Secunnu Matteu 26 - Rut la Cantica di li Cantici e Matteu 1861 (volgarizzato in dialetto siciliano)

¹ E successi, ca doppu ca Gesù finiu tutti sti discursi, dissi a li soi discipuli:

² Sapiti, ca doppu dui jorna è Pasqua, e ca lu Figghiu di l’ omu sarrà cunsignatu pri essiri crucifissu.

³ Allura si riuneru li capi di li sacerdoti, e l’ anziani di lu populu ntra l’ atriu di lu principi di li sacerdoti, chi si chiamava Caifassu:

⁴ E tinniru cunsigghiu pri catturari cu ngannu a Gesù, e farlu muriri.

⁵ Ma dicevanu: No di festa, acciocchì nun avissi a succediri tumultu ntra lu populu.

⁶ Ed essennu Gesù a Betania in casa di Simuni lu libbrusu,

⁷ Si cci avvicinau na fimmina tinennu un vasu d’ alabastru cu nguentu prizziusu, e lu spargiu supra la so testa, mentri era a tavula.

⁸ Vidennu chistu i discipuli, s’ indignaru, dicennu: E pirchì stu sfragu?

⁹ Giacchì s’ avria pututu chistu vinniri caru, e darisi a li poviri.

¹⁰ Ma Gesù sapennulu, cci dissi: Pirchì siddiati a sta fimmina? Giacchì ha fattu un’ opera bona pri mia.

¹¹ Pirchì avriti sempri li puvireddi cu vuautri: ma a mia nun m’ avriti sempri.

¹² Giacchì mittennu idda stu nguentu supra lu me corpu, lu fici comu pri sepellirimi.

¹³ In virità vi dicu, ca in qualunqui parti di lu munnu sarrà pridicatu stu vancelu, si dirrà puru chiddu, chi idda avrà fattu pri so memoria.

¹⁴ Allura jiu unu di li dudici, ca si chiamava Giuda Iscarioti, a truvari li capi di li sacerdoti:

¹⁵ E cci dissi: Chi mi vuliti dari, ca iu vi lu cunsignu ntra li manu? Ed iddi cci proposiru trenta muniti d’ argentu.

¹⁶ E d’ allura in poi circava l’ occasioni di tradirlu.

¹⁷ Ma lu primu jornu di l’ azzimi li discipuli jeru unni Gesù, dicennucci: Unni voi, ca t’ apparicchiassimu pri fari la Pasqua?

¹⁸ E Gesù rispusi: Jiti a la cità unni un tali, e diciticci: Lu Maistru dici: Lu me tempu s’ avvicina, farrò la Pasqua in casa tua cu li mei discipuli.

¹⁹ E li discipuli ficiru secunnu cci aveva ordinatu Gesù, e prepararu la Pasqua.

²⁰ Ed arrivata la sira, era assittatu a tavula cu li soi dudici discipuli.

²¹ E mentri iddi manciavanu, cci dissi: In virità vi dicu, ca unu di vuautri mi tradirrà.

²² Ed iddi afflitti summamenti, accuminzaru a diri ad unu ad unu: Sugnu forsi iu, o Signuri?

²³ Ed iddu rispusi, e dissi: Cui metti cu mia la manu ntra lu piattu, chistu mi tradirrà.

²⁴ Lu Figghiu di l’ omu certu si nn’ avi a jiri, comu è scrittu pri iddu: guai però a chidd’ omu, da cui lu Figghiu di l’ omu sarrà tradutu: sarria statu megghiu pri dd’ omu, chi nun fussi mai natu.

²⁵ E Giuda, ca lu tradiu rispunnennu, dissi: Forsi sugnu iu, Maistru? Cci dissi: Tu lu dicisti.

²⁶ E mentri iddi cenavanu, Gesù pigghiau lu pani, lu binidiciu, e lu rumpiu, e lu detti a li soi discipuli, e dissi: Pigghiati, e manciati: chistu è lu me corpu.

²⁷ E pigghiannu lu calici, rinniu grazii: e cci lu detti, dicennu: Viviti di chistu tutti.

²⁸ Giacchì chistu è lu sangu miu di lu novu tistamentu, lu quali sarrà spargiutu pri genti assai in rimissioni di li piccati.

²⁹ Ora iu vi dicu, ca nun vivirrò da ora ’n poi di stu fruttu di la viti, sinu a ddu jornu, ca lu vivirrò novu cu vuautri ntra lu regnu di lu Patri miu.

³⁰ E cantatu l’ innu, jeru a lu munti di l’ Olivitu.

³¹ Allura cci dici Gesù: Tutti vuautri patirriti scannalu pri causa mia, ntra sta notti. Giacchì è scrittu: Nsirtirrò lu pasturi, e si spirdirrannu li pecuri di la greggi.

³² Ma doppu chi risuscitirrò, vinirrò avanti di vuautri in Galilia.

³³ Ma Petru rispunnennu, cci dissi: E si tutti avrannu scannalu pri tia, iu certu nun sarrò scannaliatu.

³⁴ Gesù cci dissi: Ti dicu in virità, ca sta notti, prima ca lu gaddu cantassi, mi nighirrai tri voti.

³⁵ Petru cci dissi: Ancurchì iu duvissi muriri cu tia, nun ti nighirrò. E lu stissu dissiru tutti li discipuli.

³⁶ Allura Gesù jiu cu iddi ntra un locu chiamatu Getsemani, e dissi a li soi discipuli: Assittativi ccà, mentri iu vaju ddà a fari orazioni.

³⁷ E pigghiannusi cu iddu Petru, e li dui figghi di Zebedeu, accuminzau ad angustiarisi e ad esseri malinconicu.

³⁸ Allura cci dissi: La me anima è afflitta nsinu a la morti: ristativi ccà, e vigghiati cu mia.

³⁹ E avanzannusi tanticchia, si jittau facci pri terra, prigannu, e dicennu: Patri miu, si è possibili, si livassi d’ avanti a mia stu calici; ma però no comu vogghiu iu, ma comu voi tu.

⁴⁰ E jiu unni li soi discipuli, e li truvau durmennu, e dici a Petru: Accussì nun putistivu vigghiari cu mia un’ ura?

⁴¹ Vigilati, e prigati, ca nun trasissivu in tentazioni. Lu spiritu veramenti è prontu, ma la carni è debuli.

⁴² E si nni jiu pri la secunna vota, e prigau, dicennu: Patri miu, si nun pò stu calici passari senza chi mi lu vivissi, sia fatta la tua volontà.

⁴³ E turnau di novu, e li truvau durmennu: giacchì l’ occhi d’ iddi eranu aggravati.

⁴⁴ Ed avennuli lassatu, si nni jiu di novu, e prigau la terza vota, dicennu li stissi palori.

⁴⁵ Allura jiu unni li soi discipuli, e cci dissi: Durmiti ora, e ripusativi: eccu ca s’ avvicinau l’ ura, e lu Figghiu di l’ omu sarrà cunsignatu ntra li manu di li piccaturi.

⁴⁶ Susitivi, jamuninni: eccu ca s’ avvicina chiddu, ca mi tradirrà.

⁴⁷ Mentri stava parrannu, eccu Giuda unu de li dudici, e cu iddu una gran turba cu spati e vastuni mannati da li capi di li sacerdoti, e da l’ anziani di lu populu.

⁴⁸ E chiddu, ca lu tradiu, cci detti ad iddi lu signali, dicennu: Chiddu, ca iu vasirrò, è iddu, catturatilu.

⁴⁹ E a lu mumentu ncugnannusi a Gesù, dissi: Diu ti salvi, Maistru. E lu vasau.

⁵⁰ Gesù cci dissi: Amicu, pri chi cosa vinisti? Allura si ficiru avanti, e misiru li manu di supra a Gesù, e lu pigghiaru.

⁵¹ Ed eccu unu di chiddi, ca era cu Gesù, stinnennu la manu, tirau la so spata, e firennu un servu di lu capu di li sacerdoti cci tagghiau l’ oricchia.

⁵² Allura Gesù cci dissi: Rimetti la to spata ntra lu so locu. Giacchì tutti chiddi, chi darrannu di manu a la spata, murirrannu di spata.

⁵³ Chi ti cridi, ca nun pozzu prigari lu Patri miu, pri mannarimi ora cchiù di duduci legioni d’ ancili?

⁵⁴ E comu si verifichirrianu li Scritturi, ca avi a succediri accussì?

⁵⁵ Ntra ddu puntu dissi Gesù a li turbi: Comu si fa cu ’n assassinu niscistivu cu spati e cu vastuni pri vinirimi a pigghiari: ogni jornu mmenzu di vuautri sideva nsignannu ntra lu tempiu, e nun mi pigghiastivu.

⁵⁶ E tuttu chistu è successu, acciocchì si verificassiru li Scritturi di li profeti. Allura tutti li discipuli, lassannulu, si nni fujeru.

⁵⁷ Ma chiddi affirrannu a Gesù, lu purtaru a Caifassu lu capu di li sacerdoti, unni s’ arricugghieru li Scribi e l’ anziani.

⁵⁸ Petru però l’ accumpagnava a longa manu nsinu a l’ atriu di lu capu di li sacerdoti. E trasennu dintra, s’ assittava cu li ministri, pri vidiri la fini.

⁵⁹ Ma li capi di li sacerdoti, e tuttu lu cunsigghiu circavanu un testimoniu fausu contra Gesù, pri purtarlu a la morti:

⁶⁰ E nun lu truvavanu, benchì cci fussiru tanti testimonj fausi. Ma finalmenti vinniru dui testimonj fausi,

⁶¹ Li quali dissiru: Iddu ha dittu: Pozzu sdirrubbari lu tempiu di Diu, e doppu tri jorna rifabbricarlu.

⁶² Allura lu capu di li sacerdoti susennusi, cci dissi: Nun rispunni nenti a chistu, ca iddi dicinu contra di tia?

⁶³ Ma Gesù nun parrava. E lu capu di li sacerdoti cci dissi: Ti scunciuru pri parti di lu Diu vivu, ca nni dicissi, si tu sì Cristu figghiu di Diu.

⁶⁴ Gesù cci rispusi: Tu lu dicisti. Anzi vi dicu, ca cchiù tardu vidirriti lu Figghiu di l’ omu assittatu a la dritta di la maistà di Diu vinennu ntra li nuvuli di lu celu.

⁶⁵ Allura lu capu di li sacerdoti sfardau li soi vistimenti, dicennu: Bestemiau: chi bisognu avemu cchiù di testimonj? eccu ca ora sintistivu la bestemia:

⁶⁶ Chi vi nni pari? E chiddi rispunnennu dissiru: È reu di morti.

⁶⁷ Allura cci sputaru ’n facci, e cci dettiru pugna, ed autri cci dettiru timpuluni,

⁶⁸ Dicennu: Addimina Cristu, cui è, ca ti vastuniau?

⁶⁹ Petru però era assittatu fora ntra l’ atriu: e si cci ncugnau na criata, dicennu: Tu puru eri cu Gesù di Galilia.

⁷⁰ Ed iddu nigau avanti a tutti, dicennu: Nun sacciu chiddu, chi dici.

⁷¹ E niscennu iddu di la porta, lu vitti nautra criata, e dissi a chiddi, ca eranu ddà: Chistu puru era cu Gesù Nazarenu.

⁷² E nigau di novu cu juramentu: Iu nun l’ aju canusciutu mai.

⁷³ E doppu un pizzuddu si ncugnaru chiddi, chi cc’ eranu, e dissiru a Petru: Veramenti tu puru sì unu d’ iddi: giacchì lu to parrari lu fa a vidiri.

⁷⁴ Allura accuminzau a mannarisi jastimi, ed a spirgiurari, ca nun avia mai canusciutu tali omu. E subitu lu gaddu cantau.

⁷⁵ E Petru si rigurdau di li palori di Gesù, ca dissi: Prima ca lu gaddu cantassi, mi nighirrai tri voti. E nisciutu fora chianciu amaramenti.