Secunnu Matteu 16 - Rut la Cantica di li Cantici e Matteu 1861 (volgarizzato in dialetto siciliano)

¹ Ed accustannusi ad iddu li Farisei, e li Sadducei pri tentarlu, cci dumannaru, ca cci mustrassi qualchi signu di lu celu.

² Ma iddu rispunnennu, cci dissi: Quannu è vespiri vuautri diciti: Farrà bon tempu, giacchì l’ ariu arrussica.

³ E la matina: Oggi farrà malu tempu, giacchì lu celu niuru arrussica.

⁴ Dunca sapiti canusciri l’ aspettu di lu celu: ma nun siti capaci di distinguiri li signi di li tempi? La generazioni mala e adultera dumanna un signu: ma nun cci sarrà datu autru signu ca chiddu di lu profeta Giona. E lassannuli, si nni jiu.

⁵ Ora avennu li soi discipuli passatu addabbanna lu mari, vittiru, ca s’ avianu scurdatu lu pani.

⁶ Ed iddu cci dissi: Apriti l’ occhi, e guardativi di lu levitu di li Farisei e di li Sadducei.

⁷ Ma iddi pinsavanu ntra se stissi, e dicevanu: Pirchì nun pigghiammu pani.

⁸ E Gesù sapennulu, dissi: Chi pinsati ntra di vuautri, o di poca fidi, ca nun aviti pani?

⁹ Nun riflettiti, nè vi rigurdati di li cincu pani pri li cincu mila omini, e di li cufini, ca nn’ arricugghistivu?

¹⁰ Nè di li setti pani pri li quattru mila omini, e di quantu sporti nn’ arricugghistivu?

¹¹ Comu nun cumprinniti, ca nun fu pri lu pani, ca vi dissi: Guardativi di lu levitu di li Farisei, e di li Sadducei?

¹² Allura si persuasiru, ca nun avia dittu di guardarisi da lu levitu di lu pani, ma di la duttrina di li Farisei e di li Sadducei.

¹³ Gesù essennu poi jutu ntra li parti di Cesaria di Filippu, interrogau li soi discipuli, dicennu: Cui dicinu l’ omini, ca è lu Figghiu di l’ omu?

¹⁴ Ma chiddi cci dissiru: Alcuni dicinu Giuvanni Battista, autri Elia, autri Geremia, o qualcunu di li profeti.

¹⁵ E Gesù cci dissi: E vuautri, cui diciti, ca sugnu iu?

¹⁶ E Petru Simuni rispunnennu, dissi: Tu sì Cristu, figghiu di lu Diu vivu.

¹⁷ E Gesù rispusi, e cci dissi: Beatu sì tu, Simuni Bar‐Jona: giacchì la carni, e lu sangu nun ti lu rivelau, ma me Patri, ca è ntra li celi.

¹⁸ Ed iu ti dicu, ca tu sì Petru, e supra sta petra fabbrichirrò la me chiesa, e li forzi di l’ infernu nun avrannu valia contra d’ idda.

¹⁹ Ed a tia daroggiu li chiavi di lu regnu di li celi. E qualunqui cosa avrai ligatu supra la terra, sarrà puru ligata ntra li celi: e qualunqui cosa avrai sciugghiuta supra la terra, sarrà puru sciugghiuta ntra li celi.

²⁰ Allura ordinau a li soi discipuli di nun diri a nuddu, ca iddu era Gesù Cristu.

²¹ D’ allura in poi Gesù accuminzau a dichiarari a li soi discipuli, ca abbisugnava, ca iddu jissi a Gerusalemmi, e suffrissi cosi assai da li anziani, da li Scribi, e da li capi di li sacerdoti, e fussi misu a morti, e risuscitassi lu terzu jornu.

²² E Petru pigghiannulu di parti, accuminzau a riprennirlu dicennu: Sforasia, Signuri, chi mai t’ abbegna chistu.

²³ E vutannusi a Petru, cci dissi: Alluntanati da mia, satanassu, tu mi sì di scannalu: giacchì nun sai li cosi, chi appartennu a Diu, ma chiddi, chi sù di l’ omini.

²⁴ Allura Gesù dissi a li soi discipuli: Si qualcunu voli veniri appressu a mia, sagrificassi se stissu, si pigghiassi la so cruci, e mi seguissi.

²⁵ Giacchì cui vurrà salvari la so vita, la pirdirrà: e cui poi pirdirrà la so vita pri mia, la truvirrà.

²⁶ Giacchì chi cci giuva a l’ omu di guadagnari tuttu lu munnu, si poi suffrirrà dannu pri l’ anima sua? O chi putrà dari l’ omu in cumpensu di l’ anima sua?

²⁷ Giacchì lu Figghiu di l’ omu vinirrà ntra la gloria di lu Patri so cu li soi ancili: ed allura ricompensirrà ad ognunu secunnu li soi azioni.

²⁸ Vi dicu in virità, ca cci sunnu di chiddi, ca sù ccà presenti, ca nun pruvirrannu la morti, prima chi vidissiru lu Figghiu di l’ omu arrivari ntra lu so regnu.