Secunnu Matteu 28 - Rut la Cantica di li Cantici e Matteu 1861 (volgarizzato in dialetto siciliano)

¹ Ma la sira di lu sabatu, ca spuntava lu primu jornu di la simana, vinniru Maria Maddalena, e l’ autra Maria, a visitari lu sepulcru.

² Ed eccu ca successi un gran terremotu. Giacchì l’ ancilu di lu Signuri scinniu di lu celu: e avvicinannusi rivutau la petra, e si cci assittau di supra:

³ E lu so aspettu era comu lu lampu, e la so vesti comu la nivi.

⁴ Pri la paura d’ iddu li guardii si spavintaru, ed addivintaru comu li morti.

⁵ L’ ancilu parrau, e dissi a li fimmini: Vuautri nun abbiati paura: giacchì sacciu, ca circati a Gesù crucifissn:

⁶ Nun è ccà: pirchì arrisuscitau, comu dissi. Viniti a vidiri lu locu, unni era misu lu Signuri.

⁷ E subitu jiti a diri a li soi discipuli, ca arrisuscitau: ed è già avanti a vuautri in Galilia: ddà lu vidirriti. Eccu ca vi l’ aju predittu.

⁸ E subitu si nni jeru di lu sepulcru cu timuri, e gaudiu granni, currennu a dari la nova a li soi discipuli.

⁹ Ed eccu Gesù, ca cci jiu ncontra, dicennu: Diu vi salvi. Ed iddi si cci accustaru, e cci strinceru li pedi, e l’ aduraru.

¹⁰ Allura cci dissi Gesù: Nun aviti paura. Iti ad avvisari li mei frati, ca jissiru in Galilia: ddà mi vidirrannu.

¹¹ Li quali essennusinni juti, eccu alcuni di li guardii jeru a la cità, e rappurtaru a li capi di li sacerdoti tuttu chiddu, chi avia successu.

¹² E juncennusi cu l’ anziani, e tinutu cunsigghiu, dettiru bona summa di dinaru a li surdati,

¹³ Dicennuci: Diciti: Li soi discipuli vinniru di notti, e si lu pigghiaru, mentri nui durmiamu.

¹⁴ E si lu guvernaturi vinissi a sapirlu, nui lu persuadirremu, e nun vi farremu fari nenti.

¹⁵ E chiddi, pigghiannusi li dinari, ficiru comu cci fu dittu. E si sparsi sta vuci ntra li Judei, sinu a lu jornu d’ oggi.

¹⁶ Ma l’ unnici discipuli si nni jeru in Galilia ntra la muntagna, chi cci avia disignatu Gesù.

¹⁷ E vidennulu l’ adoraru: ma alcuni nni dubbitaru.

¹⁸ E Gesù accustannusi cci parrau, dicennu: M’ è stata data ogni potestà in celu ed in terra.

¹⁹ Jiti addunca, istruiti tutti li genti: vattiannuli in nomu di lu Patri, e di lu Figghiu, e di lu Spiritu santu:

²⁰ Nsignannucci ad osservari tuttu chiddu, chi v’ aju ordinatu: ed eccu ca sugnu cu vuautri tutti li jorna, sinu a la cunsumazioni di li seculi.