Romiko lạgitʼ Pạul Apostolakʼ ciṭhi 12 - Santali Common Language New Testament

Isor lạgitʼge Jion khemao

¹ Enḍekhan E boehako, Isorakʼ noako daya iạtege iń do asokaeteń nehõrape kana, apeakʼ hoṛmo do jiwetʼ, sonot ar Isore kusiyakʼ dãṛẽ menkate uni ṭhen samaṅpe. Ar onage apeakʼ lek reakʼ sewa do hoyokʼa.

² Noa bạṛicʼ piṛhirenko leka do alope colona, bickom Isorge apeakʼ mon nawate tear ocowaepe ar purạte nawa arokʼpe, jemon Isorakʼ monejoṅakʼpe baḍae daṛeakʼ. Isorakʼ monejoṅakʼko do bhagegea, ar purạ khạṭigea ar onate Isor doe kusikʼkana.

³ Iń do Isor ṭhen khon oka dayań ńamakatʼ onate ape mimitʼkoń metapekana, apnar reaṅ okaṭakʼ lek kan ona khon bạ̃ṛti do alope hudisokʼa, bickom tinạkʼ lek mentepe bujhạukʼkan inạkʼge hudisokʼpe. Isor do okoe tinạkʼgan pạtiạukʼ reakʼ daṛeye emakawade ona khon bạ̃ṛti do okoe hõ jemon apnarte aloe hudisokʼma.

⁴ Abo mimitʼkoakʼ hoṛmore do aema hạṭińko menakʼa, menkhan joto hạṭińko do mitʼ leka bae kạmiya;

⁵ ṭhik onkage abo do lekhare bon ḍhergere hõ Mạsire bon mitʼ akante mitʼ hoṛmoge bon hoeakana. Ar abo mimitʼko do eṭakʼkoakʼ hoṛmo hạṭińko kana bon.

⁶ Isorakʼ daya lekate abo do judạ judạ daya dan bon ńamakada. Ar ona daya dan do nạbi lekate katha roṛ reakʼ daṛe menakʼ khan enḍekhan biwạs lekate uni do Isorakʼ kathae lạima.

⁷ Ar sapʼ dapʼ reakʼ daṛe hoyokʼ khan enḍekhan uni do sapʼ dapʼ giriye kạmi ma. Okoe cecetʼakʼ emokʼ reakʼ daṛeye ńamakatʼ uni doe cetʼakoma;

⁸ okoe sikhạu paṛhao reakʼ daṛeye ńamakatʼ uni doe sikhạu paṛhaokoma; okoe eṭakʼko danako reakʼ daṛeye ńamakatʼ, uni do soṛa monteye emokʼma; okoe mukhiyạ hoyokʼ reakʼ daṛeye ńamakatʼ uni do jidkateye calaoma; ar okoe eṭakʼko goṛowako lạgitʼ daṛeye ńamakatʼ uni do kharsala monteye goṛoakoma.

Mạsire pạtiạu akankoakʼ jion

⁹ Dulạṛre phạsiạra do alo tahenma. Okaṭakʼ bạṛicʼakʼkan ona do hirkhạwakʼpe; ar bhageakʼre jamaṛ akae tahenpe.

¹⁰ Ape ape talare boeha leka dupulạṛpe. Ar apnar khon eṭakʼko bạ̃ṛti manotkope.

¹¹ Probhu secʼ jao ghuṛi apeakʼ mon ahkaokʼtape ma. Apeakʼ ontor do bhoktite perecʼ tahen ma. Ar Probhuakʼ kạmire lạgiạ paṛao akan tahenpe.

¹² Apeakʼ okaṭakʼ as menakʼ, ona iạte rạskạkʼpe. Harkhet sasetre soboripe. Koejoṅre jamaṛakan tahenpe.

¹³ Isorren hoṛko reṅgejokʼ oktere goṛowakope. Ar peṛakʼ gun dohojoṅpe.

¹⁴ Okoeko khedetʼpe onko do alope sarapakoa bickom bhorakope.

¹⁵ Okoeko rạskạkʼkan onko tulucʼ rạskạkʼpe; ar rakʼ joṅko tulucʼ do rakʼjoṅpe.

¹⁶ Ape apere mitʼ mon tahentape ma. Usulakʼko do alope moneakʼa bickom nindhạnko tulucʼ helmelokʼpe. Apnarte budanko mente alope hudisokʼa.

¹⁷ Bạṛicʼ bodol bạṛicʼ okoe hõ alope halawakoa. Sanam hoṛkoakʼ mẽtʼre okaṭakʼ bhageakʼ kan ona reaṅ moneakʼpe.

¹⁸ Daṛeakʼ bhor sanam hoṛko sãote sulukte tahenpe.

¹⁹ Dulạṛiạ boehako, okoe hõ alope hala ruạṛakoa, bickom Isorge sạjại lạgitʼ aṛakʼaepe. Sonot sostorre Probhui meneda, “Hala hạli sạjại emokʼ reakʼ ektiạri do eken ińakʼge menakʼa; ar ińgeń hala ruạṛakoa.”

²⁰ Sostor reakʼ katha leka, “Amren bạiri reṅgecʼlere jomakʼ emaeme; ar tetaṅlere ńũiyakʼ emaeme. Entem nonkale khan uniakʼ bohokʼre seṅgel aṅgram puńjiaea.”

²¹ Bạṛicʼakʼte alom bhagao ocokʼa, bickom bhageakʼte bạṛicʼakʼ bhagaome.