1 Corinthians 2 - New Testament in Braid Scots 1904 (William Wye Smith)

CHAPTIR TWA. Salvation disna come wiʼ the knowledge oʼ man. The nateral man and the spiritual man.

¹ And I, whan I cam to ye, brethren, cam‐na iʼ the way oʼ speech or wisdom that excelled, bringin to ye Godʼs testimonie.

² For I set doon my fit to ken naething amang ye, but Jesus Christ, and him as ane that had been crucifyʼt.

³ And I cam, in fecklessness and shrinking, and wiʼ muckle fear, to be wiʼ ye;

⁴ And my speech and my message warna wiʼ wheedlin words oʼ the wyss, but in demonstration oʼ spirit and pooer.

⁵ Sae that yere faith need‐na staun in menʼs wisdom, but in Godʼs pooer.

⁶ Wisdom, nane‐the‐less, we speak — amang experienced anes: wisdom hoobeit, no oʼ this warld, nor oʼ the great men oʼ this warld — wha are to be aʼ putten‐by;

⁷ But we speak Godʼs wisdom in a riddle, the knowledge that had been keepit hidlins, whilk God designed aforehaun, afore aʼ time, for oor glorie,

⁸ That no ane oʼ the great anes oʼ this warld has come to ken; for had they come to ken, they wadna iʼ that case hae crucifyʼt the Lord oʼ Glorie!

⁹ But, eʼen as it is putten doon, “What‐na things the ee saw‐na, and the ear heard‐na, and manʼs heart conceivʼt‐na — sae mony things has God prepared for thae that loʼe him!”

¹⁰ To us, nane‐the‐less, has God revealʼt them, by the Spirit; for the spirit kens aʼ things, eʼen the deep things oʼ God.

¹¹ For wha oʼ men kens manʼs things, but manʼs spirit that is in him? Sae, nane kens the things oʼ God, but Godʼs Spirit.

¹² But we gat, no the warldʼs spirit, but the Spirit that is oʼ God, sae as we soud ken the things God gies to us by his favor;

¹³ Whilk things eke we speak, no in man‐taught words oʼ lear; but in words spirit‐taught to spiritual men, spiritual things exponin.

¹⁴ But a man oʼ flesh taks‐na in the things oʼ Godʼs Spirit; for they are daftness to him, and he canna get to ken them, for that they are to be spiritually redd oot.

¹⁵ But the spiritual man speirs oot aʼ things; but he his sel is speirʼt oot by nane.

¹⁶ For wha cam to ken the Lordʼs mind, that he micht gie him lear? But we haʼe Christʼs mind.