1 Corinthians 10 - New Testament in Braid Scots 1904 (William Wye Smith)

CHAPTIR TEN. We maun tak tent oʼ the Jewsʼ errors, and no do the like: and walk close wiʼ God.

¹ For I wadna hae ye unkennin, brethren, hoo oor forebears war aʼ aneath the clud, and aʼ gaed throwe the sea;

² And war aʼ bapteezʼt intil Moses iʼ the clud and iʼ the sea.

³ And aʼ did eat like spiritual breid;

⁴ And aʼ did drink like spiritual drink; for they drank oot oʼ a spiritual rock that followʼt them: the Rock, natheless, was Christ.

⁵ Hoobeit wiʼ mony oʼ them was God ill‐pleased: and he dang them ower iʼ the wilderness.

⁶ Noo in thir things they becam lessons to us, that we soudna glaum at ill things, as eke they glaumʼd.

⁷ Nor worship eidols, as some oʼ them: juist as it is putten doon, “The folk sut doon to eat and drink, and raise up to mak sport.”

⁸ Naither lat us do uncleanness, as some oʼ them did uncleanness, and fell in ae day thrie‐and‐twenty thoosand.

⁹ Naither lat us tempt the Lord, eʼen as some oʼ them tempit, and perishʼt wiʼ the serpents.

¹⁰ Naither lat us yammer, as some oʼ them yammerʼt, and perishʼt wiʼ the destroyer.

¹¹ But thir things cam to them for examples. And they war puttin‐doon for oor warnin, to wham the hinner‐end oʼ time has come.

¹² Sae, lat him wha thinks he stauns, tak tent that he faʼ‐na!

¹³ Nae trial has come to ye but a human ane; and God is leal and true, and winna lat ye be tryʼt aboon what ye are fit to thole; but wull mak wiʼ the trial a gate oʼ escape, that ye may be able to haud oot.

¹⁴ Whaur‐for, my loved anes, flee frae eidol‐worship!

¹⁵ As to discernin men I speak; judge ye what I am sayin.

¹⁶ The cup oʼ blessin, we bless, isʼt‐na the sharin oʼ the blude oʼ Christ? The laif that we brek, isʼt‐na the sharin oʼ the body oʼ Christ?

¹⁷ Seein that we, thoʼ mony, are aʼ ae laif — ae body; for we aʼ oʼ the ae laif partak.

¹⁸ Look again at Israʼl accordin to the flesh: are‐na they wha eat the sacrifeeces sharin wiʼ the altar?

¹⁹ Yet am I sayin that an eidol‐sacrifeece is onything? or that an eidol is onything?

²⁰ On the contrar: “What things the nations sacrifeece, to the demons do they sacrifeece, and no to God!” and I wadna hae ye to become marrows wiʼ demons.

²¹ Ye canna be drinkin the Lordʼs cup, and demonsʼ cup; ye canna be sharers oʼ the Lordʼs table, and demonsʼ table.

²² Wad ye provoke the Lord to jealousie? Are we sterker than he?

²³ Aʼ things are allooʼt, but aʼ things are‐na for profit: aʼ things are allooʼt, but aʼ things strengthen‐na.

²⁴ Lat nae ane be seekin allenarlie eftir his ain things; but that whilk is his neeborʼs.

²⁵ Whatsaeʼer is sellʼt iʼ the merkits, eat; speirin‐nane on behauf oʼ conscience.

²⁶ “For the hail yirth is the Lordʼs, and aʼ its ootcome!”

²⁷ Gin ony oʼ the misbelievin bid ye, and ye think to gang, eat whateʼer is set afore ye, speirin‐nane on behauf oʼ conscience.

²⁸ But gin aiblins ane say tʼye, “This is a holie sacrifeece!” eat‐na, for the sake oʼ him wha said sae, and for conscience sake;

²⁹ “Conscience,” say I; no yere ain, but the itherʼs. For hoo soud my liberty be evened by anither manʼs conscience?

³⁰ Gin I gratefully am partakin, why am I to be spoken again anent that whilk I am giean thanks ower?

³¹ Sae, gin ye be eatin, or drinkin, or doin ocht, be doin aʼ to the glorie oʼ God!

³² Be ye free frae offence, baith to Jews and to Greeks, and to the Kirk oʼ God.

³³ Accordin as I too am pleasin aʼ men; no lookin for my ain gain, but the gain oʼ the mony, that they may be savʼt.