Secunnu Matteu 9 - Rut la Cantica di li Cantici e Matteu 1861 (volgarizzato in dialetto siciliano)

¹ E acchianannu ntra la varca, passau a l’ autra ripa, ed arrivau ntra la so citati.

² Ed eccu ca cci presentaru un paraliticu curcatu ntra lu lettu. E vidennu Gesù la fidi d’ iddi, dissi a lu paraliticu: Figghiu, abbi fidi, li toi piccati ti sunnu pirdunati.

³ Ed eccu alcuni di li Scribi dissiru ntra d’ iddi: Chistu bestemia.

⁴ Ma Gesù avennu vistu li soi pinseri, dissi: Ora pirchì pinsati a lu mali ntra li vostri cori?

⁵ Chi è cchiù facili di diri: Li toi piccati ti sunnu pirdunati: o puru: Susiti, e camina?

⁶ Ora acciocchì sapissivu, ca lu Figghiu di l’ omu avi ’n terra la potestà di pirdunari li piccati, dissi a lu paraliticu: Susiti, pigghiati lu to lettu, e vattinni a la to casa.

⁷ E si susiu, e si nni jiu a la so casa.

⁸ Li turbi poi vidennu chistu appiru timuri, e glorificaru a Diu, ca avia datu sta potestà a l’ omini.

⁹ E comu passau cchiù ddà Gesù, vitti un omu assittatu ntra un vancu, chiamatu Matteu. E cci dissi: Seguimi. E chiddu susennusi lu seguiu.

¹⁰ E successi, ca essennu iddu assittatu a tavula ntra la casa, eccu ca multi pubblicani e piccaturi vinniru, e s’ assittaru a tavula cu Gesù, e cu li soi discipuli.

¹¹ E vidennu chistu li Farisei, dicevanu a li soi discipuli: Pirchì lu vostru Maistru mancia cu li pubblicani e cu li piccaturi?

¹² E Gesù sintennulu, dissi: Lu medicu nun servi pri chiddi, chi sù boni, ma pri chiddi, chi sù malati.

¹³ Jennuvinni perciò sappiati chiddu chi è: Vogghiu misiricordia, e no sagrifiziu. Pirchì nun sugnu vinutu pri chiamari li giusti, ma li piccaturi.

¹⁴ Allura si cci accustaru li discipuli di Giuvanni, dicennu: Pirchì nui, e li Farisei, dijunamu spissu: e li toi discipuli nun dijunanu?

¹⁵ E Gesù cci dissi: Ponnu forsi chiddi di lu zitaggiu chianciri, quannu lu spusu è cu iddi? Veni poi lu jornu, ca lu spusu cci sarrà livatu: ed allura dijunirrannu.

¹⁶ Ora nuddu arripezza un vistitu usatu cu pannu novu: giacchì cci leva la so forza, e lu sfarduni si fa cchiù granni.

¹⁷ Nè si metti lu vinu novu ntra l’ utri vecchi: vasinnò si rumpinu l’ utri, e lu vinu si jetta, e l’ utri si perdinu. Ma lu vinu novu si metti ntra l’ utri novi, e tutti dui si cunservanu.

¹⁸ E mentri cci diceva sti cosi, eccu unu di li capi s’ avvicinau, e l’ adorau, dicennu: Signuri, me figghia muriu ora ora: ma veni, metti la to manu supra d’ idda, e campirrà.

¹⁹ E Gesù susennusi, lu siquitau cu li soi discipuli.

²⁰ Ed eccu na fimmina, chi patia di flussu di sangu da dudici anni, si cci avvicinau di darreri, e cci tuccau la fauda di la vesta.

²¹ Giacchì dicia ntra se stissa: Si cci arrivu a tuccari sulamenti la vesti, sarrò sanata.

²² E Gesù vutannusi, e vidennula, dissi: Abbi fidi, o figghia, la to fidi ti salvau. E da ddu momentu la fimmina fu liberata.

²³ E quannu Gesù arrivau ntra la casa di lu capu, e vitti li sunaturi di flautu, e la turba, chi faceva baraunna, diceva.

²⁴ Ritirativi: giacchì la picciotta nun è morta, ma dormi. E chiddi lu trizziavanu.

²⁵ E comu la turba fu cacciata, trasiu, la pigghiau pri la manu; e la picciotta si susiu.

²⁶ E la fama di chistu si spargiu pri tuttu ddu paisi.

²⁷ E di poi passannu Gesù, lu siquitaru dui orvi, gridannu, e dicennu: Abbi pietà di nui, o figghiu di Davidi.

²⁸ Essennu arrivatu a la casa, l’ orvi s’ avvicinaru ad iddu. E Gesù cci dissi: Criditi, ca chistu vi lu pozzu fari? E cci rispusiru: Certu, Signuri.

²⁹ Allura cci tuccau l’ occhi, dicennu: Sia fattu a vuautri secunnu la vostra fidi.

³⁰ E l’ occhi di chiddi si graperu: e Gesù l’ amminazzau, dicennu: Nun fazza, ca alcunu lu sapissi.

³¹ Iddi però niscennu, nni spargeru la fama pri tuttu ddu paisi.

³² E comu chisti nisceru, eccu cci fu presentatu un mutu, ca era spirdatu.

³³ E scacciatu lu diavulu, lu mutu parrau, e li turbi si maravigghiaru, dicennu: Mai si vitti na cosa simili in Isdraeli.

³⁴ Però li Farisei dicevanu: Caccia li diavuli pri mezzu di lu principi di li dimonj.

³⁵ E firriava Gesù tutti li citati, e li casteddi, nsignannu ntra li soi sinagoghi, e pridicannu lu vancelu di lu regnu, e curannu ogni infirmità, ed ogni malatia.

³⁶ Vidennu però li turbi, appi pietati d’ iddi: giacchì eranu stanchi, e jettati comu li pecuri, chi nun hannu pasturi.

³⁷ Allura dissi a li soi discipuli: La messi è granni, l’ operarj però sunnu picca.

³⁸ Prigati perciò a lu patruni di la raccolta, acciocchì mannassi l’ operarj pri la so messi.