1 Corinthians 7 - New Testament in Braid Scots 1904 (William Wye Smith)

CHAPTIR SEEVEN. Husbands and wives. Makin use oʼ the warld, but no booin doon tillʼt.

¹ But, anent what ye wrate to me: It is gude for a man no to be bund to a wumman.

² Yet, because oʼ uncleanness, lat ilk man hae his ain wife, and ilk wumman her ain man.

³ Lat the husband render to the wife what is due; and in siclike mainner, the wife as weel, to the husband.

⁴ The wife hasna authoritie ower her ain body, but the husband; and in siclike mainner the husband hasna authoritie ower his ain body, but the wife.

⁵ Defraud‐ye‐na ane the ither, unless aiblins it may be for a wee, by consent, that ye may hae mair time for prayer: and forgather again, lest Sautin tempt ye wiʼ incontinence.

⁶ This, hoobeit, I am saying by permission, and no oʼ commandment.

⁷ I coud wuss a man to be like mysel; but ilka ane has his ain gift frae God; ane this, and anither that.

⁸ Nane‐the‐less, say I to the unmarryʼt and to weedows: Weel for them gin aiblins they bide eʼen as I am.

⁹ But, gin they haena continency, lat them mairry: for better isʼt to mairry than to be ower fain.

¹⁰ To the mairryʼt hoobeit, I gie chairge — yet no I, but the Lord — that a wife gang‐na awa frae her husband.

¹¹ But gin aiblins she eʼen be sinderʼt, lat her bide unmairryʼt, or else be reconcilʼt to her husband; and lat‐na a husband pit awa a wife.

¹² And to the lave say I (no the Lord), Gin a brither hae a wife, and she believes‐na, and gin she hersel is weel‐pleased to dwell wiʼ him — lat him no send her awa.

¹³ And a wife wha has a husband that believes‐na, gin he his sel is weel‐pleased to dwall wiʼ her — lat her no lea her husband!

¹⁴ For the misbelievin husband is sanctifyʼt in the wife, and the misbelievin wife is sanctifyʼt in the husband: itherways, as the case is, yere bairns war unclean; but noo are they holie.

¹⁵ Hoobeit, gin the misbelievin husband is unyoking his sel, lat him be unyokin his sel! the brither or the sister hasna come into bondage in sic like: but God has enjoined upon us peace.

¹⁶ For hoo ken ye, O wife! but ye may save yere husband? Or hoo ken ye, O husband! but you may save yere wife?

¹⁷ But whether sae, ilk ane, as the Lord has portioned oot to him, ilk ane as God has fund him and caʼd him, sae lat him be walkin; and sae enjoin I in aʼ the kirks.

¹⁸ Haein been circumceesed whan ane was caʼd, lat him no be uncircumceesed. In uncircumceesion was ony ane caʼd? Lat him no become circumceesed!

¹⁹ Circumcession is naething, and uncircumceesion is naething: but the keepin oʼ Godʼs commandments is aʼ?-?thing.

²⁰ Ilk ane, in the mainner oʼ life in whilk he was caʼd, sae abide.

²¹ A thirlman war ye whan caʼd? Lat it no fash ye! but gin ye hae choice to be free, tak it.

²² For he that in the Lord was caʼd, whan a thirlman, is emancipate iʼ the Lord; in siclike, he wha was caʼd as a free man, is a bondman in the Lord.

²³ Ye war coft wiʼ a price: become‐na servants oʼ men.

²⁴ Lat ilk ane, in that state in whilk he was caʼd, abide wiʼ God.

²⁵ But, anent thae that are maidens, I hae nae commauns oʼ the Lord; but I gie ye my mind, as ane that has had mercie frae the Lord to be true and leal.

²⁶ This than, I wad say is seemlie iʼ the case, by stress of existin things, that it is weel for a man sae to be.

²⁷ Hae ye become bund to a wife? Seek‐na to be lowsed. Are ye lowsed frae a wife? Seek‐na a wife.

²⁸ But gin ye eʼen mairry, ye hae?-?na sinned: and gin a maiden mairry, she hasna sinned. Nane‐the‐less, sic wull hae tossins‐aboot iʼ the flesh. But I spare ye.

²⁹ But eʼen this say I, brethren; the time is wearin dune; lat them wiʼ wives be as gin they had nane;

³⁰ And them greetin, as gin they grat‐na; and them rejoicin, as gin they rejoiced‐na; and them buyin, as gin they obteenʼd‐na;

³¹ And them usin the warld, as no bund‐up inʼt; for the form oʼ this warld is passin awa.

³² Moreover, I wad ye war free frae carkin care. The man no mairryʼt is tentie aboot the Lordʼs things, hoo he may pleasur the Lord;

³³ Whauras, the man mairryʼt, is tentie aboot his wifeʼs maitters, hoo he may pleasur his wife, and sae is dividit.

³⁴ And thar is a differ atween a wife and a maiden: she that is no mairryʼt, is tentie aboot the Lordʼs things, sae as she may be holie in body and spirit; whaur‐as she that is mairryʼt is tentie anent the warldʼs things, hoo she may pleasur her husband.

³⁵ This speak I, wiʼ an ee to yere ain gude; no that I wad cast a snare ower ye; but wiʼ an ee to what is seemly, and that ye may wait on the Lord untrammlʼt.

³⁶ But gin ony man thinks he disna weel by his maiden, gin she pass the flooer oʼ her age, and need be, lat him do as he wad; he isna committin sin; lat them wed.

³⁷ Nane‐the‐less, he that stauns siccar in his heart, no bein under necessity, but has pooer as anent his ain wull; and has made it up in his ain heart to keep his maiden, dis weel.

³⁸ Sae, baith he wha gies in mairriage his ain maiden dochter dis weel; and he wha disna gie in mairriage dis eʼen better.

³⁹ A wife is bund as lang as her husband leeves; but gin aiblins her husband is faun asleep, she is free to mairry wham she wull: only in the Lord.

⁴⁰ But happier, gin she thus abide, in my judgment; and mair, I think I hae the Spirit oʼ God.