Secunnu Matteu 17 - Rut la Cantica di li Cantici e Matteu 1861 (volgarizzato in dialetto siciliano)

¹ Sei jorna doppu Gesù si pigghiau a Petru, Japicu, e Giuvanni so frati, e si li purtau supra na muntagna auta e ritirata:

² E si trasfigurau avanti ad iddi. E la so facci risblennia comu lu suli, e li so vesti cumparsiru bianchi comu la nivi.

³ Ed eccu ca cci accumparsiru Mosè ed Elia, chi parravanu cu iddu.

⁴ E Petru rispunnennu a Gesù, cci dissi: Signuri, è bonu, ca semu ccà: si voi, facemu ccà tri tabernaculi, unu pri tia, unu pri Mosè, e unu pri Elia.

⁵ Mentri iddu parrava, eccu na nuvula lucenti li cupriu. Ed eccu na vuci di la nuvula, dicennu: Chistu è lu me Figghiu dilettu, ntra lu quali mi sugnu cumpiaciutu: ascutatilu.

⁶ E sintennulu li discipuli caderu facci pri terra, e si scantaru fortementi.

⁷ E Gesù si cci accustau, e li tuccau: e cci dissi: Susitivi, e nun abbiati paura.

⁸ E jisannu l’ occhi, nun vittiru a nuddu, fora ca Gesù sulu.

⁹ E scinnennu iddi da lu munti, Gesù li cumannau, dicennu: Nun dirriti a nuddu sta visioni, prima ca lu Figghiu di l’ omu sia risuscitatu da li morti.

¹⁰ E li discipuli lu nterrogaru, dicennu: Pirchì dunca li Scribi dicinu, ca prima avi a veniri Elia?

¹¹ Ma iddu rispunnennu, cci dissi: Elia certu vinirrà, e aggiustirrà tuttu.

¹² Però iu vi dicu, ca Elia è già vinutu, e nun l’ hannu ricanusciutu, ma nn’ hanuu fattu tuttu chiddu, chi nn’ hannu vulutu. E di la stissa manera sarrà trattatu da iddi lu Figghiu di l’ omu.

¹³ Allura li discipuli cumprinneru, ca avia ntisu parrari di Giuvanni Battista.

¹⁴ Ed essennu arrivatu unni era la turba, si cci accustau un omu, e si jettau a li soi pedi, dicennu: Signuri, abbi pietà di me figghiu, pirchì avi lu mali di luna, e patisci assai: giacchì spissu cadi ntra lu focu, e spissu ntra l’ acqua.

¹⁵ Ed iu l’ aju purtatu a li toi discipuli, e nun l’ hannu pututu sanari.

¹⁶ Ma Gesù rispunnennu, dissi: O generazioni incredula e maligna, sinu a quannu starrò cu vuautri? sinu a quannu vi suffrirrò. Purtatimillu ccà.

¹⁷ E Gesù cci gridau, e lu dimoniu nisciu d’unn’ iddu, e lu picciottu fu sanatu da ddu puntu.

¹⁸ Allura li discipuli s’ accustaru a Gesù segretamenti, e dissiru: Pirchì nui nun lu pottimu discacciari?

¹⁹ Gesù cci dissi: Pri la vostra incredulità. Giacchì in virità vi dicu, si avriti fidi, quantu un cocciu di sinapa, putriti diri a stu munti, Passa di ccà ddà, ed iddu cci passirrà, e nudda cosa vi sarrà impossibili.

²⁰ Ma chista sorti nun si discaccia ca cu l’ orazioni, e cu lu dijunu.

²¹ E mentri stavanu in Galilia, Gesù cci dissi: Lu Figghiu di l’ omu avi ad essiri cunsignatu ntra li manu di l’ omini:

²² E l’ ammazzirrannu, e lu terzu jornu risuscitirrà. Ed iddi nni ristaru summamenti afflitti.

²³ Ed essennu arrivati a Cafarnau, s’ accustaru a Petru chiddi, ch’ esigevanu li dui drammi, e cci dissiru: Lu vostru Maistru nun paga li dui drammi?

²⁴ Ed iddu rispusi: Sicuramenti. E comu trasiu ntra la casa, Gesù lu previnni, e cci dissi: Chi ti nni pari, Simuni? Li re di la terra, da cui ricivinu lu tributu o lu censu? da li so proprj figghi, o da li stranj?

²⁵ Ed iddu dissi: Da li stranj. Gesù cci dissi: Dunca li figghi sunnu esenti.

²⁶ Ma pri nun scannaliarli, va a mari, e jetta l’ amu: e pigghia lu primu pisci, chi veni nsumma: ed aprennucci la vucca cci truvirrai un stateru: pigghialu, e paga pri mia, e pri tia.