Secunnu Matteu 8 - Rut la Cantica di li Cantici e Matteu 1861 (volgarizzato in dialetto siciliano)

¹ Essennu poi scisu di lu munti, lu seguianu multi turbi:

² Ed eccu chi vinni un libbrusu, e l’ adorau, dicennu: Signuri, si voi, mi poi sanari.

³ E stinnennu Gesù la manu, lu tuccau, dicennucci: Ti vogghiu munnari. E subitu fu munnata la so lebbra.

⁴ E Gesù cci dissi: Guarda, nun lu dirrai a nuddu: ma va, mustrati a lu sacerdoti, ed offricci l’ offerta, chi ordinau Mosè, in ricanuscenza ad iddi.

⁵ Ora comu trasiu a Cafarnau, cci ncugnau un Centuriuni, prigannulu,

⁶ E dicennu: Signuri, lu me garzuni è curcatu in casa paraliticu, ed è turmintatu da li duluri.

⁷ E Gesù cci dissi: Iu vinirrò, e lu curirrò.

⁸ E lu Centuriuni rispunnennu, cci dissi: Signuri, nun sugnu dignu, chi trasissi ntra lu me tettu: ma sulamenti dici una palora, e lu me garzuni sarrà sanatu.

⁹ Giacchì iu nun sugnu chi un omu suggettu, avennu sutta di mia surdati, e dicu a chistu: Va, ed iddu va: a chiddu, Veni, ed iddu veni: ed a lu me servu, Fa chistu, ed iddu lu fa.

¹⁰ E Gesù avennulu ntisu, si maravigghiau, e dissi a chiddi, chi lu siquitavanu: Vi dicu in virità, tanta fidi nun l’ aju truvatu in Isdraeli.

¹¹ Ora vi dicu, ca multi vinirrannu d’ orienti, e d’ occidenti, e s’ assittirrannu cu Abramu, ed Isaccu, e Giacobbi ntra lu regnu di li celi:

¹² E li figghi di lu regnu sarrannu discacciati ntra li tenebri di fora: ddà cci sarrà chiantu, e zurrichiu di denti.

¹³ E Gesù cci dissi a lu Centuriuni: Va, e comu lu cridisti, accussì sarrà fattu. E lu garzuni fu sanatu ntra chidda ura.

¹⁴ Poi essennu trasutu Gesù ntra la casa di Petru, vitti a so soggira curcata cu la frevi:

¹⁵ E cci tuccau la manu, e la frevi la lassau, e si livau, e li serviu.

¹⁶ Ora doppu vespiri, cci purtaru multi, ca eranu spirdati: e cu la palora cacciau li spiriti: e tutti chiddi, chi eranu malati li sanau:

¹⁷ Acciocchì s’ adimpissi chiddu, chi fu dittu da lu profeta Isaia, dicennu: Iddu si pigghiau li nostri nfirmitati: e si misi ncoddu li nostri malatii.

¹⁸ Ora Gesù vidennusi intornu multi turbi, cumannau, chi si passassi a l’ autra ripa.

¹⁹ Ed avvicinannusi un scriba, cci dissi: Maistru, ti seguirrò, in qualunqui locu irrai.

²⁰ E Gesù cci dissi: Li vulpi hannu li tani, l’ oceddi di lu celu hannu li nidi: ma lu Figghiu di l’ omu nun avi, unni pusari la so testa.

²¹ Poi un autru di li soi discipuli cci dissi: Signuri, permettimi prima di iri a sepelliri a me patri.

²² Gesu però cci dissi: Veni appressu a mia, e lassa, chi li morti sepellissiru li soi morti.

²³ Ed essennu acchianatu ntra la varca, li soi discipuli lu siquitaru:

²⁴ Ed eccu un gran muvimentu, chi si fici ntra lu mari, in modu chi la varca era cummigghiata da l’ unni: iddu però durmia.

²⁵ E li soi discipuli si cci accustaru, e l’ arrispigghiaru, dicennucci: Signuri, salvanni, ca nn’ annigamu.

²⁶ E Gesù cci dissi: Pirchì vi scantati, genti di poca fidi? Allura susennusi, cumannau a li venti ed a lu mari, e si fici gran bunazza.

²⁷ Perciò la genti si maravigghiau, dicennu: Cu’ è chistu, ca lu mari e li venti l’ obbediscinu?

²⁸ E comu arrivau a l’ autra ripa ntra lu paisi di li Geraseni, cci vinniru ncontru dui spirdati, chi niscianu di li monumenti, feroci assai, di modu ca nuddu puteva passari pri dda via.

²⁹ Ed eccu ca gridaru, dicennu: Chi cc’ è ntra nui, e tia, Gesù figghiu di Diu? Vinisti ccà pri turmintarinni avanti lu tempu?

³⁰ Ora cc’ era nun luntanu da iddi una mandra di tanti porci, chi pascevanu.

³¹ E li dimonj lu prigavanu, dicennucci: Si nni cacci di ccà, mannanni ntra dda mandra di porci.

³² E cci dissi: Vaiti. Ed iddi niscennu traseru ntra li porci, ed eccu ca tutta dda mandra di porci cu impetu si pricipitau ntra lu mari: e mureru ntra l’ acqui.

³³ E li mandrari fujeru: e jennu a la citati, raccuntaru tutti sti cosi, e di chiddi chi, avevanu li dimonj.

³⁴ Ed eccu ca tutta la citati nisciu a ncuntrari a Gesù: ed avennulu vistu lu prigaru di irisinni da li soi confini.