Secunnu Matteu 19 - Rut la Cantica di li Cantici e Matteu 1861 (volgarizzato in dialetto siciliano)

¹ E successi, ca comu Gesù finiu sti discursi, partiu di Galilia, ed arrivau a li confini di la Giudia addabanna lu Giurdanu,

² E cci jeru d’ appressu turbi assai, e li sanau ddà stissu.

³ E jeru a truvarlu li Farisei pri tentarlu, e cci dissiru: È licitu a l’ omu ripudiari la mugghieri, pri qualunqui motivu?

⁴ Iddu rispusi, e cci dissi: Nun aviti liggiutu, ca cui fici in principiu l’ omu, li fici masculu e fimmina? e dissi:

⁵ Pri chistu lassirrà l’ omu lu patri, e la matri, e starrà cu so mugghieri, e li dui sarrannu una carni sula.

⁶ Nun sunnu dunca cchiù dui, ma una carni. Ora chiddu, chi Diu junciu, l’ omu nun lu spartissi.

⁷ Chiddi dicinu: Pirchì dunca Mosè ordinau di dari lu libellu di lu ripudiu, e di spartirisi?

⁸ Cci dissi: Pirchì Mosè pri la durizza di lu vostru cori vi permisi di ripudiari li vostri mugghieri: ma in principiu nun fu accussì.

⁹ Iu però vi dicu, ca cui ripudiirrà la sua mugghieri, eccettu pri casu di furnicazioni, e si nni pigghirrà un’ autra, cummetti adulteriu: e chiddu, chi si maritirrà cu la ripudiata, cummetti adulteriu.

¹⁰ Cci dicinu li discipuli soi: Si chista è la posizioni di l’ omu cu la mugghieri, nun cunveni maritarisi.

¹¹ Ed iddu cci dissi: Nun tutti cumprenninu sta palora, ma chiddi, a li quali è statu cuncessu.

¹² Giacchì cci sunnu eunuchi, ca sunnu nasciuti accussì di la ventri di la matri: e cci sunnu eunuchi, chi sù stati fatti di l’ omini: e cci sunnu eunuchi, ca si sunnu castrati iddi stissi pri causa di lu regnu di li celi. Cui pò cumprenniri cumprennissi.

¹³ Allura cci foru presentati picciriddi, acciocchì cci mittissi di supra li manu, e prigassi. Ma li discipuli l’ arriprinnianu.

¹⁴ Gesù però cci dissi: Lassati stari li picciriddi, e nun li mpiditi di veniri versu di mia: giacchì di chisti tali è lu regnu di li celi.

¹⁵ Ed avennucci misu di supra li manu, si nni jiu di ddà.

¹⁶ Ed eccu unu, ca si cci accustau, e cci dissi: O bonu Maistru, chi farrò iu di bonu pri otteniri la vita eterna?

¹⁷ Lu quali cci dissi: Pirchì mi dumanni di lu bonu? Unu è bonu, Diu. Perciò si voi arrivari a la vita, osserva li cumannamenti.

¹⁸ E quali? cci dissi. E Gesù rispusi: Nun ammazzirrai: Nun farrai adulteriu: Nun arrubbirrai: Nun farrai testimonianza fausa:

¹⁹ Rispetta a to patri, e a to matri, ed ama lu prossimu to comu te stissu.

²⁰ Lu giuvini cci dissi: Tutti sti cosi l’ aju osservatu di la prima etati, chi mi manca ancora?

²¹ Gesù cci dissi: Si voi essiri perfettu, va, vinniti chiddu, chi hai, e dunalu a li poviri, ed avirrai un tesoru ’n celu: e veni appressu a mia.

²² Avennu lu giuvini ntisi sti palori, si nni jiu afflittu: giacchì avia multi possessioni.

²³ Ma Gesù dissi a li soi discipuli: In virità vi dicu, ca lu riccu difficilmenti trasirrà ntra lu regnu di li celi.

²⁴ E di cchiù vi dicu, ca è cchiù facili, ca un gamiddu passassi pri un funnu d’ agugghia, ca un riccu trasissi ntra lu regnu di li celi.

²⁵ Ntisi sti cosi, li discipuli si maravigghiavanu assai, dicennu: E cui dunca si putrà salvari?

²⁶ Ma Gesù guardannuli, cci dissi: Pri l’ omini chistu è impossibili: pri Diu però tuttu è possibili.

²⁷ Allura Petru rispunnennu, dissi: Eccu ca nui avemu lassatu tuttu, e semu vinuti appressu a tia: chi sarrà dunca di nui?

²⁸ E Gesù cci dissi: In virità vi dicu, ca vuautri, ca siti vinuti appressu a mia, a lu tempu di la rigenerazioni, quannu lu Figghiu di l’ omu sidirrà supra lu tronu di la sua maistà, sidirriti puru vuautri supra dudici troni, e giudichirriti li dudici tribù d’ Isdraeli.

²⁹ Ed ognunu, chi avrà abbannunata la casa, o li frati, o li soru, o lu patri, o la matri, o la mugghieri, o li figghi, o li tirreni pri amuri di lu nomu miu, ricivirrà centu pri unu, e possedirrà la vita eterna.

³⁰ E tanti primi sarrannu ultimi, e tanti ultimi primi.