Secunnu Matteu 11 - Rut la Cantica di li Cantici e Matteu 1861 (volgarizzato in dialetto siciliano)

¹ E doppu di ciò, avennu Gesù finutu di ammuniri a li soi dudici discipuli, partiu di ddà pri nsignari, e pridicari ntra li cità d’ iddi.

² Ma Giuvanni avennu ntisu di li carzari l’ operi di Cristu, mannannu dui di li soi discipuli,

³ Cci dissi: Sì tu chiddu, chi avi a veniri, o nn’ aspittamu nautru?

⁴ E Gesù rispunnennu cci dissi: Jitivinni, ed annunziati a Giuvanni zoccu aviti ntisu, ed aviti vistu.

⁵ L’ orvi vidinu, li ciunchi caminanu, li libbrusi sunnu munnati, li surdi sentinu, li morti risurginu, li poviri sunnu evancelizzati:

⁶ E beatu è chiddu, chi nun sarrà scannaliatu di mia.

⁷ E chiddi jennusinni, Gesù accuminzau a parrari a li turbi di Giuvanni: Chi jistivu a vidiri ntra lu disertu? na canna sbattuta da lu ventu?

⁸ Ma chi jistivu a vidiri? un omu vistutu sfrazzusamenti? Eccu ca chiddi, chi sù vistuti cu sfrazzu sunnu ntra li casi di li re.

⁹ Ma chi jistivu a vidiri? un profeta? Sì vi dicu, e cchiù chi profeta?

¹⁰ Giacchì chistu è chiddu, di cui è scrittu: Eccu iu mannu lu mi ancilu avanti la to facci, lu quali preparirrà la to via avanti di tia.

¹¹ Vi dicu in virità, fra chiddi, chi sù nati da fimmina nun accumpariu mai unu cchiù granni di Giuvanni Battista: ma lu cchiù minimu ntra lu regnu di li celi, è maggiuri d’ iddu.

¹² Ma da lu tempu di Giuvanni Battista sinu ad ora, lu regnu di li celi è sfurzatu, e li viulenti si lu rapiscinu.

¹³ Giacchì tutti li profeti, e la liggi ficiru profezia sinu a Giuvanni.

¹⁴ E si vuliti cumprenniri, iddu è Elia, chi duvia veniri.

¹⁵ Cui avi oricchi pri sentiri, senta.

¹⁶ A cui pozzu però assimigghiari chista generazioni? È simili a li picciriddi, chi sidennu ntra la chiazza, gridannu a li soi cumpagni

¹⁷ Dicinu: Nui vi sunammu, e nun abballastivu: nni lamintammu, e nun chiancistivu.

¹⁸ Giacchì vinni Giuvanni nè manciannu, nè vivennu, e dicinu: Avi lu dimoniu.

¹⁹ Vinni lu Figghiu di l’ omu manciannu, e vivennu, e dicinu: Eccu un omu manciuni, e vivituri di vinu, amicu di li pubblicani, e di li piccaturi. E la sapienza è stata giustificata da li soi figghi.

²⁰ Allura accuminzau a rimproverari li cità, unni si sunnu operati multi di li soi virtù, ca nun avianu fattu pinitenza.

²¹ Guai a tia, Corozain, guai a tia, Betsaida: giacchì, si in Tiru, e Siduni fussiru stati operati li virtù, chi sunnu stati operati unni vui, da gran tempu avirrianu fattu pinitenza cu ciliziu e cu cinniri.

²² Puru iu vi dicu, ca Tiru, e Siduni sarrannu trattati lu jornu di lu giudiziu cu cchiù misiricordia di vuautri.

²³ E tu, Cafarnau, cridi forsi, ca sarrai esaltata sinu a lu celu? scinnirrai sinu a l’ infernu: giacchì, si ntra Sodoma si fussiru operati li virtù, chi sunnu stati operati unni tia, forsi chi durirrianu sinu a lu presenti jornu.

²⁴ Puru iu ti dicu, ca Sodoma sarrà trattata cu cchiù misiricordia lu jornu di lu giudiziu, ca tu.

²⁵ Ntra ddu tempu rispunnennu Gesù dissi: Sia gloria a tia Patri, Signuri di lu celu, e di la terra, ca nascunnisti sti cosi a li sapienti ed a li prudenti, e li rivelasti a li picciriddi.

²⁶ Accussì è, o Patri: giacchì accussì t’ è piaciutu.

²⁷ Ogni cosa m’ è stata data da mi Patri. E nuddu canusciu a lu Figghiu, se non chi lu Patri: nè nuddu canusciu lu Patri, se non chi lu Figghiu, e chiddu, a cu’ lu Figghiu lu vosi rivelari.

²⁸ Viniti unni mia, o vui tutti, chi siti travagghiati, ed aggravati, ed iu vi sullivirrò.

²⁹ Pigghiativi supra li spaddi lu me jugu, e mparati di mia, ca sugnu mansuetu ed umili di cori: e truvirriti la paci ntra l’ animi vostri.

³⁰ Giacchì lu me jugu è suavi, e lu me pisu è leggiu.