Romiko lạgitʼ Pạul Apostolakʼ ciṭhi 13 - Santali Common Language New Testament

Disạm cakʼlaoko manaoko reakʼ

¹ Sanamkoge disạm cakʼlaoko tabereko tahenma; ente Isor okoeye hoeocoye uni chaḍa ar okoe hõ ektiạrianicʼ do bae hoedaṛeakʼa. Isorge disạm cakʼlaokoe bahal akatʼkoa;

² Onate ektiạrianko birudre okoeye teṅgon, uni do Isorakʼ ḍanṭaoakʼko birudregeye teṅgon kana. Ar okoeko nonkayetʼkan onko do akotege sạjạiko ạgujoṅ kana.

³ Okoe bhageakʼko kạmikan onko do ektiạrianko ohoko botorlekoa, menkhan okoe bạṛicʼakʼko kạmikan onkogeko botorokʼa. Ape do ektiạrianko begor botorakote senokʼpe khojkana? Enḍekhan bhageakʼko kạmipe, inạ khan onko ṭhen khon sabasipe ńama.

⁴ Apeakʼ bhage lạgitʼge uni do Isorren sapʼdapʼicʼ lekae kạmiya. Ar bạṛicʼakʼpe kạmikan khan botorokʼpe, ente bạṛicʼakʼ kạmikanko sạjạiko reakʼ ektiạri do uniakʼ menakʼtaea. Uni doe Isorren sapʼdapʼicʼ kana; ar okoe bạṛicʼakʼko kạmikan onko do Isor lekate sạjạiye emakoa.

⁵ Onate ektiạrianko tabere tahen do jạruṛgetapea. Isorakʼ sạjại botorte onkoakʼ gobolre tahenpe aṅgoceda ona do baṅ, apeakʼ bibek sapha dohoe lạgitʼ hõ onape onkayeda.

⁶ Onatege ape do raj bhejape emetʼ kana, ente mạsul uṭhạuko do akoakʼ kạmi hotete Isorakʼko kạmikana.

⁷ Okoeakʼ oka paona ona emkataepe. Khajna hataoicʼ do khajna; mạsul uṭhạuicʼ do mạsul; botorae lekicʼ do botor; ar manot emae lekicʼ do manot emaepe.

⁸ Okoe ṭhen hõ jãhãnakʼge alope dharaoa, eken dulạṛ chaḍa. Okoe eṭakʼkoko dulạṛetʼko onko do Moseakʼ ạngeko pańja akada.

⁹ Hukum menakʼa, “Alom laṭghaṭa, alom khũna; alom kombṛoea, alom lalocakʼa.” Noako ar noa lekan arhõ eṭakʼ hukumko do niạ katharege guṭ mitʼkate noage roṛakana je, “Am aḍepaseren hoṛ apnar leka dulạṛem.”

¹⁰ Dulạṛ do okoeakʼ bạṛicʼ hõ bae khoja. Enḍekhan ńelokʼ kana dulạṛ hotetege sanam ạn do purạukʼ kana.

¹¹ Un ghạṛicʼ okań roṛketʼ, ńit reakʼ okteko bujhạukate onka leka calakʼpe. Jạpitʼ khon ebhenokʼ reakʼ okte hoeakana, ente abo tinre bon pạtiạulen, un khon boroṅ ńitokʼge bańcao ńam reakʼ okte do artetʼ sorakana.

¹² Ńindạ do caba hecʼena, aṅgakʼ lạgidokʼ kana; onate dela, ńut reakʼ kạmi bạgikate marsal reakʼ khanḍa banḍa bon horokʼ joṅma.

¹³ Rij roṅ ar ńu bulokʼte do baṅ, loṭghuṭi ar lucạ lamoṭte do baṅ, reṭha reṭhi ar hiskạte do baṅ, menkhan siń marsalre dãṛãnkanko leka jion bon khemao ma.

¹⁴ Ape do kicricʼ leka Probhu Jisu Mạsi horokʼjoṅpe; ar jel reakʼ sana purạu lạgitʼ do alope moneakʼa.