Secunnu Matteu 6 - Rut la Cantica di li Cantici e Matteu 1861 (volgarizzato in dialetto siciliano)

¹ Guardativi di fari la vostra giustizia in presenza di l’ omini, pri essiri da iddi taliati: vasinnò nun n’ avirriti premiu pressu vostru Patri, ca è ntra li celi.

² Quannu dunca fai la limosina, nun sunari la trumma avanti a tia, comu l’ ippocriti ntra li sinagoghi, e ntra li strati, acciocchì fussiru glorificati da l’ omini: in virità vi dicu, chisti hannu già ricivutu lu so premiu.

³ Quannu tu fai la limosina, chi la tua manu manca nun sapissi zoccu fa la to manu dritta:

⁴ Acciocchì la tua limosina sia ammucciuni, e lu to Patri, chi vidi in segretu, ti lu ricompensirrà.

⁵ E quannu prigati, nun farriti comu l’ ippocriti, chi cci piaci di prigari stannu ntra li sinagoghi e ntra li cantuneri di li chiazzi, acciocchì fussiru visti di l’ omini: in virità vi dicu, chisti hannu ricivutu lu so premiu.

⁶ Tu però, quannu fai orazioni, trasi ntra la to cammara, e chiusa la porta, prega a to Patri ammucciuni: e to Patri, ca vidi in segretu, ti lu ricompensirrà.

⁷ Quannu poi prigati, nun faciti tanti chiacchiari, comu li pagani. Pirchì cridinu d’ essiri esauditi pri li troppu palori.

⁸ Perciò nun v’ assimigghiati ad iddi. Giacchì vostru Patri sa chiddu, chi aviti di bisognu, prima ca cci lu dimannassivu.

⁹ Accussì dunca vui prighirriti: Patri nostru, chi stai in celu: sia santificatu lu to nomu.

¹⁰ Vegna a nui lu to regnu. Sia fatta la to volontà, comu ’n celu, accussì ’n terra.

¹¹ Danni oggi lu nostru pani quotidianu.

¹² E rimetti a nui li nostri debiti, comu nui li rimettemu a li nostri debituri.

¹³ E nun nni fari cadiri in tentazioni. Ma liberanni d’ ogni mali. Accussì sia.

¹⁴ Giacchì si pirdunirriti a l’ omini li soi piccati: lu vostru Patri celesti pirdunirrà anchi a vui li vostri delitti.

¹⁵ Si però nun pirdunirriti a l’ omini: mancu vostru Patri pirdunirrà a vui li vostri piccati.

¹⁶ Quannu poi dijunati, nun vi faciti malinconici, cumu l’ ippocriti. Giacchì iddi si straformanu la facci, pri fari a vidiri a l’ omini, ca dijunanu. Vi dicu in virità, ca chisti hannu ricivutu lu so premiu.

¹⁷ Tu però, quannu dijuni, untati la testa, e lavati la facci,

¹⁸ Acciocchì tu nun lu facissi vidiri a l’ omini, ca fai lu dijunu, ma a to Patri, chi è nascostu: e to Patri, chi è nascostu, ti darrà lu to premiu.

¹⁹ Nun accumulati tesori in terra: unni la ruggini, e la camula guastanu: ed unni li latri scavanu, ed arrobbanu.

²⁰ Accumulativi però tesori ntra lu celu: unni nè la ruggini, nè la camula guastanu, ed unni li latri nè scavanu, nè arrobbanu.

²¹ Pirchì unni è lu to tesoru, ddà puru è lu to cori.

²² Lu to occhiu è la lucerna di lu to corpu. Si lu to occhiu è puru: tuttu lu to corpu sarrà lucenti.

²³ Si però lu to occhiu sarrà tintu: tuttu lu to corpu sarrà tenebrusu. Si dunca la luci, ca è in tia, è tenebri: quantu sarannu li tenebri stissi?

²⁴ Nuddu pò serviri a dui patruni: pirchì o odiirrà l’ unu, ed amirrà l’ autru: ovveru sarrà affezionatu a l’ unu, e disprizzirrà l’ autru. Nun putiti serviri a Diu, e a li ricchizzi.

²⁵ Perciò vi dicu, nun vi curati troppu di zoccu manciati pri la vostra vita, nè di comu cuprirriti lu vostru corpu. Nun è la vita cchiù di lu cibu, e lu corpu cchiù di lu vistimentu?

²⁶ Guardati l’ oceddi di lu celu, li quali nun seminanu, nè metinu, nè arricogghinu ntra lu granaru: e lu vostru Patri celesti li nutrisci. Nun siti vuautri assai cchiù d’ iddi?

²⁷ Cu’ è di vuautri, chi pinsa, ca pò agghiunciri a la so statura un cubitu?

²⁸ E pirchì vi dati premura di li vistimenti? Guardati li gigghi di lu campu comu criscinu: nun travagghianu, nè filanu.

²⁹ Perciò vi dicu, ca mancu Salamuni in tuttu lu so splenduri è vistutu comu unu d’ iddi.

³⁰ Si però lu fenu di lu campu, ca oggi è mpedi, e dumani si metti ntra lu furnu, Iddiu lu vesti accussì: quantu cchiù a vuautri genti di poca fidi?

³¹ Perciò nun vi dati tantu pinseri, dicennu: Zoccu mancirremu, o zoccu vivirremu, o di chi nni vistirremu?

³² Tutti sti cosi dumannanu li gentili. Però lu vostru Patri lu sapi, ca vuautri aviti bisognu di tutti sti cosi.

³³ Perciò dumannati prima lu regnu di Diu e la so giustizia: e tutti chisti cosi vi sarrannu supragghiunti.

³⁴ Nun vi pigghiati addunca pinseri di lu ndumani. Pirchì lu ndumani pigghirrà cura di se stissu. Basta ad ogni jornu lu so mali.