1 Corinthians 3 - New Testament in Braid Scots 1904 (William Wye Smith)

CHAPTIR THRIE. Paul and Apollos. The temple oʼ God no to be defilʼt.

¹ And I, brethren, could only speak to ye as men oʼ flesh, as bairns in Christ; and no as to spiritual men.

² Wiʼ milk I fed ye, and no wiʼ meat; for ye war‐na yet able forʼt: nay! eʼen yet ye are‐na able!

³ For ye are yet fleshly; for whaur thar are amang ye jealousy and strife, are‐ye‐na fleshly, and gaun‐on as men?

⁴ For whan ane says, “I, in sooth, am oʼ Paul!” but anither, “I am oʼ Apollos!” are ye no fleshly men?

⁵ Wha, than, is Apollos? and wha is Paul? Juist servants, throwe wham ye believʼt: eʼen as the Maister gied to ilk ane.

⁶ I plantit, Apollos watirʼt; but God maks to growe.

⁷ Sae, than, naither he that plants is onything, nor he that watirs, but God that maks to growe.

⁸ And he that plants, and he that watirs, are baith ane: hoobeit, ilk ane sal hae his ain reward, eʼen as his labour sal be.

⁹ For we are Godʼs fellow‐workers; and ye are Godʼs mailin, Godʼs biggin.

¹⁰ Eʼen as the favor oʼ God was gien me, as a wyss biggin‐maister I lay a fundation, and anither biggs onʼt. But lat ilk ane tak tent hoo he biggs tharon!

¹¹ For ocht ither fundation nane can lay but that whilk is laid, that is Jesus Christ.

¹² But gin ony ane is up‐biggin on the fundation, wiʼ gowd, siller, precious gems, wud, gerss, stibble —

¹³ Ilk aneʼs wark wull be made plain; for the day wull set it forth: and the lowe wull try ilk aneʼs wark, oʼ whatna sort it is.

¹⁴ Gin ony aneʼs wark whilk he has biggit tharon stauns, he sal hae his meed:

¹⁵ Gin ony aneʼs wark sal be brunt up, he sal hae skaith; hoobeit, he his sel sal be savʼt; yet as throwe the fire.

¹⁶ Ken‐ye‐na that ye are a temple oʼ God, and Godʼs Spirit is dwallin in ye?

¹⁷ Gin ony man destroy Godʼs temple, him wull God destroy; for the temple oʼ God is holie; whilk in sooth are ye.

¹⁸ Lat nae ane delude his sel: gin ony ane thinks he is wyss amang ye iʼ this warld, lat him become witless, in order that he may become wyss.

¹⁹ For the wisdom oʼ this warld is daftness wiʼ God. For it is putten‐doon, “He snares the wyss wiʼ their ain pawkiness.”

²⁰ And ance mair: “The Lord taks tent oʼ the reasonins oʼ the wyss, that they are havers.”

²¹ Sae, lat nane boast oʼ men; for aʼ things are yere ain,

²² Gin aiblins it be Paul, or Apollos, or Peter, or the warld, or life, or death, or things wiʼ us, or things to be — aʼ are yere ain;

²³ But ye are Christʼs: but Christ is Godʼs.