Secunnu Matteu 27 - Rut la Cantica di li Cantici e Matteu 1861 (volgarizzato in dialetto siciliano)

¹ Quannu fici jornu, tutti li capi di li sacerdoti, e l’ anziani di lu populu tinniru cunsigghiu contra Gesù, pri mannarlu a morti.

² E lu purtaru attaccatu, e lu cunsignaru a lu guvernaturi Ponziu Pilatu.

³ Allura Giuda, ca l’ avia tradutu, vidennu, ca Gesù era cunnannatu; mossu da lu pintimentu restituiu li trenta dinari a li capi di li sacerdoti, e a l’ anziani,

⁴ Dicennu: Aju piccatu cu tradiri lu sangu innoccenti. Ma chiddi cci dissiru: Nui chi nn’ avemu a fari? Pensacci tu.

⁵ E jittannu la munita d’ argentu ntra lu tempiu, si nni jiu: e c’ un chiaccu si mpinniu.

⁶ Ma li capi di li sacerdoti, pigghiannusi li dinari, dissiru: Nun li putemu rimettiri ntra la cascia: giacchì sù prezzu di sangu.

⁷ E tinutu cunsigghiu, nn’ accattaru un tirrenu d’ un stazzunaru, pri farini na sepultura di forasteri.

⁸ Pri sta raggiuni ddu tirrenu si chiama sinu ad oggi, Haceldama, chi voli diri, campu di lu sangu.

⁹ Allura si verificau chiddu, chi fu predittu di Geremia profeta, ca dici: E si pigghiaru trenta dinari d’ argentu, comu prezzu di chiddu, chi fu accattatu pri prezzu di li figghi d’ Isdraeli:

¹⁰ E li mpiegaru pri un tirrenu di stazzunaru, comu m’ ordinau lu Signuri.

¹¹ Gesù poi fu presentatu avanti lu guvernaturi, ed iddu lu nterrogau, dicennu: Sì tu lu Re di li Judei? Gesù cci dissi: Tu lu dici.

¹² Ed essennu accusatu da li capi di li sacerdoti, e da l’ anziani, nun rispusi nenti.

¹³ Allura Pilatu cci dissi: Nun senti tutti sti testimonianzi contra di tia?

¹⁴ E nun rispusi nenti a ddi palori, di manerachì lu guvernaturi nni ristau fortementi maravigghiatu.

¹⁵ Ora era solitu lu guvernaturi di cuncediri a lu populu ntra un jornu di sollennità ddu carzaratu, ca avissiru dumannatu.

¹⁶ Ed iddu aveva allura un carzaratu famusu, chi si chiamava Barabba.

¹⁷ Ed essennu iddi ddà junciuti, Pilatu cci dissi: A cui vuliti, ca vi liberassi: a Barabba, o a Gesù, dittu Cristu?

¹⁸ Giacchì sapeva, ca pri invidia l’ avevanu arristatu.

¹⁹ E mentri iddu giudicava in tribunali, so mugghieri cci mannau a diri: Nun ti nni ncarricari di ddu giustu, giacchì oggi aju suffertu assai ntra lu sonnu pri causa sua.

²⁰ Ma li capi di li sacerdoti, e l’ anziani persuaderu lu populu a dumannari a Barabba, ed a fari muriri a Gesù.

²¹ E rispunnennu lu guvernaturi, cci dissi: Cui vuliti, ca vi cunsignassi di li dui? E rispusiru: Barabba.

²² E cci dissi Pilatu: Chi nni faroggiu dunca di Gesù, chiamatu Cristu?

²³ E tutti dissiru: Si crucifigissi. Lu guvernaturi cci dissi: Ma chi mali ha fattu? E chiddi cchiù assai gridavanu: Si crucifigissi.

²⁴ Vidennu però Pilatu, ca nenti giuvava, ma si faceva cchiù baraunna: pigghiannu l’ acqua, si lavau li manu avanti a lu populu, dicennu: Iu sugnu innoccenti di lu sangu di stu giustu: vi la vidirriti vuautri.

²⁵ E rispunnennu tuttu lu populu, dissi: Lu sangu d’ iddu supra di nui, e supra di li nostri figghi.

²⁶ Allura cci liberau a Barabba: e cci cunsignau a Gesù flagellatu pri crucifiggirlu.

²⁷ Allura li surdati di lu guvernaturi, avennu purtatu a Gesù ntra lu pretoriu, arricugghieru ntornu ad iddu tutta la coorti:

²⁸ Ed avennulu spugghiatu, cci misiru di supra un mantellu di sgarlatu,

²⁹ E ntrizzannu na curuna di spini, cci la misiru ’n testa, e na canna ntra la manu dritta. Ed addinucchiannusi avanti ad iddu, lu trizziavanu, dicennu: Ti salutamu, re di li Judei.

³⁰ E sputannucci ’n facci, pigghiaru la canna, e cci la sbattevanu ’n testa.

³¹ E doppu d’ avirlu trizziatu, e spugghiatu di lu mantellu, lu visteru cu li soi robbi, e lu purtaru a crucifiggiri.

³² E comu nisceru ncuntraru unu di Cireni, chiamatu Simuni: e lu custrinceru a purtari la cruci d’ iddu.

³³ E arrivaru a na parti, chiamata Golgota, ca significa locu di lu Calvariu.

³⁴ E cci dettiru a viviri vinu mmiscatu cu lu feli. Ed avennulu assaggiatu, nun nni vosi viviri.

³⁵ E doppu ca lu crucifiggeru, si sparteru li soi vistimenti, tirannuli a sorti: acciocchì si verificassi chiddu, chi fu dittu da lu profeta, chi dici: Si sparteru ntra d’ iddi li mei vistimenti, e si tiraru a sorti la me vesti.

³⁶ Ed essennusi assittati, cci facevanu la guardia.

³⁷ E cci misiru supra la testa lu scrittu di la so cunnanna: Chistu è Gesù Re di li Judei.

³⁸ Allura foru crucifissi cu iddu dui latruni, unu a la dritta, e nautru a la manca.

³⁹ E chiddi, chi passavanu, cci mannavanu jastimi tistiannucci,

⁴⁰ E cci dicevanu: O tu, ca sdirrubbi lu tempiu di Diu, e lu rifabbrichi ntra tri jorna, salvati tu stissu: Si sì figghiu di Diu, scinni di la cruci.

⁴¹ Comu puru li capi di li sacerdoti trizziannulu nsemmula cu li Scribi e l’ anziani, dicevanu:

⁴² Salvau a l’ autri, ma nun si potti salvari iddu stissu: si è lu re d’ Isdraeli, scinnissi ora di la cruci, e cci cridemu:

⁴³ Cunfidau cu Diu: lu liberassi ora, si voli: giacchì dissi: Sugnu figghiu di Diu.

⁴⁴ E lu stissu cci rimproveravanu li latruni, ca eranu crucifissi cu iddu.

⁴⁵ Ma da l’ ura sesta sinu a la nona cci foru tenebri pri tutta la terra.

⁴⁶ E versu l’ ura nona, Gesù esclamau cu na gran vuci dicennu: Eli, Eli, lamma sabacthani? ca significa: Diu miu, Diu miu, pirchì m’ abbannunasti?

⁴⁷ Ma certuni di chiddi, chi eranu ddà presenti, e chi lu sintianu, dicianu: Chistu chiama ad Elia.

⁴⁸ E subitu unu d’ iddi currennu pigghiau na sponza, l’ assuppau d’ acitu, e mittennula ’n cima a na canna, cci dava a viviri.

⁴⁹ L’ autri però dicianu: Aspetta, videmu, si vinissi Elia pri liberarlu.

⁵⁰ Gesù però sclamannu nautra vota cu na gran vuci, spirau.

⁵¹ Ed eccu ca lu velu di lu tempiu si sfardau in dui di supra sinu a sutta, e la terra trimau, e li petri si rumperu,

⁵² E li sepulturi s’ apreru: e tanti corpi di santi, ca durmevanu, risuscitaru.

⁵³ E niscennu di li sepulturi doppu ca iddu risuscitau, vinniru ntra la cità santa, ed accumpareru a tanti.

⁵⁴ Ma lu Centuriuni, e chiddi, chi cu iddu facevanu la guardia a Gesù, vistu lu terremotu e chiddu, chi succideva, appiru gran paura, e dicevanu: Veramenti Figghiu di Diu era chistu.

⁵⁵ Cc’ eranu puru ddà in luntananza tanti fimmini, ca eranu vinuti appressu a Gesù di la Galilia, e l’ avianu assistutu:

⁵⁶ Ntra li quali cc’ era Maria Maddalena, e Maria matri di Japicu, e di Giuseppi, e la matri di li figghi di Zebedeu.

⁵⁷ Ed essennusi fattu sira, vinni un certu omu riccu d’ Arimatia, chiamatu Giuseppi, ca era puru discipulu di Gesù.

⁵⁸ Iddu jiu a truvari a Pilatu, e cci dumannau lu corpu di Gesù. Allura Pilatu ordinau, ca lu corpu fussi rinnutu.

⁵⁹ E Giuseppi pigghiau lu corpu, e l’ ammugghiau ntra un linzolu nettu.

⁶⁰ E lu misi ntra la sua sepultura nova, c’ avia scavata ntra la rocca. Ed arruzzulau na gran petra supra la mbuccatura di la sepultura, e si ritirau.

⁶¹ Ed eranu ddà Maria Maddalena, e l’ autra Maria, assittati nfacci di la sepultura.

⁶² Lu jornu appressu, ca è chiddu doppu la Parascevi, si junceru li capi di li sacerdoti, e li Farisei unni Pilatu,

⁶³ E dissiru: Signuri, nn’ avemu arrigurdatu, ca ddu sedutturi dissi, mentri era vivu: Doppu tri jorna risuscitirrò.

⁶⁴ Ordina dunca, ca fussi guardata la sepultura sinu a lu terzu jornu: acciocchì nun avissiru a veniri li soi discipuli ad arrubbarlu, e dicissiru a lu populu: Arrisuscitau di li morti: e sarria st’ ultimu ngannu peju di lu primu.

⁶⁵ Pilatu cci dissi: Aviti li guardii, jiti, e guardatilu comu megghiu sapiti.

⁶⁶ E chiddi si nni jeru, crisceru li guardii a la sepultura, e misiru lu sigillu supra la petra.