Romiko lạgitʼ Pạul Apostolakʼ ciṭhi 5 - Santali Common Language New Testament

Dhorom mente ataṅ ocokʼ reakʼ jo

¹ Biswạs hotetege bon dhorom ocoakana ar ona iạtege Probhu Jisu Mạsi hotete Isor ar abo talare suluk hoeakana.

² Ńitokʼ Isorakʼ daya reakʼ oka horte bon calakʼkan onḍe do Mạsire pạtiạu iạte bon seṭer akana. Ar Isorakʼ ṭhonok ńam reakʼ asre bon rạskạkʼ kana.

³ Eken ona do baṅ, harkhet sasetre hõ bon rạskạkʼ kana, ente bon baḍaea harkhet saset reakʼ jo do soboriye hoe ocoea,

⁴ ar sobori reakʼ jo do bhage colon ar bhage colon reakʼ jo do asge.

⁵ Noa as do bae lajao ocobona, ente Isore emakan sonot Jiu hotete aboakʼ ontor do acʼakʼ dulạṛteye perecʼ akada.

⁶ Nijor bon tahẽkanre Mạsi do ṭhik okterege be-bhoktiae manwako lạgitʼ, metakʼme abon lạgitʼgeye gocʼlena. Jãhãe dhorom hoṛ lạgitʼ okoehõ jiwi do bako em lạgidokʼa.

⁷ Okoe eṭakʼkoe bhạlạyetʼko onkan hoṛ lạgitʼ hoedaṛeakʼa jãhãe dilkate jiwi emreye hõ em daṛekea.

⁸ Menkhan Isor je aboe dulạṛetʼ bon ona reakʼ cinhạ do noage, kại hoṛ bon tahẽkanrege Mạsi do abo lạgitʼ jiwiye emkeda.

⁹ Enḍekhan Mạsiakʼ mãyãm hotete tinre abo do dhorom mente bon ataṅ ocoakana unre abon do Mạsi hotetege Isorakʼ sạjại khon khạṭige rukhiyạ bon ńama.

¹⁰ Abo do Isorren bạiribon tahẽkanre acʼren Hoponakʼ gujukʼte uni tulucʼ bon samge ocoakana. Ar nonkage bon samge ocoakante Mạsiakʼ jionte khạṭige kại khon bańcao bon ńama.

¹¹ Eken ona do baṅ, okoe hotete Isor tulucʼ bon samge akan uni Probhu Jisu Mạsi hotete abo do Isor sãote bon rạskạ midokʼ kana.

Adam ar Mạsi

¹² Mitʼṭen manwa hotete dhạrtire kại boloyena ar ona kại hotete gujukʼ hõ boloyena. Ente sanam manwako kại akatʼte sanamko ṭhenge gujukʼ hõ boloyena.

¹³ Moseakʼ ạn ạuri tahen khonge dhạrtire do kại tahẽkana, menkhan ạn baṅ tahen khan kại do kại mente oho lekha lena.

¹⁴ Enrehõ Adam khon ehopʼkate Mose hạbicʼ sanamko cetanrege gujukʼ do raje calaokeda. Isorakʼ hukum manao baṅkate okoe do Adam leka bako kại akatʼ onko cetanre hõ gujukʼ do raje calaoleda. Ar okoeakʼ hijukʼ reakʼ katha tahẽkan, uni Jisu Mạsiren nạmunage Adam doe tahẽkana.

¹⁵ Menkhan Adamakʼ kại ghạṭko okaleka kan, Isorakʼ bin damanakʼ dan onka do baṅkana. Tinre mitʼṭen hoṛakʼ kại iạte aema doko gocʼena, unre Isorakʼ daya ar mitʼṭen manwa hotete oka dan hecʼen, ona do artetʼ aemako lạgitʼge sareṛena! Ar uni mitʼṭen manwa doe hoyokʼ kana Jisu Mạsi.

¹⁶ Isorakʼ dan do Adamakʼ kại reakʼ jo leka do baṅkana, ente mitʼṭen kại reaṅ bicạr lekate sanam manwakoge sạjại lek kanako menteko lekha ocoakana, menkhan dhorom mente Isor ṭhen ataṅokʼ reakʼ nokʼoe noa daya dan, ona do ạḍi utạr kại iạte hecʼakana.

¹⁷ Mitʼṭen manwawakʼ kại gunạkʼte gujukʼ ar uni mitʼ hoṛ hotetege rajokʼe ehopʼleda. Menkhan okoe do Isorakʼ asambheṛ daya ar dhorom menteko ataṅ ocokʼ, onko do uni mitʼ hoṛ, metakʼme Jisu Mạsi hotete sạri jion reakʼ perecʼtetʼ iạte khạṭigeko rajokʼa.

¹⁸ Enḍekhan mitʼṭen kại hotete cetʼleka sanam manwako sạjại ńam lek kanako menteko lekhakʼ kan, onkage mitʼṭen dhorom kạmi hotete sanam manwakoge dhorom mente aṅgocko lạgitʼ bondobos hõ dohoakana ar ona reakʼ jo do hoyokʼ kana jaejug jion.

¹⁹ Cetʼleka mitʼṭen manwawakʼ bebakʼtao hotete ḍherkoge kại hoṛ menteko lekhayen, onkage mitʼṭen manwawakʼ batao iạte ḍher hoṛ do dhorom menteko ataṅ ocokʼa.

²⁰ Ạn-ạriko emena jemon behokakʼko ḍherokʼ, menkhan okare behokakʼ ḍherena onḍege Isorakʼ daya hõ artetʼge bạ̃ṛtiyena.

²¹ Ona daya do noa iạtege ḍherena jemon gujukʼ talate cetʼleka kại do raje calaoetʼ tahẽkan, onkage manwa hõ dhorom menteye aṅgocokʼte ńitokʼ uniakʼ daya do rajokʼ: ar ona reakʼ jo do hoyokʼkana aboren Probhu Jisu Mạsi hotete jaejug jion hameṭ joṅ.