1 John 1 - New Testament in Braid Scots 1904 (William Wye Smith)

CHAPTIR ANE. Christ the Life, and Christ the Licht, oʼ men.

¹ That whilk was frae the first oʼ aʼ, that whilk we hae heard, that whilk we hae seen wiʼ oor een, that whilk we for oorsels hae gazed upon, and oor hauns war laid on, oʼ the Word oʼ Life, —

² And the Life was made kent to us, and we hae seen, and gie witness, and report to you the evir‐durin Life, whilk was wiʼ the Faither, and was made kent to us.

³ That whilk we hae oorsels seen and heard, we report to you, that ye too as weel may hae marrowin wiʼ us; and oor marrowin is wiʼ the Faither, and wiʼ his Son Jesus Christ.

⁴ And we write thir things, that oor joy may be filled fuʼ.

⁵ And this is what we hae heard oʼ him, and gie to you, that God is licht, and mirkness isna in him: nane ava!

⁶ Gin aiblins we soud say, “We hae marrowin wiʼ him,” and are gaun on iʼ the mirk, we are leears, and divna the truth.

⁷ But gin aiblins we are gaun on iʼ the licht, as he is in the licht, we marrow ane wiʼ anither, and the blude oʼ Jesus his Son maks us clean frae aʼ sin.

⁸ Gin aiblins we soud say, “Sin hae we nane,” we deceive oorsels, and the truth bides‐na in us.

⁹ Gin aiblins we confess oor sins, leal and gude is he to forgie oor sins, and mak us pure frae ilk unrichtous deed.

¹⁰ Gin aiblins we soud say, “We hae‐na sinned,” we are makin him fause, and his word isna in us.