Romiko lạgitʼ Pạul Apostolakʼ ciṭhi 8 - Santali Common Language New Testament

Sonot Jiu emakʼ jion

¹ Okoe Jisu Mạsireko kolom mitʼakan Isor do onko sạjạyokʼ lek mente bae hudiskoa.

² Jionren mạlik sonot Jiu reakʼ niạmge Jisu Mạsi hotete kại ar gujukʼ reakʼ niạm khone chaḍao akadińạ.

³ Manwawakʼ kại gunạkʼte ạnko do nijor akan tahẽkana, ona iạte ạn oka bae daṛeakʼkan tahẽkan, Isor ona do acʼgeye onka akada. Uni do kại meṭao lạgitʼ acʼren bin-dusạn Hopon manwa muṭhạn emkateye kolkedea ar acʼren Hoponakʼ gujukʼ hotete kại reakʼe bicạrketʼte ona reakʼ daṛeye ocokʼkeda.

⁴ Uni do noa iạtegeye onkakeda, jemon kại gobolre tahẽ baṅkate sonot Jiuakʼ gobolre bon senokʼte abore ạnko purạukʼ.

⁵ Okoe kại gobolre menakʼko onko do kại okae khoj ona reakʼgeko moneakʼa; ar okoe sonot Jiu gobolre menakʼko onko do sonot Jiu okae khoj ona reakʼgeko moneakʼa.

⁶ Kại okae khojkan ona reakʼ monejoṅakʼ do moron kana, ar sonot Jiu reakʼ khojogokʼ leka senokʼ do jion ar sulukge.

⁷ Okaṭakʼ mon do kại okae khoj onageye moneakʼ, ona mon do Isor birudgea, ente ona do Isorakʼ ạn bae bataoa ar manao hõ bae manaoa.

⁸ Onate okoe kại reakʼ gobolre menakʼko onko do Isor ohoko kusi oco daṛelea.

⁹ Menkhan Isorren Jiu apeakʼ ontorreye berel akan khan ape do kại gobolren dope baṅkana bickom sonot Jiu gobolren kanape. Okoeakʼ ontorre Mạsiren Jiu bạnui uni do Mạsiren doe baṅkana.

¹⁰ Menkhan Mạsi apeakʼ ontorre menae khan enḍekhan kại iạte apeakʼ hoṛmo gocʼlenre hõ aperen Jiu doe jiwetʼgea, ente Isor do dhorom menteye ataṅ akatʼpea.

¹¹ Okoe do Jisu gocʼko khone jiwetʼ beretʼakade uni Isorren Jiu apeakʼ ontorreye girobas akan khan, enḍekhan Isor do acʼren uni Jiu hotete apeakʼ gujukʼakʼ hoṛmo hõe jiwetʼ ocoetapea.

¹² Onate E boehako, abo do dharaoko kana bon, menkhan ona dharaoakʼ do kại ṭhen do baṅ. Kại gobolre colon reakʼ jạruṛ do ar bạnukʼ anaṅ.

¹³ Ape do kại gobolrepe colon khan jaejug lạgitʼpe gujukʼa. Menkhan sonot Jiu hotete hoṛmo reakʼ sanam bạṛicʼakʼ kạmikope marao giḍiletape khan, enḍekhan jaejug hạbicʼ jiwetʼpe tahena,

¹⁴ ente okoe Isorren Jiu hoteteko ạyur ocokʼkan onkoge Isorren hoponko hoyokʼa.

¹⁵ Ape ma golami reakʼ Jiu ma bape ńamakade one onatepe botorkokʼ; Ape do Isorren Jiupe ńam akadea one okoe do hopon hoyokʼ reakʼ ạidạriye emakatʼpe. Ona iạtege Isor do Abba, metakʼme Baba mente bon hohoaekana.

¹⁶ Sonot Jiu hõ acʼge aboakʼ ontorre noa gohae emetʼkana je, abo do Isorren gidrạko kana bon.

¹⁷ Ar gidrạko bon hoeakan khan, enḍekhan Isor acʼren gidrạko okaṭakʼ emokʼ reakʼe gokʼatʼko tahẽkan abo hõ ona bon ńama. Mạsige Isor ṭhen khon onae ńama ar abo hõ uni sãote ona bon ńama, ente Mạsi sãote bon harket sasetlen khan abo hõ uni sãote ṭhonokren bhạgiạdar bon hoyokʼ.

Okaṭakʼ ṭhonok bon ńam

¹⁸ Ińiń baḍaea, oka ṭhonok bon ńam ona tulucʼ jurikʼ lạgitʼ aboakʼ nahakʼ jug reakʼ harket ar sasetko do cetʼge baṅkana.

¹⁹ Isorren hoponko tinre ona ṭhonokteko sodorokʼa ona lạgitʼ sanam sirjon do gagocokʼ tulucʼe ńel horeda.

²⁰ Ente sirjon do ạuṛiakʼ ṭhene tabe ocoyena. Acʼakʼ kusite do baṅ hoeakana, Isorge uni doe tabe ocoakadea. Menkhan ona são sãote noa as hõe emakana,

²¹ sirjon do acʼ hõ nosṭokʼ reakʼ tonol khone chaḍao ocokʼte Isorren hoponkoakʼ ṭhonok reakʼ sạdhintetʼ lạgitʼ bhạgiạdare hoedaṛeakʼa.

²² Baḍaegea bon, goṭa sirjonge bedonte ńit hạbicʼ mitʼteko kũhrạuetʼ kana.

²³ Eken ona do baṅ, menkhan oka mạhima tayomte bon ńam, ona reakʼ pạhil jo lekate sonot Jiu ńamkate abo hõ apnarakʼ ontorre bon kũhrạukʼ kana. Ona sãote ona din lạgitʼ hõ ńel horre menakʼbona one tinre abo do Isorren hoponko mente bon sodor ocokʼ, metakʼme nonosṭoakʼ ti khon aboakʼ hoṛmo do sạdhinokʼ tabona.

²⁴ Kại khon bańcao ńamkate abo do noa asge bon ńamakada. Ar oka lạgitʼ bon asakan ona bon ńamakatʼ khan enḍekhan ona as do ar asge baṅ tahẽlena. Oka ńam akan, ona lạgitʼ do ar okoeye asokʼa?

²⁵ Menkhan oka baṅ ńam akan ona reakʼ aboakʼ as tahen khan enḍekhan abo do sombhurikatere hõ ona lạgitʼ bon ńel hohorkana.

²⁶ Noa chaḍa aboakʼ nijortetʼre sonot Jiu doe goṛo abon kana. Ar cetʼ leka koejoṅ lek tabon ona do babon baḍae kana, menkhan oka roṛte baṅ sodorokʼ onkan kũhrạu tulucʼ sonot Jiu do acʼge abo lạgitʼe nehõrokʼ kana.

²⁷ Okoe manwakoakʼ ontore ńeletʼkan uni do sonot Jiuakʼ mon reakʼ katha hõe baḍaea, ente sonot Jiu do Isorakʼ sanalekage Isorren hoṛko lạgitʼe nehõrokʼkana.

²⁸ Baḍaegea bon okoe Isorko dulạṛede, metakʼme Isor acʼakʼ monsubạ leka okoekoe hohoakatʼko onko bhạlạiko lạgitʼ jotowakʼge mitʼ sãoteye kạmikana.

²⁹ Isor do okoeko lahareye bachao akatʼko onko do acʼren hopon hoyokʼ lạgitʼ laha khongeye ṭhik doho akatʼko tahẽkana, jemon uni Hopon do ạḍi utạr boehako modre maraṅicʼe hoyokʼ.

³⁰ Okoe laha khone ṭhik dohoakatʼko tahẽkan onko do hoho hõe hohoatʼkoa; ar okoeye hohoatʼko onko do dhorom mente ataṅ hõe ataṅketʼkoa; ar okoeko dhorom menteye ataṅketʼko onko do acʼakʼ ṭhonok hõe danatʼkoa.

Isorakʼ dulạṛ

³¹ Enḍekhan noako babotre cetʼbon menkea? Isor abo tulucʼ menae khan enḍekhan jãhãeye hạn daṛekebona?

³² Isor do acʼren Hopon hõ bae mãyãwadea bickom abo sanamko lạgitʼ gujukʼ tireye emkedea. Enḍekhan uni do cetʼ Hopon sãote ar sanamakʼko bae danabona?

³³ Isor okoekoe bachao akatʼko onko birudre do okoeye lạlisa? Isor acʼge coṅ onko ma dhorom menteye ataṅ akatʼko.

³⁴ Ar okoe hale onko do dusi menteye ṭahraokoa? Okoeye gocʼlen ar gocʼko khone jiwetʼ beretʼ ocoyen uni Mạsi Jisu do ńitokʼ Isorakʼ jojomsa aṛere menaea ar abon lạgitʼe nehõrokʼ kana.

³⁵ Nonkanakʼ cetʼ menakʼa one onate Mạsiakʼ dulạṛ khone begar daṛeabon? Saset? Mon reakʼ kosṭo? Santao? Reṅgecʼ? Kicricʼ khạnḍwạkʼ reakʼ okulạn? Muhin? Se gujukʼ?

³⁶ Sonot sostorre olakana, am iạte jaogele gocʼ ocokʼ kana: ar jabe ocokʼ bhiḍiko lekageko hudisetʼlea.

³⁷ Menkhan okoe apeye dulạṛetʼpe uni hotete noa sanamakʼ talate hõ abo do purạute bon jitạu akana.

³⁸ Iń do noa katha bes okocʼtegeń baḍaea, moron se jion, serma goḍet se Soetanren goḍet, menakʼakʼko se darakanakʼko se eṭakʼ jãhãn daṛeko,

³⁹ se serma cetan se dhạrti latar reakʼ jãhãnakʼ sirjạukʼge okoe hõ Isorakʼ dulạṛ khon ohoko begar daṛelebona. Isorakʼ noa dulạṛ do aboren Probhu Mạsi Jisurege menakʼa.