Secunnu Matteu 10 - Rut la Cantica di li Cantici e Matteu 1861 (volgarizzato in dialetto siciliano)

¹ E cunvucati li dudici discipuli soi, cci detti la potestà di scacciari li spiriti immundi, e di curari ogni malatia, ed ogni infirmità.

² Ora li nomi di li dudici Apostuli sù chisti. Lu primu, Simuni, dittu Petru, ed Andria so frati,

³ Japicu di Zebedeu, e Giuvanni so frati, Filippu, e Bartolomeu, Tumasi, e Matteu pubblicanu, Japicu d’ Alfeu, e Taddeu,

⁴ Simuni Cananeu, e Giuda Iscarioti, chi lu tradiu.

⁵ Chisti dudici li mannau Gesù; e cumannannuli, cci dissi: Nun jirriti unni li gentili, nè trasirriti ntra li cità di li Samaritani:

⁶ Ma cchiuttostu iti unni li pecuri pirduti di la casa d’ Isdraeli.

⁷ E jennu pridicannu, diciti: Ca s’ avvicina lu regnu di li celi.

⁸ Curati l’ infirmi, risuscitati li morti, munnati li libbrusi, cacciati li dimonj: comu aviti ricivutu gratis, dati gratis.

⁹ Nun vugghiati possediri nè oru, nè argentu, nè dinaru ntra li vostri cinturi:

¹⁰ Nun abbiati vertula pri lu viaggiu, nè dui vesti, nè dui para di scarpi, nè vastuni: giacchì l’ operariu è dignu di lu so nutrimentu.

¹¹ Ed in qualunqui cità, o casteddu trasirriti, dumannati, cui è omu dignu: e stativi ddà, finchì vi nni iti.

¹² E trasennu ntra la casa, salutati, dicennu: Paci ntra sta casa.

¹³ E si dda casa sarrà digna, la vostra paci vinirrà supra d’ idda: si però nun sarrà digna, la vostra paci riturnirrà supra di vui.

¹⁴ E qualunqui nun vi ricivirrà, nè sintirrà li vostri palori: niscennu fora di la casa, o di la cità, scutulativi lu purvulazzu di li vostri pedi.

¹⁵ Vi dicu in virità, ca sarrannu megghiu trattati chiddi di la terra di Sodoma, e di Gomorra lu jornu di lu giudiziu, ca chidda cità.

¹⁶ Eccu ca iu vi mannu comu li pecuri mmenzu di li lupi. Siati dunca prudenti comu li sirpenti, e simplici comu li palummi.

¹⁷ Guardativi addunca da l’ omini. Giacchì vi darrannu mmanu a li cuncilj, e vi flagellirrannu ntra li soi sinagoghi:

¹⁸ E sarriti purtati avanti a li guvernaturi, ed a li re pri causa mia pri testimonianza d’ iddi, e di li nazioni.

¹⁹ Quannu però vi purtirrannu, nun aviti bisognu di pinsari comu, o zoccu dirriti: mentri sapriti ntra chidda ura, zoccu aviti a diri.

²⁰ Giacchì nun siti vui, ca parrati, ma lu Spiritu di vostru Patri, chi parra in vui.

²¹ Ora lu frati purtirrà a so frati a la morti; lu patri a lu figghiu: e li figghi si rivutirrannu contra li soi parenti, e li purtirrannu a la morti:

²² E sarriti odiati da tutti pri lu me nomu: cui però avrà perseveratu sinu a la fini, chistu sarrà salvu.

²³ Quannu poi sarriti persequitati ntra na cità, fuitivinni ntra nautra. Vi dicu in virità, nun avriti firriatu li citati d’ Isdraeli, ca lu Figghiu di l’ omu sarrà vinutu.

²⁴ Nun cc’ è discipulu cchiù di lu mastru, nè servu cchiù di lu so patruni.

²⁵ Cci basta a lu discipulu d’ essiri comu lu so mastru: e a lu servu comu lu so patruni. Si avrannu chiamatu lu patruni di la casa Belzebù: quantu cchiù li soi domestici?

²⁶ Perciò nun li timiti. Giacchì nudda cosa è cummigghiata, chi nun sarrà rivelata: o occulta, chi nun si vinirrà a sapiri.

²⁷ Chiddu, chi vi dicu ntra li tenebri, dicitilu a la luci: e chiddu, chi sintiti a l’ oricchiu, pridicatilu supra li tetti.

²⁸ E nun abbiati paura di chiddi, chi ammazzanu lu corpu, giacchì l’ anima nun la ponnu ammazzari: ma cchiuttostu scantativi di chiddu, chi pò fari perdiri l’ anima, e lu corpu ntra l’ infernu.

²⁹ Dui passari nun si vinninu pri un dinaru: ed unu d’ iddi nun cadi supra la terra senza la volontà di vostru Patri?

³⁰ Ancu li capiddi di la vostra testa sù tutti cuntati.

³¹ Nun aviti perciò paura: vuautri siti megghiu di tanti passari.

³² Addunca cui m’ avrà ricanusciutu avanti a l’ omini, anch’ iu lu ricanuscirrò avanti a me Patri, ca è ntra li celi:

³³ Accussì cui mi avrà rinigatu avanti a l’ omini, iu anchi lu rinighirrò avanti a me Patri, ca è ntra li celi.

³⁴ Nun vugghiati cridiri, ca iu fussi vinutu a mettiri la paci ’n terra: nun sugnu vinutu a mettiri la paci, ma la spata.

³⁵ Giacchì sugnu vinutu pri separari lu patri di lu figghiu, la figghia di la matri, e la nora di la soggira:

³⁶ E li nnimici di l’ omu, li soi stissi familiari.

³⁷ Cui ama lu patri o la matri cchiù di mia, nun è dignu di mia: e cui ama lu figghiu o la figghia cchiù di mia, nun è dignu di mia.

³⁸ E cui nun pigghia la so cruci e mi sequita, nun è dignu di mia.

³⁹ Cu’ cerca di sarvari la so vita, la pirdirrà: e cui pirdirrà la so vita pri causa mia, la truvirrà.

⁴⁰ Cui ricivi a vui, ricivi a mia: e cui ricivi a mia, ricivi a chiddu, chi m’ ha mannatu.

⁴¹ Cui ricivi un profeta comu profeta, ricivirrà lu premiu di profeta: e cui ricivi un giustu comu giustu, ricivirrà lu premiu di giustu.

⁴² E cui avrà datu sulamenti a biviri ad unu di chisti minimi un biccheri d’ acqua frisca comu a discipulu: in virità vi dicu, nun pirdirrà lu so premiu.