Philimon 1 - Santali Common Language New Testament

¹ Iń Pạul do Mạsi Jisuren kạidiń hoeakana. Iń ar ạlińren pạtiạricʼ boeha Timothi do ạlińren dulạṛiạ gate ar são kạmiyicʼ Philemon ṭhen,

² Ạlińren misera Apphia ṭhen, ạlińren são palṭon Arkippus ṭhen ar amakʼ oṛakʼre tinạkʼ do manḍerren lekateko jarwakʼkan onko ṭhen noa ciṭhi liń oleda.

³ Aboren Isor Baba ar Probhu Jisu Mạsi do daya ar suluke dan apema.

Pạulakʼ koejoṅ

⁴ Iń do jaoge koejoṅreń disạyetʼmete Isoriń gun manao joharae kana,

⁵ Ente Probhu Jisure amakʼ biswạs ar Isorren hoṛko lạgitʼ amakʼ dulạṛ reakʼ kathań ańjomeda.

⁶ Iń do noań koejoṅ kana, amakʼ biswạs khạtirte ar amakʼ dan hotete Mạsi jemone sarhaokʼ. Ona chaḍa Mạsi tulucʼ bon kolom mitʼ akante oka bhorbon ńamakatʼ ona purạtem bujhạu daṛeakʼte dan lạgitʼ kạmi jemon arhõ ḍherokʼtam.

⁷ E boeha, amakʼ dulạṛ ńelte iń do ạḍiń rạskạkʼ kana ar udgạuiń ńamakada, ente am do Isorren hoṛkoakʼ ontorre nawate udgạu monem sagen ocoakada.

Onesimus lạgitʼ nehõr

⁸ Onate Mạsi hotete amakʼ dạyikʼ babotre ạḍi dil salakʼ iń hukum daṛekema,

^9-10 enhõ dulạṛ iạte iń do ona bodolte amiń nehõram kana. Mitʼṭen haṛam hoṛ lekate ar ńitokʼ Jisu Mạsi lạgitʼiń bondi akante iń Pạul do am ṭhen ińren hopon Onesimus lạgitʼ iń nehõram kana. Hajotre ińakʼ bondi dosare uni do biswạsi lekate ińren hopone hoeakana.

¹¹ Mitʼ jokhecʼ am ṭhen uniakʼ jãhãn damge baṅ tahẽkana, menkhan ńitokʼ uni do bana hoṛ ṭhenge porhowanicʼ kanae.

¹² Jaehok, am ṭheniń kolekana; uni do ińren dulạṛiạ gate kanae.

¹³ Ińakʼ kạmi lạgitʼge iń ṭhen dohokayiń menetʼ tahẽkana, jemon bhage sombat porcar khạtirte ińakʼ noa bondi dosare uni do am huyạte ińe sapʼsor daṛeạńa.

¹⁴ Menkhan amakʼ hukum begorte cetʼ cekaege bạń khojkana, jemon jormoṭte daya aloe ńam, bickom am apnar khonem dayawae.

¹⁵ Ar jaejug lạgitʼ jemonem ńam ruạṛe, hoedaṛeakʼa onatege uni do thoṛa ghuṛi lạgitʼ am khone begarlena.

¹⁶ Menkhan golam lekate do ar bam ńamea bickom golam khon hõ ḍher metakʼme, dulạṛiạ boeha lekatem ńamea. Ińren do ạḍi dulạṛiạ kanae, menkhan manwa ar biswạsi boeha lekate am ṭhen do artetʼge.

¹⁷ Onate inạ mitʼ biswạsi mentem hudis edeńkan khan enḍekhan iń cetʼlekam ataṅedeń onkage Onesimus hõ ataṅeme.

¹⁸ Ar amakʼ jãhãnakʼe lokshan akatʼtam khan se am ṭhen jãhãnakʼ babotre rin menakʼtae khan ona do ińakʼ rin kana mente bujhạume.

¹⁹ Iń Pạul do nij tite noa ciṭhiń oleda ar ona rin reakʼ iń hala ruạṛ katama. Hẽ noa katha do roroṛ reakʼ jạruṛ bạnukʼa je, Mạsire biswạs babotre amge iń ṭhenem rinigea mente.

²⁰ E boeha, Probhuren bon hoeakante ińakʼ monejoṅakʼ do noage je, am do mitʼṭen upʼkạrińme. Biswạsi boeha lekate am do ińakʼ monre nawate udgạu ińme.

²¹ Am do ińakʼ katham senakʼa menteń baḍaete noa ciṭhiń olam kana. Menkhan ińiń baḍaea, iń okań lạiamkan ona khon hõ am do ḍhergem onkaea.

²² Ar mitʼṭen kathań metamkana, peṛakoakʼ kandha do iń lạgitʼ sapṛao dohokakʼme, ente asokʼ kạnạń, apeakʼ koejoṅte iń do ape ṭheniń kol ruạṛ ocokʼa.

²³ Epaphrase hõe joharam kana; uni do Jisu Mạsi iạte iń tulucʼ hajotre menaea.

²⁴ Ona chaḍa Mark, Aristarkhos, Demas ar Luk, ińren noko são kạmiyạko hõ amko joharam kana.

²⁵ Aboren Probhu Jisu Mạsiakʼ daya apeakʼ jiu tulucʼ baṛe tahenma.