1 Corinthians 12 - New Testament in Braid Scots 1904 (William Wye Smith)

CHAPTIR TWALʼ. A hantle mair oʼ the Corinthians had gifts than kent weel hoo to use them. Weʼre aʼ pairts oʼ ae body.

¹ Noo, anent the “spiritual,” brethren, I wadna hae ye iʼ the mirk.

² Ye weel ken that whan ye war Gentiles, ye war led to their dumb eidols, hoosoeʼer ye micht be airtit.

³ And sae, I gie ye to ken that nane, speakin wiʼ Godʼs Spirit, maks oot Jesus to be accurst; and that nae ane can mak oot Jesus to be Lord, but wiʼ the Holie Spirit.

⁴ But braidlie‐scatterʼt gifts thar are, yet the ae Spirit:

⁵ And braidlie‐scatterʼt service, yet the ae Lord:

⁶ And braid‐scatterin oʼ inward wark thar is; and aye the ae God, wha works inwardly aʼ things in aʼ men.

⁷ But to ilk ane is gien this schawin‐forth oʼ the Spirit, to work whateʼer is best.

⁸ For to ane is gien indeed throwe the Spirit, a word oʼ inner wisdom; to anither, the word oʼ ootward knowledge, by the same Spirit.

⁹ To anither, faith, by the ae Spirit, but to anither gifts for healin by the same Spirit.

¹⁰ To anither ane, wunner‐warks and pooers; to anither, speakin for God; to anither, discernin oʼ spirits; to anither, mony tongues; but to anither, interpretin oʼ tongues.

¹¹ But aʼ thir dae that ae and the self‐same Spirit work inwardly, giean oot to ilk ane, allenarlie eʼen as he wull.

¹² For eʼen as the body is ane, and has a hantle oʼ members, but aʼ the members oʼ the body, mony as they may be, are ae body, sae eʼen in Christ.

¹³ For in ae Spirit, are we aʼ in ae body bapteezʼt, aither Jews or Greeks, aither bond or free; and war made to aʼ drink oʼ ae Spirit.

¹⁴ For the body isna ae member, but mony.

¹⁵ Gin aiblins the fit soud say, “For that I am‐na the haun, I am‐na oʼ the body,” isʼt than no oʼ the body?

¹⁶ And gin aiblins the lug soud say, “For that I am‐na an ee, I am‐na oʼ the body,” isʼt than no oʼ the body?

¹⁷ Gin the hail oʼ the body war ee, whaur the hearin? or gin the hail hearin, whaur the smellin?

¹⁸ But noo, God plantit the members, ilk oʼ them, iʼ the body, juist as he pleased.

¹⁹ Gin hoobeit, aʼ had been ae member, whaur the body?

²⁰ Whaur‐as, noo, a hantle oʼ members — yet indeed but ae body.

²¹ Forby, the ee canna say to the haun, “I hae nae need oʼ you!” nor yet the heid to the feet, “I hae nae need oʼ you!”

²² But, on the contrar, muckle mair the members oʼ the body, seemin maist feckless, are needfuʼ;

²³ And the pairts oʼ the body we may deem to be wantin in honor, we pit on the mair honor; and oor less favorʼt pairts we busk the mair.

²⁴ Whaur‐as, oor weel‐faurʼd pairts are no in want. But God has mouldit the body weel; giean mair tender care to the pairt that was wantin.

²⁵ That thar soud be nae sedition in the body; but the members hae like care ane ower anither.

²⁶ And gin ae member dree ill, aʼ the members dree wiʼt; or gin ae member be magnifyʼt, aʼ the members are blythe wiʼ it.

²⁷ Noo, ye are Christʼs body; and allenarlie, members:

²⁸ Wham, indeed, God plantit iʼ the Kirk; first oʼ aʼ Apostles; second, prophets; third, teachers; helpers; airtins; kinds oʼ tongues.

²⁹ Are aʼ Apostles? aʼ prophets? aʼ teachers? aʼ workers oʼ ferlies?

³⁰ Hae aʼ healin? Div aʼ speak wiʼ tongues? Div aʼ interpret?

³¹ But desire ye the chief gifts: and noo I airt ye till a better gate forʼt.