Secunnu Matteu 18 - Rut la Cantica di li Cantici e Matteu 1861 (volgarizzato in dialetto siciliano)

¹ Ntra lu stissu tempu s’ accustaru a Gesù li soi discipuli, dicennu: Cui cridi, ca è cchiù granni ntra lu regnu di li celi?

² E Gesù chiamannu un picciriddu, lu misi mmenzu d’ iddi,

³ E dissi: In virità vi dicu, ca si nun vi cunvirtirriti, e nun divintirriti comu li picciriddi, nun trasirriti ntra lu regnu di li celi.

⁴ Cui perciò si umiliirrà comu stu picciriddu, chistu sarrà chiù granni ntra lu regnu di li celi.

⁵ E cui accugghirrà un picciriddu comu a chistu a nomu miu, accogghi a mia.

⁶ Cui poi scannaliirrà qualcunu di sti picciriddi, ca cridinu in mia, è megghiu pri iddu, ca cci fussi attaccata a lu coddu una petra di mulinu, e chi fussi jittatu ntra lu funnu di lu mari.

⁷ Guai a lu munnu pri li scannali. Giacchì è necessariu, ca cci fussiru scannali: ma guai a dd’ omu, ca è causa di lu scannalu.

⁸ Si però la to manu, o lu to pedi ti dunanu scannalu: tagghialu, e jettalu luntanu di tia: è megghiu pri tia trasiri ntra la vita c’ un pedi, o cu na manu di menu, ca aviri dui manu, o dui pedi, ed essiri jittatu ntra lu focu eternu.

⁹ E si lu to occhiu ti duna scannalu, scippatillu, e jettalu luntanu di tia: è megghiu pri tia trasiri ntra la vita c’ un occhiu, ca avennu dui occhi essiri jettatu ntra lu focu di l’infernu.

¹⁰ Guardativi di disprizzari unu di sti picciriddi: giacchì vi dicu, ca li soi ancili ntra li celi sempri vidinu la facci di me Patri, ca è ntra li celi.

¹¹ Giacchì vinni lu Figghiu di l’ omu pri sarvari chiddu, ca era pirdutu.

¹² Chi vi nni pari? si qualcunu avi centu pecuri, ed una di chisti si pirdissi: nun lassa iddu li novantanovi supra li muntagni, e va a circari a chidda, ca si pirdiu?

¹³ E si succedi, ca la trova: In virità vi dicu, ca avi cchiù piaciri pri chista, ca pri li novantanovi, ca nun s’ eranu pirduti.

¹⁴ Accussì nun è volontà di vostru Patri, ca è ntra li celi, ca pirissi unu sulu di sti picciriddi.

¹⁵ Ora si to frati t’ avissi offisu, va, e riprennilu di sulu a sulu. Si iddu t’ ascuta, hai guadagnatu a to frati.

¹⁶ Si però nun ti ascutassi, pigghia nsemmula cu tia unu, o dui, acciocchì nfacci a dui, o tri testimonj si facissi tuttu lu discursu.

¹⁷ E si nun li ascutirrà, dillu a la chiesa. E si nun ascutirrà la chiesa, avi a diventari pri tia comu un paganu, e un pubblicanu.

¹⁸ Vi dicu in virità, tuttu chiddu, chi avriti attaccatu supra la terra, sarrà anchi attaccatu ’n celu: e tuttu chiddu, chi sciugghirriti supra la terra, sarrà anchi sciotu ’n celu.

¹⁹ Vi dicu puru, ca si dui di vuautri cunsintirrannu supra la terra di dumannari qualunqui cosa, cci sarrà cuncessa da me Patri, ca è ntra li celi.

²⁰ Giacchì unni sunnu dui, o tri, ca si juncinu a nomu miu, ddà sugnu iu mmenzu d’ iddi.

²¹ Allura accustannusi ad iddu Petru, cci dissi: Signuri, quantu voti piccannu me frati contra di mia, lu pirdunirrò? sinu a setti voti?

²² Gesù cci dissi: Nun ti dicu sinu a setti voti: ma sinu a sittanta voti setti voti.

²³ Perciò lu regnu di li celi s’ assimigghia ad un certu re, ca vosi fari li cunti cu li soi servi.

²⁴ Ed avennu principiatu a fari li cunti, cci fu presentatu unu, ca cci duvia deci mila talenti.

²⁵ E nun avennu modu di pagari, lu patruni cumannau, ca fussi vinnutu iddu, so mugghieri, e li figghi, e tuttu chiddu, c’ avia, e si pagassi lu debitu.

²⁶ Ma ddu servu addinucchiatu, lu prigava dicennu: Abbi pacenzia cu mia, e ti rinnirrò lu tuttu.

²⁷ Mossu lu patruni a pietà di ddu servu, lu liberau, e cci rimisi lu debitu.

²⁸ Nisciutu però ddu servu truvau ad unu di li soi cumpagni di sirvizziu, ca cci duvia centu dinari: ed affirrannulu lu strangulava, dicennu: Pagami zoccu mi divi.

²⁹ Ed addinucchiatusi lu so cumpagnu, lu prigava, dicennu: Abbi pacenzia cu mia, e ti paghirrò lu tuttu.

³⁰ Ma chiddu nun vosi: e jiu a farlu metteri carzaratu, nsinu a chi l’ avissi pagatu.

³¹ Vidennu però l’ autri cumpagni sti fatti, si contristaru fortementi: e jeru a diri a lu patruni tuttu chiddu, chi avia successu.

³² Allura lu patruni chiamau a chiddu: e cci dissi: Servu iniquu, ti rimisi tuttu lu debitu, pirchì mi lu prigasti:

³³ Nun duvivi tu dunca cumpatiri puru a lu to cumpagnu, comu iu avia avutu pietà di tia?

³⁴ E lu patruni ncuitatu lu cunsignau a li carnifici, nsinattantu chi avissi pagatu tuttu lu debitu.

³⁵ Accussì me Patri celesti farrà cu vuautri, si nun pirdunirriti di cori a lu vostru fratellu.