Secunnu Matteu 23 - Rut la Cantica di li Cantici e Matteu 1861 (volgarizzato in dialetto siciliano)

¹ Allura Gesù parrau a li turbi, ed a li soi discipuli,

² Dicennu: Supra la catreda di Mosè s’ assittaru li Scribi, e li Farisei.

³ Perciò tuttu chiddu, chi vi dirrannu di fari, facitilu; ma nun faciti comu iddi fannu: giacchì dicinu, e nun fannu.

⁴ Giacchì carricanu pisi grossi, e insopportabili, e li mettinu supra li spaddi di l’ omini: ma iddi nun li vonnu spinciri cu un jiditu.

⁵ Tuttu chiddu, chi fannu è pr’ essiri visti di l’ omini: perciò portanu cchiù granni li soi fasci, e s’ allonganu li frinzi.

⁶ E cci piacinu li primi posti ntra li ceni, e li primi seggi ntra li sinagoghi,

⁷ E d’ essiri salutati ntra li chiazzi, e d’ essiri chiamati da l’ omini maistri.

⁸ Vuautri però nun vi faciti chiamari maistri. Giacchì unu sulu è lu vostru Maistru, e vuautri siti tutti fratelli.

⁹ Nè chiamati a nuddu vostru patri supra la terra: Giacchì lu sulu Patri vostru è chiddu, ca è ntra li celi.

¹⁰ Nè vi faciti chiamari maistri: giacchì lu sulu vostru Maistru è Cristu.

¹¹ Cui si farrà cchiù granni ntra vuautri, sarrà vostru servu.

¹² E cui s’ esaltirrà, sarrà umiliatu: e cui s’ umiliirrà, sarrà esaltatu.

¹³ Mali pri vuautri, Scribi e Farisei ippocriti: ca chiuditi lu regnu di li celi nfacci a l’ omini: Giacchì nè cci trasiti vuautri, nè cci faciti trasiri a chiddi, chi sunnu pri trasiri.

¹⁴ Mali pri vuautri, Scribi e Farisei ippocriti: pirchì vi manciati li casi di li viduvi, facennu longhi orazioni: e pri chistu sarriti cchiù severamenti giudicati.

¹⁵ Mali pri vuautri, Scribi e Farisei ippocriti: ca firriati lu mari e la terra, pri fari un proselitu, e quannu l’ aviti fattu, lu faciti addivintari figghiu di l’ infernu lu duppiu di vuautri.

¹⁶ Mali pri vuautri, guidi orvi, ca diciti: Si qualcunu jura pri lu tempiu, nun è nenti: ma si jura pri l’ oru di lu tempiu, è obbligatu.

¹⁷ Stupidi, ed orvi: Giacchì chi è cchiù assai, l’ oru, o lu tempiu, ca santifica l’ oru?

¹⁸ E qualunqui jura pri l’ otaru, nun è nenti: ma cui jura pri l’ offerta, chi cci sta supra, è obbligatu.

¹⁹ Orvi: Chi cosa è cchiù granni, l’ offerta, o l’ otaru, chi santifica l’ offerta?

²⁰ Cui dunca jura pri l’ otaru, jura e pri lu stissu, e pri zoccu cc’ è supra.

²¹ E cui jura pri lu tempiu, jura pri lu stissu, e pri chiddu, chi cci abita.

²² E cui jura pri lu celu, jura pri lu tronu di Diu, e pri chiddu, ca sedi supra lu stissu.

²³ Mali pri vuautri, Scribi e Farisei ippocriti: ca pagati la decima di l’ amenta, di l’ anitu, e di lu ciminu, e lassati li cosi cchiù mpurtanti di la liggi, lu giudiziu, la misiricordia, e la fidi. Chisti cosi si divunu fari, e l’ autri nun s’ hannu a lassari.

²⁴ Guidi orvi, ca scartati un zappagghiuni, e v’ agghiuttiti un gamiddu.

²⁵ Mali pri vuautri, Scribi e Farisei ippocriti, ca pulizziati lu fora di lu gottu e di lu piattu: ma dintra siti chini di rapina, e di munnizza.

²⁶ Fariseu orvu, annetta prima lu dintra di lu gottu e di lu piattu, acciocchì fussi nettu anchi lu fora.

²⁷ Mali pri vuautri, Scribi e Farisei ippocriti: giacchì siti comu li sepulturi abbianchiati, ca di fora a l’ omini parinu beddi, ma dintra sù chini d’ ossa di morti, e d’ ogni munnizza.

²⁸ Accussì puru vuautri pariti di fora giusti a la genti: ma dintra siti chini d’ ippocrisia e d’ iniquità.

²⁹ Mali pri vuautri, Scribi e Farisei ippocriti, ca fabbricati li sepulturi a li profeti, e adurnati li monumenti di li giusti,

³⁰ E diciti: Si fussimu stati a li tempi di li nostri patri, nun sarriamu stati complici comu iddi di lu sangu di li profeti.

³¹ Sicchè faciti testimonianza contra vuautri stissi, ca siti figghi di chiddi, ca ammazzaru li profeti.

³² E vuautri inchiti la misura di li vostri patri.

³³ Sirpenti razza di vipari, e comu scampirriti di la cunnanna di l’ infernu?

³⁴ Perciò eccu ca vi mannu profeti, e sapienti, e scribi, e di chisti nn’ ammazzirriti e nni crucifiggirriti alcuni, e nni flagellirriti autri ntra li vostri sinagoghi, e li persequitirriti di cità in cità:

³⁵ E cadirrà supra di vuautri tuttu lu sangu giustu sparsu supra la terra, a cuminciari di lu sangu d’ Abeli giustu, sinu a lu sangu di Zaccaria figghiu di Barachia, ca l’ ammazzastivu ntra lu tempiu e l’ otaru.

³⁶ In virità vi dicu, tutti sti cosi cadirrannu supra la generazioni presenti.

³⁷ Gerusalemmi, Gerusalemmi, ca ammazzi li profeti, e pitrulii chiddi, ca ti sunnu mannati, quantu voti circavi d’ arricogghiri li to figghi, comu la gaddina arricogghi li soi puddicini sutta l’ ali, e nun vulisti?

³⁸ Eccu ca la vostra casa sarrà lassata diserta.

³⁹ Perciò vi dicu, ca da ora in poi nun mi vidriti cchiù, sinu a tantu ca nun dirriti: Binidittu chiddu, ca veni in nomu di lu Signuri.