Secunnu Matteu 24 - Rut la Cantica di li Cantici e Matteu 1861 (volgarizzato in dialetto siciliano)

¹ E comu nisciu Gesù di lu tempiu, si nni java. E si cci accustaru li soi discipuli, pri faricci a vidiri li fabbrichi di lu tempiu.

² Iddu però cci rispusi e dissi: Viditi tutti sti cosi? In virità vi dicu, nun ristirrà ccà petra supra petra, ca nun sarrà distrutta.

³ E mentri iddu sideva supra lu munti di l’ Olivitu, si cci accustaru segretamenti li discipuli, e cci dissiru: Dinni, quannu succidirrannu sti cosi? e quali sarrà lu signu di la to vinuta, e di la fini di li seculi?

⁴ E Gesù rispunnennucci dissi: Dati a cura, ca nuddu vi seducissi.

⁵ Giacchì tanti vinirrannu a nomu miu, dicennu: Iu sugnu Cristu: e seducirrannu genti assai.

⁶ Pirchì sintirriti parrari di guerri, e di dicirii di guerri. Dati a cura di nun turbarivi. Giacchì sti cosi hannu a succediri, ma nun finisci ddocu.

⁷ Pirchì si sullivirrannu genti contra genti, e regnu contra regnu, e cci sarrannu pesti, fami, e terremoti ad ogni banna.

⁸ Ma tutti sti cosi sarrannu lu principiu di li disgrazj.

⁹ Allura vi jittirrannu ntra li tribulazioni, e v’ ammazzirrannu: e sarriti odiati da tutti li genti pri causa di lu me nomu.

¹⁰ E allura tanti sarrannu scannaliati, e si tradirrannu l’ unu cu l’ autru, e si odiirrannu ntra d’ iddi.

¹¹ E accumparirrannu tanti profeti fausi, e seducirrannu genti assai.

¹² E comu l’ iniquità sarrà suprabbunnanti, la carità di tanti s’ arrifriddirrà.

¹³ Ma cui perseverirrà sinu a la fini, chistu sarrà salvu.

¹⁴ E sarrà pridicatu stu vancelu di lu regnu pri tuttu lu munnu, pri testimonianza a tutti li genti: ed allura vinirrà la fini.

¹⁵ Quannu dunca vidirriti l’ abbominazioni di la desolazioni, di la quali parrau lu profeta Danieli, misa ntra lu locu santu: cu’ leggi, cumprenna.

¹⁶ Allura chiddi, ca sunnu ntra la Giudia, si nni fuissiru supra li muntagni:

¹⁷ E cui si trova supra lu tettu, nun scinnissi pri pigghiari cosa di la so casa:

¹⁸ E cui si trova ’n campagna, nun turnassi pri pigghiari la so vesti.

¹⁹ Guai pri li gravidi, o pri chiddi, chi nutricanu ntra ddi jorna.

²⁰ E prigati, ca nun avissivu a fuiri di nvernu, o di sabatu.

²¹ Giacchì allura vi sarrà gran tribulazioni, comu nun cci nn’ è stata di lu principiu di lu munnu nsinu ad ora, nè cci nni sarrà cchiù mai.

²² E si nun fussiru accurzati ddi jorna, nun cci sarria vita, ca sarria salvata: ma pri causa di l’ eletti ddi jorna sarrannu accurzati.

²³ Allura si qualcunu vi dicissi: Eccu Cristu è ccà, o ddà: nun cci criditi.

²⁴ Giacchì accumparirrannu fausi cristi, e fausi profeti: e farrannu miraculi, e prodigj granni, di manerachì sarrannu ingannati (si fussi possibili) puru l’ eletti.

²⁵ Eccu ca iu vi l’ aju predittu.

²⁶ Si dunca vi dirrannu: Eccu ca è ntra lu disertu, nun stati a nesciri: eccu ca è dintra la casa, nun lu criditi.

²⁷ Giacchì comu lu lampu nesci di l’ orienti, e si vidi sinu a l’ occidenti, accussì sarrà la vinuta di lu Figghiu di l’ omu.

²⁸ In qualunqui banna sarrà lu corpu, ddà si juncirrannu l’ aquili.

²⁹ Perciò immediatamenti doppu la tribulazioni di ddi jorna lu suli si scurirrà, e la luna nun darrà la so luci, e li stiddi cadirrannu di lu celu, e li potenzj di lu celu si smuvirrannu:

³⁰ Ed allura lu signu di lu Figghiu di l’ omu accumparirrà ntra lu celu: ed allura chiancirrannu tutti li tribù di la terra: e vidirrannu lu Figghiu di l’ omu scinniri supra li nuvuli di lu celu cu gran potenza, e maistati.

³¹ E mannirrà li soi ancili, li quali cu la trumma, e cu vuci sonora arricugghirrannu li soi eletti di li quattru venti, di l’ autu di li celi sinu a li soi confini.

³² Di l’ arvulu di la ficu adunca nsignativi sta parabula: quannu già lu so ramu s’ arrinnova e spuntanu li fogghi, canusciti, ca la stati è vicina:

³³ Accussì anchi vuautri, quannu vidirriti tutti sti cosi, sapriti, ca è vicinu a la porta.

³⁴ In virità vi dicu, ca nun passirrà sta generazioni, ca tutti sti cosi succidirrannu.

³⁵ Lu celu e la terra finirrannu, ma li mei palori nun manchirrannu.

³⁶ Però lu jornu e l’ ura nuddu la sapi, mancu l’ ancili di lu celu, ma lu sulu me Patri.

³⁷ E comu a li tempi di Noè, accussì sarrà a la vinuta di lu Figghiu di l’ omu.

³⁸ Giacchì comu ntra li jorna prima di lu dilluviu manciavanu e vivianu, si maritavanu e pigghiavanu mugghieri, sinu a lu jornu, ca Noè trasiu ntra l’ arca,

³⁹ E nun si nn’ addunaru ca quannu vinni lu dilluviu, e si li purtau tutti: accussì sarrà a la vinuta di lu Figghiu di l’ omu.

⁴⁰ Allura dui si truvirrannu ntra na campagna: unu sarrà pigghiatu, e l’ autru sarrà lassatu.

⁴¹ Dui fimmini macinirrannu a lu mulinu: una sarrà pigghiata, e l’ autra sarrà lassata.

⁴² Stati allerta dunca, giacchì nun sapiti, a chi ura lu Signuri vostru vinirrà.

⁴³ Chistu però sappiati, ca si lu patri di famigghia sapissi, a chi ura avi a veniri lu latru, certamenti starria allerta, e nun farria scassari la so casa.

⁴⁴ Perciò anchi vuautri siati preparati: giacchì ntra l’ ura, ca nun pinsati lu Figghiu di l’ omu vinirrà.

⁴⁵ Cui è ddu servu fidili, e prudenti, ca lu so patruni lu fici suprastanti di la so famigghia, pri daricci a manciari giustu a tempu?

⁴⁶ Beatu ddu servu, ca quannu vinirrà lu patruni, lu truvirrà facennu accussì.

⁴⁷ In virità vi dicu, ca cci darrà lu maneggiu di tutti li soi beni.

⁴⁸ Si però ddu servu tintu dirrà ntra lu so cori: Lu me patruni tardirrà a veniri:

⁴⁹ E cumincirrà a vastuniari li cumpagni soi, ed a manciari e viviri cu li mbriachi:

⁵⁰ Vinirrà lu patruni di stu servu, ntra lu jornu, ca nun si l’ aspetta, e ntra dd’ ura, ca nun sapi:

⁵¹ E lu spartirrà, e mittirrà la so partita cu l’ ippocriti. E ddà cci sarrà chiantu, e scrusciu di denti.