Secunnu Matteu 1 - Rut la Cantica di li Cantici e Matteu 1861 (volgarizzato in dialetto siciliano)

¹ Libru di la generazioni di Gesù Cristu figghiu di Davidi, figghiu d’ Abramu.

² Abramu fici ad Isaccu. Isaccu fici a Giacobbi. Giacobbi fici a Giuda, e a li soi frati.

³ Giuda fici a Fares, e Zara cu Tamar. Fares fici ad Esron. Esron fici ad Aram.

⁴ Aram fici ad Aminadab. Aminadab fici a Naasson. Naasson fici a Salmon.

⁵ Salmon fici a Booz cu Raab. Booz fici ad Obed cu Rut. Obed fici a Gessi. Gessi fici a lu re Davidi.

⁶ Lu re Davidi fici a Salamuni cu chidda, chi fu mogghi d’ Uria.

⁷ Salamuni fici a Roboamu. Roboamu fici ad Abia. Abia fici ad Asa.

⁸ Asa fici a Giosafat. Giosafat fici a Gioram. Gioram fici ad Ozia.

⁹ Ozia fici a Gioatam. Gioatam fici ad Acaz. Acaz fici ad Ezechia.

¹⁰ Ezechia fici a Manassi. Manassi fici ad Amon. Amon fici a Giosia.

¹¹ Giosia fici a Geconia, e a li soi frati a lu tempu di la trasmigrazioni di Babilonia.

¹² E doppu la trasmigrazioni di Babilonia: Geconia fici a Salatiel. Salatiel fici a Zorobabel.

¹³ Zorobabel fici ad Abiud. Abiud fici ad Eliacim. Eliacim fici ad Azor.

¹⁴ Azor fici a Sadoc. Sadoc fici ad Achim. Achim fici ad Eliud.

¹⁵ Eliud fici ad Eliazar. Eliazar fici a Matan. Matan fici a Giacobbi.

¹⁶ Giacobbi fici a Giuseppi spusu di Maria, di la quali nasciu Gesù, chi si dici Cristu.

¹⁷ Tutti li generazioni dunca di Abramu sinu a Davidi sunnu quattordici generazioni: e di Davidi sinu a la trasmigrazioni di Babilonia sunnu quattordici generazioni: e di la trasmigrazioni di Babilonia sinu a Cristu sunnu quattordici generazioni.

¹⁸ La nascita di Gesù Cristu fu accussì: Essennusi maritata so matri Maria cu Giuseppi, prima chi si juncissiru, si truvau gravida pri opera di lu Spiritu santu.

¹⁹ Ora Giuseppi so maritu, essennu giustu, e nun vulennula nfamari, pinsau di mannarinnilla occultamenti.

²⁰ Ma mentri cci stava pinsannu, eccu un ancilu di lu Signuri, ca cci accumpariu ntra lu sonnu, dicennu: Giuseppi figghiu di Davidi, nun aviri paura di tiniriti a to mugghieri Maria: giacchì chiddu, ch’ è statu cunciputu in idda, è di lu Spiritu santu.

²¹ Idda parturirrà un figghiu: e cci darrai lu nomu di Gesù: giacchì iddu salvirrà lu so populu da li soi piccati.

²² Tuttu chistu fu fattu, acciocchì s’ adimpissi zoccu fu dittu da lu Signuri pri menzu di lu profeta, chi dici:

²³ Eccu la virgini sarrà gravida, e parturirrà un figghiu: e lu chiamirrannu pri nomu Manueli, chi voli diri: Iddiu è cu nui.

²⁴ Arrispigghiatusi dunca Giuseppi di lu sonnu, fici comu cci avia ordinatu l’ ancilu di lu Signuri, e si pigghiau a so mugghieri.

²⁵ E nun si cci junciu, sinu a chi parturiu lu so primu figghiu: e lu chiamau pri nomu Gesù.