Secunnu Matteu 12 - Rut la Cantica di li Cantici e Matteu 1861 (volgarizzato in dialetto siciliano)

¹ Ntra ddu tempu caminava Gesù di sabatu ntra li siminati: li discipuli soi però avennu fami cuminciaru a scippari spichi, ed a manciari.

² Li Farisei vidennuli, cci dissiru: Eccu ca li toi discipuli fannu zoccu nun è licitu di fari lu sabatu.

³ Ma iddu cci dissi: Nun liggistivu zoccu fici Davidi, quannu appi fami, e chiddi, ca eranu cu iddu:

⁴ Ca trasiu ntra la casa di Diu, e si manciau li pani di l’ offerta, ca nun era licitu ad iddu di manciari, nè a chiddi, ca eranu cu iddu, ma a li suli sacerdoti?

⁵ E nun aviti lettu ntra la liggi, ca li sacerdoti ntra lu tempiu violanu lu sabatu, e sunnu senza piccatu?

⁶ Vi dicu addunca, ca cc’ è ccà unu maggiuri di lu tempiu.

⁷ E si sapissivu zoccu è: Vogghiu misiricordia, e non sagrifiziu: nun avirrissivu cunnannatu mai l’ innoccenti:

⁸ Pirchì lu Figghiu di l’ omu è patruni anchi di lu sabatu.

⁹ Ed essennusinni jutu, arrivau ntra la sinagoga d’ iddi.

¹⁰ Ed eccu un omu, chi avia la manu ciunca, e l’ interrogavanu, dicennu: Si fussi licitu di curari lu sabatu? acciocchì l’ accusassiru.

¹¹ Iddu però cci dissi: Cu’ è l’ omu ntra vuautri, ca avennu na pecura, si chista cadissi di sabatu ntra na fossa, nun la pigghiassi, e la sullivassi?

¹² Ora quantu è cchiù megghiu l’ omu di la pecura? Accussì è licitu di beneficari lu sabatu.

¹³ Allura dissi a dd’ omu: Stenni la to manu. E la stisi, e fu riturnata in sanità, comu l’ autra.

¹⁴ Ma li Farisei niscennu, tinianu cunsigghiu contra d’ iddu, comu l’ avianu a perdiri.

¹⁵ Gesù però sapennulu, si ritirau di ddà: e multi lu siquitaru, e li guariu tutti:

¹⁶ E li cumannau, chi nun lu rivelassiru.

¹⁷ Acciocchì si verificassi zoccu fu dittu da lu profeta Isaia, dicennu:

¹⁸ Eccu lu me garzuni, ca scigghivi, lu miu dilettu, in cui l’ anima mia si cumpiaciu assai. Mittirrò lu me spiritu supra d’ iddu, ed annunziirrà lu giudiziu a li genti.

¹⁹ Iddu nun questionirrà, nè gridirrà, e nuddu sintirrà la so vuci ntra li chiazzi:

²⁰ Nun rumpirrà la canna ciaccata, e nun astutirrà lu mecciu, chi fuma, finchì avrà fattu triunfari lu giudiziu:

²¹ E li genti avrannu spiranza ntra lu so nomu.

²² Allura cci fu presentatu un spirdatu, orvu e mutu, e lu sanau di manera, ca parrava, e videva.

²³ E tutti li turbi si maravigghiavanu, e dicevanu: Nun è chistu lu figghiu di Davidi?

²⁴ Li Farisei però sintennulu, dissiru: Chistu nun scaccia li dimonj, ca pri menzu di Belzebù lu principi di li dimonj.

²⁵ E Gesù canuscennu li soi pinseri, cci dissi: Ogni regnu divisu contra se stissu, è desolatu: ed ogni cità, o casa divisa contra se stissa, nun pò stari mpedi.

²⁶ E si satanassu scaccia a satanassu, è divisu contra se stissu: comu dunca pò durari lu so regnu?

²⁷ E si iu cacciu li dimonj pri opera di Belzebù, li vostri figghi, cu chi lu caccianu? Perciò iddi sarannu li vostri judici.

²⁸ Ma si però iu cacciu li dimonj pri lu spiritu di Diu, puru arriva a vui lu regnu di Diu.

²⁹ O comu pò qualcunu trasiri ntra la casa d’ un omu forti, e pigghiaricci li soi mobili, si prima nun attacca l’ omu forti? Allura pò spugghiaricci la casa.

³⁰ Cui nun è cu mia, è contra di mia: e cui nun raccogghi cu mia, jetta.

³¹ Perciò vi dicu: Ogni piccatu, e bestemia sarrà pirdunata a l’ omini, ma la bestemia contra lu Spiritu nun sarrà pirdunata.

³² E a cui parrirrà contra lu Figghiu di l’ omu, sarrà pirdunatu: cui però parrirrà contra lu Spiritu santu, nun sarrà pirdunatu nè ntra stu seculu, nè ntra lu futuru.

³³ O faciti l’ arvulu bonu, e lu so fruttu è bonu: o faciti l’ arvulu malu, e lu so fruttu è malu: giacchì da lu fruttu si canusci l’ arvulu.

³⁴ Razza di vipari, comu putiti parrari beni, mentri siti mali? giacchì pri l’ abbunnanza di lu cori parra la vucca.

³⁵ L’ omu bonu da un tesoru bonu pigghia lu bonu: e l’ omu malu da un tesoru malu pigghia lu malu.

³⁶ E perciò vi dicu, ca d’ ogni palora mmatula, ca avrannu dittu l’ omini, nni darrannu cuntu lu jornu di lu giudiziu.

³⁷ Giacchì secunnu li toi palori sarrai giustificatu, e secunnu li toi palori sarrai cunnannatu.

³⁸ Allura cci rispusiru alcuni di li Scribi e di li Farisei, dicennu: Maistru, vulemu vidiri da tia qualchi miraculu.

³⁹ Lu quali rispunnennu cci dissi: La generazioni mala, ed adultera cerca un prodigiu: e nun cci sarrà datu autru signu, ca chiddu di Giona profeta.

⁴⁰ Giacchì comu Giona stetti ntra la ventri di la balena pri tri jorna, e tri notti, accussì lu Figghiu di l’ omu starrà ntra li visciri di la terra pri tri jorna, e pri tri notti.

⁴¹ L’ omini di Ninivi surgirrannu lu jornu di lu giudiziu contra di chista generazioni, e la cunnannirrannu: pirchì iddi ficiru pinitenza a li predichi di Giona. Ed eccu ccà cui è cchiù di Giona.

⁴² La riggina di lu menzu jornu surgirrà lu jornu di lu giudiziu contra sta generazioni, e la cunnannirrà: pirchì vinni da li confini di la terra pri sentiri la sapienza di Salamuni, ed eccu ccà cui è cchiù di Salamuni.

⁴³ Ora quannu lu spiritu immundu è nisciutu di l’ omu, curri pri li lochi aridi, circannu riposu, e nun lu trova.

⁴⁴ Allura dici: Riturnirrò ntra la me casa, d’ unni niscivi. E arrivatu la trova vacanti, scupata, e parata.

⁴⁵ Allura va, e si pigghia setti autri spiriti peju d’ iddu, e trasennu abitanu ddà: e l’ ultimu statu di st’ omu diventa peju di lu primu. Accussì succidirrà puru a chista generazioni pessima.

⁴⁶ Mentri stava parrannu a li turbi, eccu so matri, e li soi frati, chi stavanu fora, circannu di parraricci.

⁴⁷ Ed unu cci dissi: Eccu to matri, e li toi frati, chi stannu fora, e ti cercanu.

⁴⁸ Ma iddu rispunnennu a cui cci parrava, dissi: Cu’ è me matri, e cu’ sunnu li mei frati?

⁴⁹ E stennennu la manu versu li soi discipuli, dissi: Eccu me matri, e li mei frati.

⁵⁰ Giacchì cui farrà la volontà di me Patri, ca è ntra li celi: chistu è me frati, me soru, e me matri.