Secunnu Matteu 15 - Rut la Cantica di li Cantici e Matteu 1861 (volgarizzato in dialetto siciliano)

¹ Allura si cci avvicinaru li Scribi, e li Farisei di Gerusalemmi, dicennu:

² Pirchì li toi discipuli trasgrediscinu li tradizioni di li seniuri? Mancu si lavanu li manu, quannu mancianu lu pani.

³ Ma iddu rispunnennu cci dissi: E pirchì vuautri trasgrediti lu cumannamentu di Diu pri la vostra tradizioni? Giacchì Diu dissi:

⁴ Onura lu patri e la matri, e: Qualunqui mmalidirrà lu patri, o la matri, sarrà cunnannatu a la morti.

⁵ Vuautri però diciti: Ognunu putrà diri a lu patri, o a la matri: Qualunqui offerta fatta da mia, giuvirrà a tia:

⁶ E nun onurirrà so patri, o so matri: e cu sti vostri tradizioni annullati lu cumannamentu di Diu.

⁷ O ippocriti, beni profetizzau pri vuautri Isaia, dicennu:

⁸ Chistu populu mi onura cu li labbra: lu so cori però è luntanu di mia.

⁹ E mmatula mi onuranu, nsignannu duttrini e cumannamenti di l’ omini.

¹⁰ E chiamati li turbi vicinu ad iddu, cci dissi: Sintiti, e persuaditivi.

¹¹ Nun è chiddu, che trasi di la vucca, ca allorda l’ omu: ma chiddu, ca nesci di la vucca, chistu lu renni immundu.

¹² Allura avvicinannusi ad iddu li soi discipuli, cci dissiru: Sai, ca li Farisei, ntisi sti palori, si scannaliaru?

¹³ Ma iddu rispunnennu dissi: Qualunqui chiantimi, ca nun fu chiantata da lu me Patri celesti, sarrà sradicata.

¹⁴ Lassatili jiri: sunnu orvi, e cunnucinu a l’ orvi. E si lu cecu fa la guida di lu cecu, tutti dui cadanu ntra lu fossu.

¹⁵ E Petru rispunnennu, cci dissi: Spieganni sta parabula.

¹⁶ Ma iddu dissi: E tuttora vuautri siti senza intellettu?

¹⁷ Nun cumprinniti, ca tuttu chiddu, ca trasi ntra la vucca, va ntra la ventri, e passa pri secessu?

¹⁸ Ma chiddi cosi, chi nescinu di la vucca, vennu di lu cori, e chisti allordanu l’ omu:

¹⁹ Giacchì di lu cori nescinu li mali pinseri, l’ omicidj, l’ adulterj, li fornicazioni, li furti, li fausi testimonianzi, li bestemj.

²⁰ Chisti sunnu li cosi, chi allordanu l’ omu. Ma lu manciari cu li manu senza lavati, nun allorda l’ omu.

²¹ E partennu doppu Gesù si ritirau ntra li parti di Tiru e di Sidoni.

²² Ed eccu una fimmina canania nisciuta di ddi cuntorni jisau la vuci, dicennucci: Abbi pietà di mia, Signuri, figghiu di Davidi: me figghia è turmintata malamenti da lu dimoniu.

²³ Iddu nun cci rispusi na palora. E ncugnatisi li soi discipuli lu prigavanu dicennu: Spicciala: giacchì cci grida pri d’appressu.

²⁴ Ma iddu rispunnenu dissi: Nun sugnu mannatu ca pri li pecuri pirduti di la casa d’ Isdraeli.

²⁵ Ma chidda s’ avvicinau, e l’ adorau, dicennu: Signuri, ajutami.

²⁶ Lu quali rispunnennu dissi: Nun è bonu pigghiari lu pani di li figghi, e jittarlu a li cani.

²⁷ Ma idda dissi: Accussì è, Signuri: ca puru li cagnoli mancianu li muddichi, chi cadinu di la tavula di li soi patruni.

²⁸ Allura Gesù rispunnennu, cci dissi. O donna, la to fidi è granni: ti sia cuncessu chiddu, chi desideri. E so figghia fu sanata ntra dda stissa ura.

²⁹ Ed essennu Gesù partutu di ddà, jiu versu lu mari di Galilia: ed acchianatu supra na muntagna, si stava ddà assittatu.

³⁰ E cci ncugnau na gran turba, chi carriava cu idda muti, orvi, ciunchi, infirmi, e tanti autri: e li jittaru a li soi pedi, e li sanau:

³¹ Di manerachì li turbi ristavanu ammirati vidennu li muti, chi parravanu, li ciunchi, chi caminavanu, l’ orvi, chi videvanu: e nni davanu gloria a lu Diu d’ Isdraeli.

³² Ma Gesù, chiamati li soi discipuli, dissi: Aju cumpassioni di li turbi, pirchì pri tri jorna stannu cu mia, e nun hannu chi manciari: nè vogghiu mannarinnilli dijuni, pri nun jiri cadennu pri la strata.

³³ E li discipuli cci dicinu: Ma unni pigghirremu ntra lu disertu tantu pani, pri saziari tutta sta turba?

³⁴ E Gesù cci dissi: Quanti pani aviti? Ed iddi rispusiru: Setti, e pocu pisciteddi.

³⁵ Ed ordinau a li turbi di assittarisi supra la terra.

³⁶ E pigghiannu li setti pani, e li pisci, e facennu attu di ringraziamentu, li rumpiu, e li detti a li soi discipuli, e li discipuli li dettiru a lu populu.

³⁷ E manciaru tutti, e si saziaru. E di li pezzi, chi arristaru, nni cugghieru setti sporti chini.

³⁸ Ora chiddi, chi avianu manciatu eranu quattru mila omini, sparti di li picciriddi e di li fimmini.

³⁹ E licenziata la turba, acchianau ntra la varca: ed arrivau ntra li confini di Magedan.