Secunnu Matteu 3 - Rut la Cantica di li Cantici e Matteu 1861 (volgarizzato in dialetto siciliano)

¹ A ddu tempu vinni Giuvanni Battista pridicannu ntra lu disertu di Giudia,

² Dicennu: Faciti pinitenza: giacchì s’ avvicina lu regnu di li celi.

³ Chistu è chiddu, chi fu annunziatu da Isaia profeta dicennu: Una vuci grida ntra lu disertu: Preparati la via di lu Signuri: nchianati li soi camini.

⁴ Giuvanni poi aveva una vesti di pilu di gamiddu, e na cintura di peddi attornu li rini: lu so cibu poi era di griddi, e meli sarvaggiu.

⁵ Allura java a ncuntrarlu Gerusalemmi, e tutta la Giudia, e tuttu lu paisi a sta banna di lu Giurdanu;

⁶ Ed eranu vattiati da iddu ntra lu Giurdanu, cunfissannu li soi piccati.

⁷ Vidennu intantu multi Farisei, e Sadducei, chi vinianu a lu so battisimu, cci dissi: Razza di vipari, cui vi nsignau a fuiri l’ ira futura?

⁸ Perciò faciti dignu fruttu di pinitenza.

⁹ E nun diciti ntra vuautri: Nui semu figghi d’ Abramu. Vi dicu dunca, chi Diu avi la potenza di fari risurgiri di sti petri li figghi d’ Abramu.

¹⁰ E già l’ accetta è misa vicinu a la radici di l’ arvulu. Perciò ogni arvulu, chi nun fa bonu fruttu, si tagghirrà, e si jittirrà ntra lu focu.

¹¹ Iu perciò vi battizzu ntra l’ acqua in pinitenzà: però cui vinirrà doppu di mia, è cchiù forti di mia, di cui nun sugnu dignu di purtari li scarpi: iddu vi battizzirrà cu lu Spiritu santu, e lu focu.

¹² Avi la pala ntra la manu: annittirrà lu so furnu: arricugghirrà lu so furmentu ntra lu granaru; ma brucirrà la pagghia cu focu inestinguibili.

¹³ Allura Gesù da Galilia jiu da Giuvanni a lu Giurdanu, pri essiri vattiatu da iddu.

¹⁴ Giuvanni però cci lu nigava, dicennu: Iu da tia divu essiri vattiatu, e tu veni unni mia?

¹⁵ Ma Gesù rispunnennu, cci dissi: Lassa pri ora: giacchì cunveni, chi nui adimpissimu tutta la giustizia. Allura lu lassau fari.

¹⁶ Doppu chi fu battizzatu Gesù, subitu nisciu di l’ acqua. Ed eccu chi si apreru li celi: e vitti lu Spiritu di Diu, chi calau comu na palumma, e pusau supra d’ iddu.

¹⁷ Ed eccu na vuci di lu celu dicennu: Chistu è lu me figghiu dilettu, in cui mi sugnu cumpiaciutu.