Secunnu Matteu 4 - Rut la Cantica di li Cantici e Matteu 1861 (volgarizzato in dialetto siciliano)

¹ Allura Gesù fu purtatu ntra lu disertu da lu Spiritu, pirchì fussi tentatu da lu diavulu.

² Ed avennu dijunatu quaranta jorna, e quaranta notti, a la fini appi fami.

³ E accustannusi lu tentaturi cci dissi: Si sì figghiu di Diu, dici, ca sti petri divintassiru pani.

⁴ Ed iddu rispunnennu dissi: È scrittu: L’ omu nun campa di sulu pani, ma di ogni palora, chi veni di la vucca di Diu.

⁵ Allura lu diavulu si lu purtau ntra la città santa, e lu pusau supra la cima di lu tempiu,

⁶ E cci dissi: Si sì figghiu di Diu, jettati ddà jusu. Giacchì sta scrittu: Ca ti mannirrà li soi ancili, e ti pigghirrannu ntra li vrazza, acciocchì lu to pedi nun si nfruntassi cu li petri.

⁷ Gesù cci dissi: È scrittu puru: Nun tentirrai lu Signuri Diu to.

⁸ Doppu lu diavulu si lu purtau supra na muntagna auta assai: e cci mustrau tutti li regni di lu munnu, e la so gloria,

⁹ E cci dissi: Ti darrò tutti sti cosi, si nginucchiannuti m’ adurirrai.

¹⁰ Allura Gesù cci dissi: Vattinni, Satanassu: giacchì è scrittu: Adurirrai lu Signuri Diu to, e servirrai ad iddu sulu.

¹¹ Allura lu diavulu lu lassau: ed eccu l’ ancili vinniru, e lu servianu.

¹² Però comu ntisi Gesù, ca Giuvanni era ’n prigiuni, si nni jiu in Galilia:

¹³ E lassata la città di Nazaret, jiu ad abitari in Cafarnau maritima, ntra li confini di Zabulon, e Neftalim:

¹⁴ Acciocchì si fussi adimputu chiddu, chi fu dittu da Isaia profeta:

¹⁵ La terra di Zabulon, e la terra di Neftalim, caminu di lu mari passatu lu Giurdanu, la Galilia di li nazioni,

¹⁶ Populu, chi stava ntra li tenebri, vitti na luci magna: e stannu in locu di tenebri e di morti, spuntau la luci pri iddi.

¹⁷ Dipoi Gesù cuminciau a pridicari, e a diri: Faciti pinitenza: giacchì s’ avvicina lu regnu di li celi.

¹⁸ Caminannu poi Gesù vicinu lu mari di Galilia, vitti dui frati, Simuni, chi si dici Petru, ed Andria so frati, chi jittavanu li riti ntra lu mari (pirchì eranu piscaturi),

¹⁹ E cci dissi: Viniti appressu di mia, e vi farrò addivintari piscaturi d’ omini.

²⁰ Ma iddi subitu, lassati li riti, l’ accumpagnaru.

²¹ E siquitannu a caminari, vitti dui autri frati, Japicu di Zebedeu, e Giuvanni so frati, ntra na varca cu Zebedeu so patri, chi aggiustavanu li soi riti: e li chiamau.

²² Iddi allura subitu, lassati li riti e so patri, cci jeru d’ appressu.

²³ E Gesù firriava tutta la Galilia, nsignannu ntra li soi sinagoghi, e pridicannu lu vancelu di lu regnu, e sanannu ogni malatia, ed ogni nfirmità ntra lu populu.

²⁴ E si spargiu la so fama in tutta la Siria, e cci purtaru tutti li malati, e tutti chiddi, chi avevanu nfirmitati e duluri, e chiddi, chi eranu spirdati, e li lunatici, e li paralitici, e li sanau:

²⁵ E lu seguevanu turbi di populu di la Galilia, di la Decapoli, di Gerusalemmi, di la Giudia, e di addabbanna lu Giurdanu.