1 John 3 - New Testament in Braid Scots 1904 (William Wye Smith)

CHAPTIR THRIE. Godʼs bairns to ʼgree thegither — loʼe ane anither — and loʼe God maist oʼ aʼ.

¹ Look, whatna love the Faither has bestown on us, that we soud be caʼd “Godʼs Bairns”; and we are! And that the warld kens‐us‐na; for it kent‐him‐na!

² Beloved, noo are we bairns oʼ God; and it hasna yet been seen what we sal be. But we ken that gin he sal be seen, we sal be like him; for we sal see him; conform to what he is.

³ And ilka ane haein this hope in him, maks his sel pure, eʼen as Christ is pure.

⁴ Ilk ane that dis sin brecks ower the law; for sin is a breckin ower the law,

⁵ And ye are aware that he was made kent, that he micht tak awa oor sins; and in him sin isna!

⁶ Nae ane bidin in him sins; nae ane sinnin has seen him nor comprehendit him.

⁷ Dear bairns! lat nae ane beguile ye! He that dis richtousness he is richtous, eʼen as Christ is richtous.

⁸ He that dis sin is oʼ Sautan; for Sautan sins frae the first. And for this end was the Son oʼ God made kent, that he micht whammle ower the warks oʼ Sautan.

⁹ Nae ane begotten oʼ God gangs on in sin; for his seed in him abides; and he canna gang on in sin, for he is begotten oʼ God.

¹⁰ In siclike is made kent the bairns oʼ God, and the bairns oʼ Sautan. Nae ane that disna do richtousness is oʼ God, naither he that loeʼs‐na his brither.

¹¹ For this is the message ye heard frae the first: that we soud loʼe ane anither:

¹² No like Cain, wha was oʼ the Ill‐ane, and slew his brither. And for why did he slay him? For that his warks war ill, and his britherʼs richtous.

¹³ Brethren, ferlie‐na gin the warld hate ye.

¹⁴ We oorsels ken we hae stappit ower frae death intil life, for that we loʼe the brethren. He that loeʼs‐na bides still in death.

¹⁵ Ilka ane that hates his brither is a blude‐shedder; and we ken that nae blude‐shedder has evir‐durin life bidin in him.

¹⁶ Hereby hae we come to ken love, in that Christ on our behauf laid doon his life; and we soud, in behauf oʼ the brethren to pawn oor lives.

¹⁷ But whasae has this warldʼs gear, and sees his brither in need, and steeks oot his tender affections awa frae him, hoo dwalls Godʼs ain love in him?

¹⁸ Dear bairns! lat us no loʼe alane in words; nor wiʼ the tongue, but in warks and in truth!

¹⁹ And in this sal we come to ken that we oorsels are oʼ the truth, and sal mak blythe oor hearts afore him.

²⁰ Whan oor hearts wyte us, God is aboon oor hearts, and kens aʼ things.

²¹ Beloved, gin aiblins oor heart wytes‐us‐na, we hae freedom oʼ speech toward God;

²² And whatna things we may be seekin, we are obteenin frae him; for his commauns we are keepin, and the things pleasin in his sicht we are doin.

²³ And this is his commaun, that we soud hae faith iʼ the name oʼ his Son Jesus Christ, and be loeʼin ane anither; conform to the commaun he gied us.

²⁴ And he that keeps his commauns, in Christ abides, and he in him! And thus we ken that he abides in us, throwe the Spirit he has gien us.