Secunnu Matteu 25 - Rut la Cantica di li Cantici e Matteu 1861 (volgarizzato in dialetto siciliano)

¹ Allura lu regnu di li celi s’ assimigghirrà a deci virgini, ca pigghiannu li soi lucerni nisceru ncontra a la spusu ed a la spusa.

² Ma cincu d’ iddi eranu sciocchi, e cincu giudiziusi:

³ E li cincu sciocchi, avennu pigghiati li lucerni, nun si pigghiaru cu iddi l’ ogghiu:

⁴ Li giudiziusi però si pigghiaru cu li lucerni li ciaschi cu l’ ogghiu.

⁵ E lu spusu essennu in ritardu, a tutti cci vinni lu sonnu e s’ addurmisceru.

⁶ Però a menzannotti si ntisi na vuci: Eccu ca veni lu spusu, itici a lu ncontru.

⁷ Allura si suseru tutti ddi virgini, e aggiustaru li soi lucerni.

⁸ Li sciocchi però dissiru a li giudiziusi: Datinni di lu vostru ogghiu: giacchì li nostri lucerni s’ astutanu.

⁹ Li giudiziusi rispusiru, e dissiru: Siccomu nun abbastirria nè a nuatri, nè a vuautri, iti cchiuttostu unni si vinni, ed accattativillu.

¹⁰ Ma mentri si lu javanu ad accattari, vinni lu spusu: e chiddi, ca eranu pronti, traseru cu iddu a lu zitaggiu, e la porta fu chiusa.

¹¹ A l’ ultimu vinniru puru l’ autri virgini, dicennu: Signuri, Signuri, aprinni.

¹² Ma iddu rispusi e dissi: In virità vi dicu, iu nun vi canusciu.

¹³ Perciò stati vigilanti, ca nun sapiti nè lu jornu, nè l’ ura.

¹⁴ Giacchì comu un omu jennu a longu viaggiu, chiamau li soi servi, e cci detti in manu li soi beni.

¹⁵ E detti ad unu cincu talenti, a nautru però dui, ed a nautru unu, e ad ognunu secunnu la so abilità, e subitu partiu.

¹⁶ E chiddu, chi avia avutu li cincu talenti, li jiu a niguziari, e nni guadagnau nautri cincu.

¹⁷ Di la stissa manera chiddu, chi nn’ avia ricivutu dui, nni guadagnau nautri dui.

¹⁸ Ma chiddu, chi nn’ avia ricivutu unu, si nni jiu, fici un fossu ’n terra, ed ammucciau li dinari di lu so patruni.

¹⁹ E doppu tantu tempu turnau lu patruni di ddi servi, e cci dumannau li cunti.

²⁰ E vinennu chiddu, chi avia ricivutu li cincu talenti, cci nni presentau nautri cincu, dicennu: Signuri, mi cunsignasti cincu talenti, ed eccunni nautri cincu, ca aju guadagnatu.

²¹ Lu so patruni cci dissi: Bravu, servu bonu e fidili, giacchì fusti fidili pri lu pocu, ti ncarichirrò di l’ assai: veni a godiri cu lu to patruni.

²² Vinni poi chiddu, chi avia ricivutu dui talenti, e dissi: Signuri, mi cunsignasti dui talenti, eccunni nautri dui, ca aju guadagnatu.

²³ Lu so patruni dissi: Bravu, servu bonu e fidili, giacchì fusti fidili pri lu pocu, ti ncarichirrò di l’ assai: veni a godiri cu lu to patruni.

²⁴ Ed essennu vinutu chiddu, chi avia ricivutu un talentu, dissi: Signuri, sacciu, ca sì un omu duru, ca meti, unni nun hai siminatu, ed arricogghi, unni nun hai jittatu nenti:

²⁵ E mi scantavi, e jivi ad ammucciari lu to talentu sutta terra. Eccu ccà cc’ è la robba tua.

²⁶ Ma lu patruni cci rispusi, e dissi: Servu tintu, e lagnusu, sapivi, ca metu, unni nun aju siminatu, ed arricogghiu, unni nun aju jittatu:

²⁷ Duvivi dunca dari li mei dinari a li mircanti, e vinennu avria ricivutu certu lu miu cu li frutti.

²⁸ Livaticci perciò lu talentu, e datilu a chiddu, chi avi li deci talenti.

²⁹ Giacchì a chiddu, chi avi cci sarrà datu, e si truvirrà ntra l’ abbunnanza: ma a chiddu, chi nun avi, cci sarrà livatu puru chiddu, chi pò aviri.

³⁰ E lu servu inutili jettatilu ntra li tenebri di fora: ddà cci sarrà chiantu, e scrusciu di denti.

³¹ Quannu poi vinirrà lu Figghiu di l’ omu ntra la sua maistà, e tutti l’ ancili cu iddu, allura sidirrà supra lu tronu di la so gloria:

³² E s’ arricugghirrannu avanti ad iddu tutti li genti, e li spartirrà l’ uni di l’ autri, comu lu pasturi sparti li pecuri di li crapetti:

³³ E mittirrà li pecuri a la so dritta, e li crapetti a la manca.

³⁴ Allura lu re dirrà a chiddi, chi sunnu a la so dritta: Viniti, biniditti da me Patri, pigghiati possessu di lu regnu preparatu pri vuautri di la criazioni di lu munnu.

³⁵ Giacchì appi fami, e mi dastivu a manciari: appi siti, e mi dastivu a viviri: era furasteri, e m’ accugghistivu:

³⁶ Era nudu, e mi cummigghiastivu: malatu, e mi visitastivu: era carzaratu, e mi vinistivu a vidiri.

³⁷ Allura cci rispunnirrannu li giusti, dicennu: Signuri, quannu mai ti vittimu affamatu, e ti dettimu a manciari: assitatu, e ti dettimu a viviri?

³⁸ Quannu ti vittimu furasteri, e ti dettimu ricettu: o nudu, e ti cummigghiammu?

³⁹ O quannu ti vittimu malatu, o carzaratu, e ti vinnimu a visitari?

⁴⁰ E lu re rispunnennu, cci dirrà: In virità vi dicu, quannu avriti fattu qualchi cosa pri lu cchiù minimu di sti mei fratelli, lu facistivu a mia.

⁴¹ Allura dirrà puru a chiddi, chi sarrannu a la manca: Alluntanativi di mia, mmaliditti, ntra lu focu eternu, ca è preparatu pri lu diavulu, e pri li soi ancili.

⁴² Giacchì appi fami, e nun mi dastivu a manciari: appi siti, e nun mi dastivu a viviri:

⁴³ Era furasteri, e nun m’ accugghistivu: nudu, e nun mi cummigghiastivu: malatu, e carzaratu, e nun mi visitastivu.

⁴⁴ Allura rispunnirrannu puru chisti, dicennu: Signuri, quannu mai ti vittimu affamatu, o assitatu, o furasteri, o nudu, o malatu, o carzaratu, e non t’ avemu ajutatu?

⁴⁵ Allura cci rispunnirrà, dicennu: In virità vi dicu: Ogni vota, ca nun l’ aviti fattu ad unu di li cchiù minimi di chisti, mancu l’ aviti fattu a mia.

⁴⁶ E chisti irrannu ntra li peni eterni: li giusti però ntra la vita eterna.