1 Corinthians 11 - New Testament in Braid Scots 1904 (William Wye Smith)

CHAPTIR ELEEVEN. Men and weemen iʼ the worship oʼ the kirk. The Lordʼs Supper.

¹ Be ye like me, eʼen as I follow Christ.

² I gie ye praise that in aʼ things ye hae mind oʼ me; and eʼen as I gied to ye the precepts, ye are haudin them siccar.

³ But I wad hae ye ken that the heid oʼ ilka man is Christ; and the heid oʼ a wumman is the man; and the heid oʼ Christ is God.

⁴ Ony man prayin or preachin, haein ocht on his head, pits his heid under shame;

⁵ But a wumman, prayin or preachin wiʼ her heid unveilʼt, pits her heid to shame: for it is as gin she had been shaven.

⁶ For gin a wumman disna cover hersel, lat her hair eke be shorn. But gin it be shamefuʼ in a wumman to be shorn or shaven, lat her be coverʼt.

⁷ For a man soudna cover his heid, inasmuckle as he is Godʼs image and glorie; but the wumman is manʼs glorie.

⁸ For the man is no oʼ the wumman, but the wumman oʼ the man.

⁹ For naither was man made for the sake oʼ the wumman, but wumman for the sake oʼ the man.

¹⁰ For sae soud the wumman wear this permission on her heid; conscious oʼ the Angels.

¹¹ Hoobeit, naither is the man wantin the wumman, nor the wumman wantin the man, in the Lord.

¹² For eʼen as the wumman is oʼ the man, sae is the man throwe the wumman: but aʼ things are oʼ God.

¹³ Think for yere ain sels:— Isʼt seemly for a wumman, uncoverʼt, to be prayin to God?

¹⁴ Disna eʼen natur tell ye, that a man, gin aiblins he has lang hair, it is a discredit to him?

¹⁵ Whaur‐as, a wumman, gin aiblins she hae lang hair, it is a glorie to her? For the lang hair has been gien to her for a coverin.

¹⁶ Gin, hoobeit, ony ane thinks to be contrar, nae sic custom as this hae we, nor yet the kirks oʼ God!

¹⁷ But I gie ye this chairge, no to praise ye ava; for that ye are‐na comin thegither for the better, but for the waur.

¹⁸ For to begin: thoʼ ye div indeed come thegither iʼ the kirk, I am tellʼt that factions amang ye are springing up; and I somewhat believe it.

¹⁹ For pairties amang ye thar maun be; that they that are acceptit amang ye may be schawn.

²⁰ And sae, though ye come thegither intil ae place, it isna to eat the Lordʼs Supper:

²¹ For ilk ane has his ain supper afore eatin; and sae ane is hungʼry, and anither is steghʼt

²² What? hae‐ye‐na hooses to eat and drink in? Or, div ye belittle Godʼs kirk, and shame thae that hae nocht? What am I to say tʼye? Am I to compliment ye? I compliment‐ye‐na!

²³ For I had frae the Lord what I eʼen tellʼt to you, that the Lord Jesus, that nicht in whilk he was betrayʼt, took a laif;

²⁴ And giean thanks, brak it, and said, “This is my body that is gien for you; this do, in memory oʼ me.”

²⁵ And in like mainner the cup too, eftir the takinʼ oʼ supper, sayin, “This cup is the New Covenant in my blude: this div ye, eʼen as aft as ye may drink oʼt, for the remembrance oʼ me.”

²⁶ For, sae aften as ye may be eatin this laif, and drinkin this cup, ye are setting forth the death oʼ the Lord, till whatna time he may come.

²⁷ Sae, whasoeʼer may be eatin the laif, or drinkin the cup oʼ the Lord, in an unwordie way, sal be hauden for the body and the bluid oʼ the Lord.

²⁸ But lat a man pit his sel to the test; and in sic mainner lat him eat oʼ the laif, and drink oʼ the cup.

²⁹ For he that is eatin and drinkin, is eatin and drinkin condemnation to himsel, gin he be‐na consecratin the body.

³⁰ And sae thar are amang ye, a hantle weak and pinin, and a gude wheen faʼin asleep.

³¹ Gin, hoobeit, we had been consecrating oorsels, we wadna iʼ that case hae been comin aneath condemnation.

³² But, bein brocht aneath judgment by the Lord, we are chastenʼt, that we soudna be condemned wiʼ the warld.

³³ And sae ye, my brethren, whan ye come thegither to eat, wait ye ane for anither.

³⁴ Gin ony man hungʼer, lat him eat at hame, least ye but come thegither for condemnation: and for the lave oʼt, whan I come, I wull set aʼ in order.