Mathae 8 - Santali Common Language New Testament

Mitʼṭen murhucʼ jom rugiye bogeyen

¹ Jisu buru khone pheḍ hecʼen khan ạḍi utạr hoṛ do uniko pańja idikedea.

² Unre mitʼṭen murhucʼ jom rog hoṛ do hecʼkate sewawadeteye menkeda “E Probhu, sanalem khanem sapha daṛeạńạ.”

³ Jisu do ti tiạrkate joṭetʼkedeteye metadea, “Sanań kangea, ma saphakokʼ me.” Ar unrege murhucʼ jom rog do bogeyentaea.

⁴ Ar Jisu do uniye metadea, “Men, okoe hõ alom lại baṛawakoa; bickom senkate naeke ṭhen ńel ocokʼme, ar Moseye hukum akatʼ leka dan samaṅme. Onate hoṛko ṭhenem sạbudokʼa am dom bogeakana.”

Subedarren guti koṛae bogeyen

⁵ Jisu Kapharnạhum nagrahateye boloyen khan, mitʼṭen Romiạ subedar do uni ṭhen hecʼkate nehõrenteye menkeda,

⁶ “E Probhu, ińren guti do aṭetʼreye jaṛao akana. Uni do mitʼkaṛ gocʼ rogte ạḍitetʼe sasetokʼ kana.”

⁷ Jisu do uniye metadea, “Senkateń bogeyea.”

⁸ Subedar do Jisui roṛ ruạṛadea, “E Probhu, ińakʼ oṛakʼtem bolokʼ nonkan lek geń baṅkana. Eken katha moto roṛgotʼkam, ar inạtege ińren guti doe bogekʼa.

⁹ Ente iń hõ eṭakʼicʼakʼ katha leka calakʼ hoyokʼtińạ ar iń latarre hõ palṭonko menakʼkoa; iń do mitʼ hoṛ ‘calakʼ iń metae khan uni doe calakʼa, ar eṭagicʼ ‘hijukʼ iń metae khan uni doe hijukʼa; ar ińren golam iń metae khan nonkaeme uni doe onkaea.”

¹⁰ Jisu do noa katha ańjomkateye hahaṛayena, ar acʼ pańja edeyekankoe metatʼkoa, “Sạrigeń metapekana, Israelko modre nunạkʼ maraṅ pạtiạu do okoere hõ bạń ńelakada.

¹¹ Ińiń metapekana, purub ar pạchim khon aema hoṛko hijukʼa ar Abraham, Isahak, ar Jakob sãote serma rajre jojomko duṛupʼa.

¹² Menkhan rajosṭiren hoponko do bahre ńutreko giḍi ocokʼa. Onḍe do rakʼjoṅ ar togocʼ ḍaṭa hoyokʼa.’’

¹³ Jisu do subedare metadea, “Do calakʼme. Ar cetʼlekam pạtiạu akan onkage baṛe hoyokʼma.” Ar ṭhik unrege uniren guti doe bogeyena.

Ḍher hoṛko bogeyen

¹⁴ Inạ tayom Jisu do Patrasakʼ oṛakʼte senkateye ńelkeda, Patrasren hanhartetʼ doe ruạkʼkana ar uni doe giticʼ akana.

¹⁵ Jisu do uniakʼ tiye joṭetʼketʼtaea ar inạtege ruạ do chuṭạu gotʼentaea. Ar unre beretʼkate uni do Jisui sapʼsoradea.

¹⁶ Ạyupʼen khan ạḍi utạr bhut capaṛ hoṛ do uni ṭhenko ạguketʼkoa. Ar moca kathatege uni do bhutkoe oḍok giḍiketʼkoa ar okoeko ruạkʼkan tahẽkan onko hõe bogeketʼkoa.

¹⁷ Noa do hoyena Jesaea nạbi hotete roṛlenakʼ katha jemon purạukʼ: Uni do aboakʼ sanam nijorakʼkoe hataoketʼ tabona, ar aboakʼ rogkoe ocokʼketʼ tabona.

¹⁸ Ado Jisu acʼ beṛhaete ạḍi utạr hoṛkoakʼ bhiṛe ńelketʼ khan celako doreão hanasa calakʼ lạgitʼe hukumatʼkoa.

¹⁹ Unre mitʼṭen sostor baḍae hoṛ do Jisu ṭhen hecʼenteye menkeda, “E Guru, jãhãtegem calakʼ iń hõ onḍegeń calakʼa.”

²⁰ Jisu do uniye metadea, “Toyokoakʼ do bhugạkʼ menakʼtakoa ar cẽṛẽkoakʼ hõ tukạ menakʼa, menkhan Manwa Hoponakʼ do bohokʼ dohoetae lạgitʼ jaega hõ bạnukʼtaea.”

²¹ Ado celako modren eṭagicʼ do hecʼkateye menkeda, “E Probhu, ạpuń topaye lạgitʼ sen maṛaṅ ocowạńme.”

²² Jisu do uniye metadea, “Gocʼkoge akoren gocʼko topa ocoakome, menkhan am do iń pańjańme.”

Birbãoe thir ocoyetʼ

²³ Ado Jisu lạukạreye decʼen khan uniren celako hõ uni sãoteko calaoena.

²⁴ Ar ackage doreãore birbão hecʼgotʼena, onate lạukạ do ḍheokote uḍucʼ ḍubujokʼ ehopʼena. Menkhan Jisu doe jạpitʼ akatʼ tahẽkana.

²⁵ Unre celako do uni ṭhen hecʼkate beretʼ kedeteko metadea, “E Probhu, bańcao bonme; gujukʼkana bon.”

²⁶ Uni doe metatʼkoa, “E nase pạtiạukʼko, cedakʼpe botorokʼ kana?” Inạ tayom beretʼkate uni do hoe ar doreãoe dhomkaokeda. Ar unre sanamakʼ do ḍel ḍel thir hapeyena.

²⁷ Noa ńelte celako do hahaṛayenteko menkeda, “Nui doe okalekan hoṛ kante, hoe hõ hoe ar doreão hõ doreãokin bataoetʼtaea!”

Bạṛicʼ jiu sapʼ ocoakan hoṛkin bogeyen

²⁸ Inạ tayom Jisu do doreão hanasa Gadarikoakʼ elakateye calaoena. Unre bạṛicʼ jiu capaṛ akatʼkin barhoṛ do mạ̃ṛĩ poḍa khon oḍokente Jisu ṭhenkin hecʼena.

²⁹ Unkin do nonkan haḍrapkin tahẽkana, ona horte okoe hõ bako parom daṛeakʼkan tahẽkana. Ado kikiạuatekin menkeda, “E Isorren Hopon, ale tulucʼ amakʼ do cetʼ? Okte ạuri hoyokʼrege sasetle lạgitʼem hecʼakana?”

³⁰ Onko khon thoṛa sạṅgiń ńokʼre ạḍi utạr sukriko ạtińkan tahẽkana.

³¹ Bạṛicʼ jiuko do Jisu nehõradeteko metadea, “Oḍok giḍikalem menetʼkan khan enḍekhan onko pal sukrire kolkaleme.”

³² Jisui metatʼkoa, “Do calakʼpe.” Ar unrege onko doko oḍokente sukrikoreko boloyena. Onate onko sukri do daṛaṅ secʼteko ńir senente doreão dakʼreko gad gadao pheḍena arko unum gocʼena.

³³ Ar okoekoko gupikan tahẽkan onko do atoteko ńir senente jotowakʼko lạikeda. Ḍherkaete onko do bhut capaṛ akatʼkin hoṛ reaṅko lạikeda.

³⁴ Unre atoren hoṛko Jisu tulucʼ ńapamokʼ lạgitʼko oḍok hecʼena. Arko ńapamkede khan akoakʼ elaka khon senokʼ lạgitʼko nehõradea.