1 Corinthians 16 - New Testament in Braid Scots 1904 (William Wye Smith)

CHAPTIR SAXTEEN. Siller for the puir saunts. A wheen pairtin words and salutations.

¹ Noo, anent the siller for the saunts, eʼen as I gae orders to the Kirks oʼ Galatia, sae eʼen do ye.

² On the first day oʼ the week, lat ilk ane oʼ ye lay‐by by himsel, gaitherin up, whatsoeʼer he may be prosperʼt wiʼ; least, whan I come, collections may be still gaun on.

³ But, whan I come, whaeʼer ye may appruve, them wull I send wiʼ letters, to cairry yere bounty to Jerusalem.

⁴ And, gin it be needfuʼ that I gang as weel, they sal gang wiʼ me

⁵ And I wull come to ye, at siclike time as I gang throwe Macedonia: for I div gang throwe Macedonia.

⁶ And wiʼ you, aiblins, I may stop, or eʼen winter; and ye sal set me forrit on my journey.

⁷ For I divna desire to see ye e‐noo, juist in passin; for I am in hope to stop a gey while wiʼ ye, gin the Lord wull.

⁸ But I wull stop in Ephesus till Pentecost;

⁹ For a door has been unsteekit for me, great and effectual; and thar are a hantle adversaries.

¹⁰ But gin Timothy come, see ye that he may be wiʼye withoot dreid; for, eʼen as I, he is workin the Lordʼs wark.

¹¹ Lat nae ane lichtlie him; but set him forrit in peace, sae as he may come to me; for I am lookin for him wiʼ the brethren.

¹² Anent oor brither Apollos: I entreatit him muckle that he wad gang to ye wiʼ the brethren, but his mind wasna to gang noo; but he wull gang whan he sal hae fit opportunity.

¹³ Tak tent: haud ye fast iʼ the faith; be ye men; be sterk.

¹⁴ Lat aʼ things be carryʼt on in love.

¹⁵ And I entreat ye, brethren — ye ken the hoose oʼ Stephanus, a first‐frute oʼ Greece, and that they hae set theirsels to a service oʼ the saunts —

¹⁶ That ye submit yersels to siclike as thae, and to ilk ane that is helpin in the wark, and toilin.

¹⁷ But I am blythe ower the comin oʼ Stephanus and Fortunatus and Achaicus; for they made up for yere want.

¹⁸ For they gied rest to my spirit and yours. Be ye, than, ownin sic as thae.

¹⁹ The Kirks oʼ Asia salute ye. Aquila and Prisca, wiʼ the meetin in their hoose, salute ye muckle in the Lord.

²⁰ Aʼ the brethren salute ye. Salute ye ane anither wiʼ a sacred kiss.

²¹ The salutation oʼ me, Paul, wiʼ my ain haun.

²² Gin ony ane loeʼs‐na the Lord, lat him be accursed; Maran‐atha!

²³ The tender love oʼ the Lord Jesus be wiʼye.

²⁴ My love be wiʼye aʼ, in Christ Jesus.