Secunnu Matteu 20 - Rut la Cantica di li Cantici e Matteu 1861 (volgarizzato in dialetto siciliano)

¹ Lu regnu di li celi è simili ad un patri di famigghia, ca nisciu a punta di jornu ad addugari li travagghiaturi pri la so vigna.

² Ed avennu cunvinutu cu li travagghiaturi a un dinaru lu jornu, li mannau a la so vigna.

³ E nisciutu versu la terza, nni vitti autri, chi stavanu ntra la chiazza ozziusi,

⁴ E cci dissi: Jiti vuautri puru ntra la me vigna, e vi darrò chiddu, ch’ è giustu.

⁵ E chiddi cci jeru. Nisciu arreri circa la sesta, e la nona: e fici lu stissu.

⁶ Circa l’ undecima però nisciu, e nni truvau autri, ca eranu assittati, e cci dissi: Pirchì stati ccà tutta la jurnata ozziusi?

⁷ Chiddi cci dissiru: Pirchì nuddu nn’ ha addugatu. Ed iddu cci dissi: Jiti vuautri puru ntra la me vigna.

⁸ Essennusi fatta sira, lu patruni di la vigna dissi a lu so fatturi: Chiama li travagghiaturi, e pagacci la jurnata, cuminciannu da l’ ultimi sinu a li primi.

⁹ Essennu vinuti dunca chiddi, ca eranu juti versu l’ undecima ura, riciveru un dinaru pri ognunu.

¹⁰ E vinennu anchi li primi, crittiru, c’ avianu a riciviri di cchiù: ma appiru puru iddi un dinaru.

¹¹ E ricivennulu si mmurmuriavanu contra lu patri di famigghia,

¹² Dicennu: Chist’ ultimi travagghiaru un’ ura, e li mittisti a paru cu nui, ca avemu fattu tutta la jurnata cu lu caudu.

¹³ Ma iddu rispunnennu ad unu d’ iddi, dissi: Amicu, iu nun ti fazzu tortu: nun cunvinisti cu mia pri un dinaru?

¹⁴ Pigghiati lu to, e vattinni: iu vogghiu dari puru a chist’ ultimu quantu a tia.

¹⁵ E chi! nun pozzu fari chiddu, chi mi piaci? o l’ occhiu to è malignu, pirchì iu sugnu bonu?

¹⁶ Accussì sarrannu l’ ultimi li primi, e li primi sarrannu l’ ultimi. Giacchì sunnu assai li chiamati, pochi però l’ eletti.

¹⁷ Ed acchianannu Gesù a Gerusalemmi, pigghiau di parti li dudici discipuli, e cci dissi:

¹⁸ Eccu ca acchianamu a Gerusalemmi, e lu Figghiu di l’ omu sarrà cunsignatu ntra li manu di li capi di li sacerdoti, e di li Scribi, e lu cunnannirrannu a morti.

¹⁹ E lu darrannu mputiri di li gentili pri essiri nciuriatu, e flagellatu, e crucifissu, e lu terzu jornu risuscitirrà.

²⁰ Allura si cci accustau la matri di li figghi di Zebedeu cu li soi figghi, adurannulu e dumannannucci qualchi cosa.

²¹ Lu quali cci dissi: Chi voi? Ed idda cci dissi: Ordina, ca sti me dui figghi sidissiru, l’ unu a la dritta, l’ autru a la manca di lu to regnu.

²² E Gesù rispunnennu, dissi: Vuautri nun sapiti zoccu dumannati. Putiti viviri lu calici, ca iu aju a viviri? Iddi rispunninu: Lu putemu.

²³ Cci dissi: Certu vivirriti lu me calici: ma pri sediri a la mia dritta o a la manca nun sugnu iu, ca lu pozzu fari, ma sarrà pri chiddi, a li quali l’ ha preparatu me Patri.

²⁴ Sintennu chistu li deci, si ncuitaru cu li dui frati.

²⁵ Gesù però li chiamau, e cci dissi: Sapiti, ca li principi di li nazioni li dominanu: e chiddi, ca sunnu cchiù granni, esercitanu putiri supra d’ iddi.

²⁶ Nun sarrà accussì ntra vuautri: ma qualunqui ntra vuautri vurrà essiri cchiù granni sia lu vostru ministru:

²⁷ E cui vurrà ntra vuautri essiri lu primu, sarrà lu vostru servu.

²⁸ Siccomu lu Figghiu di l’ omu nun vinni pri essiri sirvutu, ma pri serviri, e dari la so vita, pri riscattu di tanti.

²⁹ E comu nisceru iddi di Gericu, cci giu d’ appressu na gran turba;

³⁰ Ed eccu dui orvi, chi sidianu ntra la via, ntisiru, ca Gesù passava, ed esclamaru, dicennu: Signuri, abbi misiricordia di nui, figghiu di Davidi.

³¹ Ma la turba cci gridau, ca si zittissiru. Ed iddi cchiù forti esclamavanu, dicennu: Signuri, abbi pietà di nui, figghiu di Davidi.

³² E Gesù si firmau, e li chiamau, e dissi: Chi vuliti, ca vi facissi?

³³ Iddi cci dicinu: Signuri, chi s’ aprissiru l’ occhi nostri.

³⁴ E Gesù mossu a pietà d’ iddi, cci tuccau l’ occhi. E subitu vittiru, e cci jeru d’ appressu.