the Son, as the Saviour oʼ the warld.

¹⁵ Whasae may own that Jesus is the Son oʼ God, God bides in him, and he abides in God.

¹⁶ And we hae come to ken and to believe the love that God has to us. God is love; and he wha bides in love, bides in God, and God bides in him.

¹⁷ Herein is love perfetit in us, that we may hae freedom oʼ speech iʼ the day oʼ judgment, in that, eʼen as he is, sae are we iʼ this warld.

¹⁸ Fear bides‐na in love; nay, perfete love casts oot fear; for fear has misery, and wha fears isna made perfete in love.

¹⁹ We loʼe, for that he first loʼed us.

²⁰ Gin aiblins any ane soud say, “I loʼe God!” and is hatin his brither, he is a leear; for he that loʼes‐na his brither wham he has seen, hoo can he be loʼein God wham he hasna seen?

²¹ And this commaun hae we frae him, that he wha loʼes God is to be loʼein his brither as weel.