Romiko lạgitʼ Pạul Apostolakʼ ciṭhi 1 - Santali Common Language New Testament

Johar katha

¹ Iń Pạul Jisu Mạsiren golam do Rom nagraharen biswạsiko ṭhen noa ciṭhiń oletʼkana. Isor do acʼren apostol hoyokʼ lạgitʼe hoho akawạdińa ar uniakʼ bhage sombat porcar lạgitʼ hõe bachao akadińạ.

² Isor do acʼren nạbiko hotete sonot sostorkore noa bhage sombat reakʼ laharegeye gokʼ dohoakatʼ tahẽkana.

³ Ona bhage sombat do hoyokʼ kana acʼren Hopon reaṅge. Ar uni Hopon kangeae Jisu Mạsi, ar aboren Probhu do. Hoṛmo secʼ lekate uni do Dạud bõsrengeye tahẽkana,

⁴ ar acʼren sonot Jiute uni do maraṅ daṛe salakʼ gocʼko khone jiwetʼ beretʼente Isorren Hopon menteye sodorlena.

⁵ Uni hotete ar uniakʼ ńutum iạte ale do daya ar apostol hudạle ńamakada, jemon sanam jạtren hoṛko pạtiạukʼte Isorakʼko bataotae.

⁶ Onko hoṛko modre ape hõ menakʼpea. Jisu Mạsiren hoṛ hoyokʼ lạgitʼ Isorge ape doe hoho akawatʼpea.

⁷ Rom nagraharen okoeko hoṛ do Isore dulạṛetʼko ar acʼren hoṛ hoyokʼ lạgitʼe hohoakatʼko, onko sanamko ṭhen, metakʼme ape ṭhenge iń do noa ciṭhiń oletʼkana. Aboren Isor Baba ar Probhu Jisu mạsi doe mãyã apema ar suluke dan apema.

Pạul Romte calakʼ reakʼe gagojokʼ kan

⁸ Pạhilrege iń do Jisu mạsi hotete ape sanamko iạte ińren Isoriń gunmanao joharae kana, ente apeakʼ biswạs reakʼ katha do goṭa dhạrtire pasnao akana.

⁹ Isorren Hopon reaṅ bhage sombat porcarte ińakʼ goṭa ontorte iń do Isoriń sewawae kana. Iń do tinạkʼ dhaoiń koejoṅkan unạkʼ dhaoge apeń disạ akatʼpea, ar onaren goha do unige.

¹⁰ Ińakʼ koejoṅ do noage, jãhã lekate Isor reakʼ monete jemon ape ṭheniń sen daṛeakʼ.

¹¹ Ar ape daṛe ocope lạgitʼ jemon jãhãn Jiuanakʼ daya daniń em hạṭiń daṛeape onate ape tulucʼ ńapamokʼ iń menjoṅ kana.

¹² Noa do hoyokʼ kana, abo sanamko jemon apan ạpin biswạs khon udgạu bon ńam.

¹³ E boehako, noa katha baḍaepe, ḍher dhao ape ṭhen calakʼ sanaledińre hõ ńit hạbicʼ akoṭakʼko do hecʼạń kangea. Cetʼleka eṭakʼ eṭakʼ jaegakore boṅgan hoṛ jạtrenko talare porcarkate jo iń ńamakatʼ, onkage apeko talare hõ thoṛa jo ńam reakʼ aste ape ṭhen calakʼ iń menjoṅ kana.

¹⁴ Sobbho ar osobbhoko, akelanko, bebujko ar sanamko ṭhenge iń do rinakatʼ hoṛ leka kạnạń.

¹⁵ Onate okoe Romre menakʼpe ape ṭhen hõ Jisu Mạsi reaṅ bhage sombat jạhirape lạgitʼ doń khaṛagea.

Bhage sombat reakʼ daṛe

¹⁶ Jisu Mạsi reaṅ noa bhage sombat iạte iń do bạń lajaokʼ kana, ente noa bhage sombat do Isorakʼ daṛe kana one oka hotete uni do sanam biswạsiko kại khone bańcaoko. Pạhilte do Jihudiko, ar ona tayom do boṅgan hoṛ jạtrenkoge.

¹⁷ Isor manwako cetʼlekate dhorom menteye ataṅko ona do bhage sombat hotete sodor akana. Etohopʼ khon mucạtʼ hạbicʼ pạtiạu hotetege manwa do eken dhorom menteye ataṅ ocokʼa. Sonot sostorre olakana; “Dhoromicʼ do pạtiạu hotete jione ńama.”

Manwa doko dusigea

¹⁸ Manwa do Isorakʼ sạriakʼtetʼ bedhoromteko ten esetʼeda, onate sanam bebhokti ar sanam bedhorom kạmiko iạte serma khon Isorakʼ edre do manwakore sodorokʼ kana.

¹⁹ Isor reaṅ oka baḍaeyokʼakʼ ona do manwako ṭhen pusṭạugea, ente Isor acʼtetʼge onko ṭhen onae sodor akada.

²⁰ Isorakʼ oka gun mẽtʼte baṅ ńelokʼkan, metakʼme uniakʼ jaejug reakʼ daṛe ar uniakʼ Isortetʼ do sirjon reakʼ etohopʼ khonge pusṭạute sodorgea. Uniakʼ sirjon khonge manwa do bes okocʼte onako ńel oromeda arko bujhạu daṛeakʼ kana. Niạ tayom manwakoakʼ do ar jãhãn ạnḍuṅteakʼ baṅ tahena.

²¹ Manwa do uni reakʼakʼko baḍaekatere hõ Isor mente bako mạhimawadea, ar bako gunmanao joharadea. Onkoakʼ hudisjoṅakʼko do ạuṛiakʼena ar onkoakʼ bebuj ontor do ńutte perecʼ akana.

²² Onko do akote akelan hoṛ menteko lạiạgokʼkanre hõ asokaete onko doko lelhagea.

²³ Jaejug ṭhonokte perecʼicʼ Isor sewa bạgikate onko do manwako, cẽṛẽko, janwarko ar leńokʼ ṭunḍạṅokʼkoakʼ muṭhạnko sewawakʼ kana.

²⁴ Onate Isor do manwako akoakʼ ontor reakʼ bạṛicʼ sana ar hirkhạwakʼ kạmi lạgitʼe aṛakʼatʼkoa. Onate onko do ako akore hirkhạwakʼko kạmikante akoakʼ hoṛmoko bemanoteda.

²⁵ Isorakʼ sạriakʼtetʼ bạgikate eṛeakʼko ataṅ akawana. Sisirjạuicʼ bạgikate uniakʼ sirjạuakʼko sewawakʼ kana, menkhan sanam mạhima do jaejug hạbicʼ uni sisirjạuicʼakʼ kangea. Amen.

²⁶ Manwa noakoko kạmi akatʼte Isor do lajaote perecʼ rij roṅreye soprotkatʼkoa. Ente maejiuko do herel tulucʼ baṅkate eṭakʼ maejiuko tulucʼ bạṛicʼ ar lajao paṛaoakʼ kạmiko kạmi kana.

²⁷ Onkage herel hõ maejiuko baṅkate herel tulucʼ rij roṅteko jaljalaokʼ kana; ar herel do herel tulucʼ lajao paṛaoakʼ bạṛicʼ kạmiko kạmikana. Onate onko mitʼke mitʼ hoṛ do akoakʼ bạṛicʼ kạmi reakʼ sạjại akoregeko ńameda.

²⁸ Nonkate manwa do Isor bako manaoedete Isor hõ kại monreye soprotkatʼkoa, ar onatege manwa do be ṭhikakʼko kạmikana.

²⁹ Jotolekan bedhorom, dusṭạmi, laloc, nicạṛakʼ, hiskạ, khũn, kạphạriạu, eṛe ar eṭakʼkoakʼ loksan tako reakʼ sanateko perecʼ akana. Onko do eṭakʼ hoṛ reaṅko cuglia,

³⁰ eṭakʼkoakʼko oktawa ar Isorko hirkhạwaea. Onko do raṅgaokʼko, usul monanko ar bạḍạiko kanako. Bedhorom kạmi lạgitʼ nawa nawa ponthako ńamtotʼeda. Onko do go-baba bebataoko kanako,

³¹ boge bạṛicʼ papachnao reakʼ akel bạnukʼtakoa, bepạtiạrko kanako. Gharońjrenko lạgitʼ dulạṛ do bạnukʼtakoa, enteko kumãyãgea.

³² Isorakʼ bicạr reakʼ katha mońjtegeko baḍaea je, okoe nonkanakʼko kạmi onko do gujukʼ sạjại lek kanako mente. Ar noa katha baḍaekate hõ eken niạgeko kạmikana ona do baṅ, bickom eṭakʼko hõ onkan kạmi lạgitʼko sãhãkʼako kana.